دەنساۋلىق ساقتاۋ ءمينيسترى اقمارال ءالنازاروۆا قۇتتىقتاۋ سوزىندە جالپى پراكتيكا دارىگەرلەرى – مەديتسينالىق جۇيەنىڭ حالىققا ەڭ جاقىن, ءارى ماڭىزدى بۋىنى ەكەنىن اتاپ ءوتتى.
«بۇگىندە ەلىمىزدە 6 مىڭعا جۋىق مەديتسينالىق-سانيتاريالىق العاشقى كومەك (مساك) سۋبەكتىسى ازاماتتارعا قىزمەت كورسەتىپ وتىر. امبۋلاتوريالىق ۇيىمداردا تىركەلگەن ۋچاسكەلەردىڭ 80 پايىزدان استامى جالپى پراكتيكا دارىگەرلەرىنە بەكىتىلگەن. الداعى ۋاقىتتا بۇل كورسەتكىشتى 100 پايىزعا جەتكىزۋ كوزدەلۋدە. بۇل وتباسىلىق قىزمەت كورسەتۋ قاعيداتىن تولىق ىسكە اسىرۋعا جول اشادى», دەدى ۆەدومستۆو باسشىسى.
جيىنعا قاتىسقان پارلامەنت ءماجىلىسىنىڭ دەپۋتاتى گۇلدارا نۇرىموۆا دا مساك سالاسىنىڭ ستراتەگيالىق ماڭىزىن ەرەكشە اتاپ ءوتتى. ونىڭ ايتۋىنشا, العاشقى مەديتسينالىق كومەكتى دامىتۋ – تەك ەلىمىز ءۇشىن عانا ەمەس, جاھاندىق دەڭگەيدەگى دەنساۋلىق ساقتاۋ ساياساتىنىڭ باسىم باعىتى.
«جالپى پراكتيكا دارىگەرلەرى – دەنساۋلىق ساقتاۋ قىزمەتتەرىن حالىققا بارىنشا قولجەتىمدى ەتەتىن باستى باعىتتاۋشىلار. ولار تەك ناۋقاستى ەمدەۋمەن شەكتەلمەيدى, قوعامنىڭ دەنساۋلىق مادەنيەتىن قالىپتاستىرۋعا دا ولشەۋسىز ۇلەس قوسىپ وتىر», دەدى ول.
كونفەرەنتسيا بارىسىندا وتاندىق جانە شەتەلدىك ساراپشىلار حالىقپەن جۇمىس جاساۋدا يننوۆاتسيالىق تاسىلدەردى ەنگىزۋ, دارىگەرلىك قىزمەتتىڭ ساپاسىن ارتتىرۋ, اقپاراتتىق جۇيەلەردى ءتيىمدى پايدالانۋ, ءدارى-دارمەكپەن قامتۋ جانە كادرلىق الەۋەتتى كوتەرمەلەۋ سەكىلدى ماسەلەلەر توڭىرەگىندە وي ءبولىستى.
اتاپ ايتقاندا, مساك تيىمدىلىگىن ارتتىرۋ, جالپى پراكتيكا دارىگەرلەرىنىڭ قىزمەتىن جەتىلدىرۋ, دەنساۋلىق ساقتاۋ جۇيەسىن قارجىلاندىرۋ, زاماناۋي تەحنولوگيالاردى ەنگىزۋ, دارىگەر ەڭبەگىن ىنتالاندىرۋ مەن قولجەتىمدى ءدارى-دارمەكپەن قامتاماسىز ەتۋ باعىتتارى كەڭىنەن ءسوز بولدى.
ءىس-شارا اياسىندا ەلىمىزدىڭ ءار وڭىرىنەن كەلگەن ۇزدىك 48 جالپى پراكتيكا دارىگەرى كاسىبي جەتىستىگى مەن حالىققا سىڭىرگەن ەڭبەگى ءۇشىن ارنايى ماراپاتقا يە بولدى. ولاردىڭ قاتارىندا «ەڭبەك ارداگەرى», «دەنساۋلىق ساقتاۋ ءىسىنىڭ ۇزدىگى», «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىلەرىمەن ماراپاتتالعان دارىگەرلەر بار.
كونفەرەنتسيا وفلاين جانە ونلاين فورماتتا ۇيىمداستىرىلىپ, 400-دەن استام مەديتسينا قىزمەتكەرلەرىن قامتىدى. قاتىسۋشىلار قاتارىندا پارلامەنت دەپۋتاتتارى, دۇنيەجۇزىلىك دەنساۋلىق ساقتاۋ ۇيىمىنىڭ ساراپشىلارى, مەديتسينالىق مەكەمەلەر مەن كاسىبي بىرلەستىكتەردىڭ وكىلدەرى بولدى.
بۇل باسقوسۋ جالپى پراكتيكا دارىگەرىنىڭ كاسىبي مارتەبەسىن كوتەرىپ, مساك سالاسىنداعى رەفورمالاردى ودان ءارى تەرەڭدەتۋگە جاڭا سەرپىن بەردى.
