فوتو: جوعارعى سوت
زاڭدا ازاماتتار مەن مەملەكەتتىڭ قاۋىپسىزدىگىنە ەلەۋلى قاتەر توندىرمەيتىن قىلمىستار ءۇشىن سوتتالعانداردى بوساتۋ ۇسىنىلعان. راقىمشىلىققا قىلمىستىق قۇقىق بۇزۋشىلىقتار, ونشا اۋىر ەمەس قىلمىستار, زالال كەلتىرىلمەگەن نەمەسە زالال تولىق وتەلگەن ورتاشا اۋىرلىقتاعى قىلمىستار جاتادى. سونىمەن قاتار, زالالدىڭ نەمەسە ازاماتتىق تالاپ قويۋدىڭ بار-جوعىنا قاراماستان, ورتاشا اۋىرلىقتاعى قىلمىس جاساعان الەۋمەتتىك جاعىنان وسال ادامدار توبىنا دا راقىمشىلىق قاراستىرىلعان.
الدىن الا ەسەپتەۋلەرگە سايكەس, بۇل راقىمشىلىق 15 مىڭ ادامدى قامتىماق: ولاردىڭ ىشىندە 6 مىڭ ادام – باس بوستاندىعىنان ايىرۋ ورىندارىندا وتىرعاندار, 9 مىڭ ادام – پروباتسيا قىزمەتىنىڭ ەسەبىندە تۇرعاندار.
سونىمەن قاتار اۋىر جانە اسا اۋىر قىلمىستار ءۇشىن سوتتالعان ادامدارعا دا جازا مەرزىمى قىسقارتىلادى. اتاپ ايتقاندا, سەنiپ تاپسىرىلعان بوتەن مۇلiكتi يەمدەنىپ العانى نەمەسە ىسىراپ ەتكەنى, نە اسا ءىرى مولشەردە الاياقتىق جاساعانى ءۇشىن سوتتالعان ادامدار ءۇشىن كەلتىرىلگەن زالال مەن قويىلعان تالاپ-ارىزدار تولىق وتەلگەن جاعدايدا نەگىزگى جازانىڭ وتەلمەگەن نەمەسە ورىندالماعان بولىگى بەستەن ءبىر بولىككە قىسقارتىلادى.
جالپى العاندا, راقىمشىلىق اياسىندا جازانىڭ وتەلمەگەن مەرزىمىن سارالاپ قىسقارتۋ باس بوستاندىعىنان ايىرۋ ورىندارىنداعى 5,4 مىڭ سوتتالعان ادامعا جانە پروباتسيا قىزمەتىنىڭ ەسەبىندەگى 5,5 مىڭ ادامعا قولدانىلاتىن بولادى.
سونداي-اق الەۋمەتتىك جاعىنان وسال ساناتتاعى 629 ادام راقىمشىلىققا ىلىگەدى, ونىڭ ىشىندە 57 ادام بوساتىلىپ, 572 ادامنىڭ جازا مەرزىمى قىسقارتىلادى.
راقىمشىلىق قولدانۋ تۋرالى تۇپكىلىكتى شەشىمدى سوت ءاربىر سوتتالۋشىعا جەكە قابىلدايدى. بۇل سوت ادىلدىگى مەن زاڭدىلىقتى ساقتاۋ ءۇشىن ماڭىزدى تەتىك بولماق.
سونىمەن قاتار, زاڭدا ونشا اۋىر ەمەس جانە ورتاشا اۋىرلىقتاعى قىلمىستار ءۇشىن قىلمىستىق جاۋاپكەرشىلىككە تارتىلعان ادامدارعا قاتىستى قىلمىستىق ىستەردى توقتاتۋ ۇسىنىلعان. بۇل وزگەرىس زاڭ كۇشىنە ەنگەنگە دەيىن جاسالعان, سوتتا قارالماعان ىستەرگە قاتىستى بولادى. وسىلايشا, 2136 قىلمىستىق ءىس بويىنشا ءىس جۇرگىزۋ توقتاتىلادى.
«ايتا كەتۋ كەرەك, راقىمشىلىق جاساۋ قىلمىسقا قارسى كۇرەستى كۇشەيتۋ اياسىندا قىلمىستىق قۇقىق بۇزۋشىلىقتاردىڭ كريمينالداندىرىلعان جاڭا قۇرامدارىنا, مەملەكەتتىك قۇپيالاردى زاڭسىز جاريا ەتۋگە بايلانىستى قىلمىستارعا, سونداي-اق سىبايلاس جەمقورلىق قىلمىستار جاساعان ادامدار ءۇشىن شەكتەلەتىن بولادى. راقىمشىلىق اسا قاۋىپتى قىلمىس جاساعان ادامدارعا قولدانىلمايدى», دەلىنگەن حابارلامادا.
