ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار الەمى كوميتەتىنىڭ مالىمەتىنشە, كەرتاعىلار پراگا زووباعى مەن ماجارستاننىڭ «حورتوباد» ۇلتتىق ساياباعىنان اكەلىنگەن. جانۋارلار بىردەن «التىن دالا» مەملەكەتتىك تابيعي رەزەرۆاتىنىڭ اۋماعىنداعى جابايى تۇياقتىلاردى جەرسىندىرۋ ورتالىعىنا جەتكىزىلدى. كەرقۇلاندار رەزەرۆاتتاعى كەڭ قاشارلاردا ءبىر جىل ۇستالادى. ودان كەيىن سايىن دالاعا ەركىنە جىبەرىلەدى. اتالعان ورتالىقتا جايلى ينفراقۇرىلىم, جابايى جىلقىلارعا قارايتىن ارنايى ماماندار بار.
«بۇل – ءبىزدىڭ ءبىر جىل بويى جۇرگىزگەن جۇمىسىمىزدىڭ ناتيجەسى. كەرقۇلانداردىڭ تاعى ءبىر توبى امان-ەسەن كەلىپ جەتتى. ال ءبىرىنشى اكەلىنگەن كەرقۇلاندار تورعاي دالاسىنا ابدەن ۇيرەنىپ, جەرسىندى دەسەك بولادى. ولار قازىر «التىن دالا» مەملەكەتتىك رەزەرۆاتى ينسپەكتورلارىنىڭ قورعاۋىمەن جابايى تابيعات اياسىندا تىرشىلىك ەتىپ جاتىر», دەيدى ورمان شارۋاشىلىعى جانە جانۋارلار الەمى كوميتەتىنىڭ توراعاسى دانيار تۇرعامباەۆ.
پراگا زووباعى چەحيا اۋە كۇشتەرىنىڭ كومەگىمەن قازاقستانعا وسىمەن ەكىنشى رەت كەرتاعى جەتكىزىلىپ وتىر.
«ەۋروپالىق زووباقتاردان اكەلىنگەن بۇل جانۋارلار جابايى تابيعات اياسىنداعى جەرگىلىكتى پوپۋلياتسيانىڭ قالىپتاسۋىنا نەگىز سالادى دەگەن ويدامىز. تورعاي دالاسىندا تىرشىلىك ەتۋگە ابدەن بەيىمدەلگەن گەنەتيكالىق الۋان ءتۇرلى پوپۋلياتسيا قالىپتاسپايىنشا, بۇل اسا كۇردەلى جوبانى جالعاستىرا بەرەمىز», دەيدى پراگا زووباعىنىڭ ديرەكتورى ميروسلاۆ بوبەك.
ۆەتەرينارلىق باقىلاۋ جانە قاداعالاۋ كوميتەتى ارقالىق قالالىق اۋماقتىق ينسپەكتسياسىنىڭ باسشىسى مارعۇلان قويشان ۇلىنىڭ ايتۋىنشا, ءبىرىنشى بورت ماجارستاننان 4 كەرقۇلان, ەكىنشى بورت چەحيادان 3 كەرقۇلان جەتكىزگەن.
«بيىلعا بارلىعى وسى 7 قۇلان, كەلەر جىلى تاعى 8 قۇلان اكەلىنەدى. وسىلايشا, 2029 جىلعا دەيىن اتالعان ەكى ەلدەن بىزگە بورت كەلىپ تۇرادى. كەرقۇلاندار جازىق دالاعا جىبەرىلەدى. «التىن دالا» مەملەكەتتىك تابيعي رەزەرۆاتىنىڭ ماماندارى قازىر بۇرىنىراقتا اكەلىنگەن كەرقۇلانداردىڭ انالىقتارى مەن اتالىقتارىن قوسىپ جاتىر. بۇعان دەيىن 2024 جىلدىڭ ماۋسىم ايىندا جەتكىزىلگەن قۇلانداردىڭ ءبارى ءدىن امان. ۆەتەريناريالىق باقىلاۋ جاساپ, ءبارىن قابىلداپ الدىق. بۇل قۇلاندار ەندى ءبىر ايعا دەيىن كارانتيندە تۇراتىن بولادى», دەيدى ينسپەكتسيا باسشىسى.
مامانداردىڭ ايتۋىنشا, كەرقۇلان (كەرتاعى) – جەر بەتىندە قالعان جابايى جىلقىلاردىڭ ەڭ اقىرعى ءتۇرى. جابايى تابيعات اياسىندا XX عاسىردىڭ ورتاسىنا قاراي جويىلىپ كەتكەن. 2029 جىلعا دەيىن تورعاي دالاسىندا كەرتاعىنىڭ ودان ءارى كوبەيىپ, تۇراقتى پوپۋلياتسيا ءتۇزۋى ءۇشىن تاعى 40-45 باس جىلقى اكەلۋ جوسپاردا بار.
قوستاناي وبلىسى
