فوتولار: قمدب رەسمي سايتى
ايتا كەتەلىك, قۇربان ايت مەرەكەسى قارساڭىندا ناۋرىزباي قاجى تاعان ۇلى استانا قالاسىنداعى الەۋمەتتىك جاعدايى تومەن بىرنەشە مۇقتاج وتباسىنىڭ شاڭىراعىنا باس سۇعىپ, قۇرباندىققا شالىنعان مال ەتىن, ازىق-ت ۇلىك تۇرلەرىن, بالالارعا تاتتىلەر مەن سىي-سياپاتتار تارتۋ ەتتى. كەزدەسۋدە ن.تاعان ۇلى قۇربان ايتتىڭ مۇسىلمان جۇرتى ءۇشىن رۋحاني-الەۋمەتتىك ماڭىزىنا توقتالىپ ءوتتى.
«قۇربان ايت – بىرلىك پەن باۋىرمالدىقتى ارتتىراتىن ۇلىق مەيرام. قازاقستان مۇسىلماندارى ءدىني باسقارماسى جۇزەگە اسىرىپ كەلە جاتقان Qurban.muftyat.kz ونلاين قايىرىمدىلىق پلاتفورماسى ارقىلى بىلتىر 136 مىڭنان استام مۇقتاج وتباسىعا كومەك كورسەتىلدى. بۇل – حالقىمىزعا ءتان قايىرىمدىلىق پەن باۋىرمالدىقتىڭ جارقىن ۇلگىسى, دەدى باس ءمۇفتي.
قايىرىمدىلىق شاراسى تۇرعىنداردىڭ ەرەكشە ريزاشىلىعىن تۋدىرىپ, مەرەكەلىك كوڭىل-كۇي سىيلادى. باس ءمۇفتي ناۋرىزباي قاجى تاعان ۇلى وسىنداي يگى ىستەر الداعى ۋاقىتتا دا جالعاساتىنىن اتاپ ءوتتى.
سونداي-اق بۇگىن باس ءمۇفتي ەلورداداعى رەسپۋبليكالىق «ازىرەت سۇلتان» مەشىتىندە جۇما نامازىن وتكىزىپ, جينالعان جاماعاتپەن بىرگە ەلىمىزدىڭ اماندىعى مەن بىرلىگى ءۇشىن دۇعا جاساپ, قۇربان ايت مەرەكەسىنە وراي جاماعاتقا ىزگى تىلەگىن ءبىلدىردى.
ايتا كەتەلىك, بۇگىن قازاقستان مەشىتتەرىندە «قۇرانداعى ىزگى (قايىرىمدى) ءىس-امالدار» تاقىرىبىندا جۇما ۋاعىزى ايتىلدى.
