ودان بولەك, وڭىردەگى تەمىر-بەتون, اسفالت ءوندىرىسى سەكىلدى ءىرى جوبالار بيىل ىسكە قوسىلادى. ءبىر گەكتار اۋماققا جىلىجاي سالاتىن ينۆەستور دايىن. الداعى 2-3 جىلدا 10 جوبا ىسكە اسپاق. «بۇرىن كاسىپكەرلىكتە قىزمەت كورسەتۋمەن اينالىساتىندار كوپ بولاتىن. قازىرگى جوبالار اراسىندا وندىرىستىك باعىت باسىم. ىسپەن اينالىسام دەگەندەر اراسىندا جاستار كوپ», دەيدى ءبولىم باسشىسى.
مەملەكەت قولداۋىمەن شارۋاسى العا باسقان تۇرعىننىڭ ءبىرى – ناۋرىز ايىمبەتوۆ. باستاپقىدا 2 سوتىق جەرگە جىلىجاي سالعان ول بۇگىندە اۋقىمىن ۇلعايتىپ, تابىسىن ەسەلەي تۇسكەن.
«وتباسىلىق بيزنەستى اكەم باستادى. باستاپقىدا جىلىجايى شاعىن ەدى. تابىستى بولارىنا كوز جەتكىزگەسىن كولەمدى كوبەيتۋدى ويلادىق. وسىلايشا, «اۋىل اماناتى» جوباسى اياسىندا نەسيە الىپ, 8 سوتىق جەرگە قىزاناق, قيار ەگىپ وتىرمىز. جىلىنا قىزاناقتان – 10, قياردان 5-6 توننا الامىز. تازا پايدامىز 5-6 ملن تەڭگەنىڭ اينالاسىندا», دەيدى كاسىپكەر.
وتكەن قىستا تاجىريبە رەتىندە سالات جاپىراعىن ەگىپ كورگەن. بابىن تاپساڭ, بىتە قالاتىن كوكونىس ەكەن. قىستىڭ سۋىعىنا دا ءتوزىمدى بولىپ شىقتى. شىققان ءونىم اۋدانداعى ازىق-ت ۇلىك دۇكەندەرى مەن مەيرامحانالاردان ارتىلمادى. بىلتىر اۋدان اكىمىمەن كەزدەسۋدە تاعى 1 گەكتار جەر سۇراعان. سول شارۋا سوزبۇيداعا سالىنباي جىلدام شەشىلىپتى. ەندى ناۋرىز الماتىداعى ءىنىسىن شاقىرىپ, كەلەر جىلى سول جەردەن جىلىجاي سالماق.
«2000 جىلدارى وزبەكستاننان كوشىپ كەلگەندە وسى جەر قۋ تاقىر ەدى. بالالارىمدى جانىما ەرتىپ ءجۇرىپ الما, ورىك, ءجۇزىم ەكتىك. بەينەتتىڭ ارقاسىندا قازىر اۋلا قالىڭ باۋعا اينالدى. وسىنداعى تانىستاردان العان انار كوشەتىن بىلتىر تىگىپ, قىس بويى جان-جاعىن قىمتاپ, باپتاپ شىقتىم. قازىر العاشقى جەمىسىن سالا باستادى. قۋاناتىنىم, بالالارىمنىڭ بەينەتكە شىداعاننىڭ بەرەكەگە كەنەلەتىنىنە كوزى جەتتى. وسىنىڭ ارقاسىندا مەملەكەتتىڭ قولداۋىنا سۇيەنىپ, كاسىبىن كەڭەيتىپ وتىر», دەيدى ناۋرىزدىڭ اكەسى جۇماباي ايىمبەتوۆ.
جەرگىلىكتى كاسىپكەرلەر اراسىندا ماكارون ونىمدەرىن شىعارىپ جاتقاندار دا بار. ءىسىن ناۋبايحانا اشۋدان باستاعان ەركىنباي شىدەرباەۆ ازىق-ت ۇلىك دۇكەنىن قاتار الىپ ءجۇردى. جاڭا ءىس باستاۋ ءۇشىن جوبا قۇرىپ, جوسپارىن جەتىلدىرگەن سوڭ بىلتىر مەملەكەتتىك باعدارلاماعا قاتىسىپ, «قىزىلوردا» وڭىرلىك ينۆەستيتسيالىق ورتالىعى ارقىلى 19,5 ملن تەڭگەنى 4%-بەن الدى. نەسيەگە قاجەتتى قۇرال-جابدىعىن تۇگەندەدى. ءىستى باستاماس بۇرىن الماتى قالاسىنان ارنايى تەحنولوگ مامان شاقىرتىپ, ءونىم قۇرامىن, جاسالۋ جولىن ۇيرەنىپ, تاجىريبە جيناقتادى.
«يتاليالىق اۆتوماتتاندىرىلعان تەحنولوگيا ارقىلى جىل باسىنان بەرى 5 تونناعا جۋىق ءونىم شىعارىپپىز. سونىڭ ءبارى وسى اۋدانعا ساتىلدى. سىرتتان كەلەتىن تاۋارلاردان ەرەكشەلىگىمىز – ەشقانداي بوياۋ قوسپايمىز. ساپاسىنا كەپىلدىك بەرەمىز. ەل ساۋدا سورەسىنەن الدىمەن ءبىزدىڭ ءونىمدى ىزدەيدى», دەيدى.
قىزىلوردا وبلىسى,
جاڭاقورعان اۋدانى
