ەلىمىزدىڭ پرەمەر-ءمينيسترى اتىنان بارلىق مال شارۋاشىلىعى قىزمەتكەرلەرىن كاسىبي مەرەكەلەرىمەن پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين قۇتتىقتادى.
«مەملەكەت باسشىسىنىڭ تاپسىرماسىنا سايكەس, ەلىمىزدىڭ اگروونەركاسىپتىك كەشەنىن دامىتۋعا جان-جاقتى قولداۋ كورسەتىلىپ كەلەدى. مال شارۋاشىلىعى سالاسىنداعى جانقيارلىق ەڭبەك ناتيجەسىندە قازاقستاندىقتار ساپالى ءارى تابيعي ونىمگە قول جەتكىزۋدە, ال اگرارلىق ەكونوميكانىڭ الەۋەتى ارتىپ وتىر. مال شارۋاشىلىعى وڭدەلگەن ءونىم ۇلەسىن ارتتىرۋدا جانە اۋىل تۇرعىندارىن جىل بويى تۇراقتى جۇمىسپەن قامتۋدا ماڭىزدى ءرول اتقارادى. بۇل سالاداعى بارلىق جەتىستىكتەر – ەڭ الدىمەن, مالشىلاردىڭ اۋىر ءارى ادال ەڭبەگىنىڭ ناتيجەسى. ۇكىمەت بۇل سالانى دامىتۋعا الداعى ۋاقىتتا دا باسىمدىق بەرۋدى جالعاستىرادى», – دەپ اتاپ ءوتتى ۆيتسە-پرەمەر.
قازاقستان رەسپۋبليكاسى اۋىل شارۋاشىلىعى ءمينيسترى ايداربەك ساپاروۆ ءوز سوزىندە مال شارۋاشىلىعى – بۇل تەك ەكونوميكالىق سالا عانا ەمەس, سونىمەن قاتار ەلدىڭ تاريحى, مادەنيەتى جانە اۋىل ءومىر سالتىمەن تىعىز بايلانىستى ۇلتتىق بىرەگەيلىكتىڭ ءبىر بولىگى ەكەنىن اتاپ ءوتتى.
«پرەزيدەنت 2025 جىلدى قازاقستاندا جۇمىسشى ماماندىقتار جىلى دەپ جاريالادى. بۇل – ناقتى ەكونوميكانى قۇرىپ, بۇكىل قوعامنىڭ تىرەگىن قالىپتاستىراتىن ەڭبەكتىڭ ماڭىزدى ءرولىن مويىنداۋ بولىپ تابىلادى.
مال شارۋاشىلىعى – اۋىل شارۋاشىلىعىنىڭ نەگىزگى جانە ەڭ كوپ ەڭبەك ءسىڭىرۋدى قاجەت ەتەتىن سالالارىنىڭ ءبىرى. بۇل سالا كاسىبي داعدىلارمەن قاتار, جوعارى دەڭگەيدەگى ءوزىن-ارناۋدى تالاپ ەتەدى. ول ازىق-ت ۇلىك قاۋىپسىزدىگىنە, اۋىلدىق وڭىرلەردەگى جۇمىسپەن قامتۋعا جانە اگروونەركاسىپ كەشەنىنىڭ ارالاس باعىتتارىنىڭ دامۋىنا تىكەلەي اسەر ەتەدى.
2024 جىلدىڭ قورىتىندىسى بويىنشا مال شارۋاشىلىعىنىڭ جالپى ءونىم كولەمى 3,3 ترلن. تەڭگەنى قۇراپ, وتكەن جىلمەن سالىستىرعاندا 3,6%-عا ءوستى. وسىعان بايلانىستى اگروونەركاسىپ كەشەنىنىڭ ستراتەگيالىق ماڭىزى بار بۇل سالانىڭ دامۋىنا ەلەۋلى ۇلەس قوسىپ كەلە جاتقان تۇركىستان, پاۆلودار, سولتۇستىك قازاقستان جانە اقمولا وبلىستارىن ەرەكشە اتاپ وتكىم كەلەدى. بۇل وڭىرلەر ءوندىرىس كولەمى بويىنشا تۇراقتى تۇردە الدىڭعى قاتاردا كەلەدى», – دەدى ايداربەك ساپاروۆ.
ايتا كەتەيىك, 2020 جىلعا دەيىن ەلدە جىل سايىن ەكى تاۋارلىق-ءسۇت فەرماسى (تسف) ىسكە قوسىلاتىن بولسا, سولتۇستىك قازاقستان وبلىسىنىڭ تاجىريبەسىن تاراتۋ باعدارلاماسى اياسىندا 2024 جىلى 39 زاماناۋي تسف ىسكە قوسىلىپ, تاعى 46-سى قۇرىلىس ساتىسىندا تۇر. الداعى 2–3 جىلدا تسف سانى 115-كە جەتىپ, قوسىمشا 600 مىڭ توننادان استام ءسۇت ءوندىرۋ مۇمكىندىگى پايدا بولادى.
قولداۋ سونىمەن قاتار ەتتى ءىرى قارا ءوسىرۋ, قۇس شارۋاشىلىعى, قوي شارۋاشىلىعى, تۇيە جانە جىلقى شارۋاشىلىقتارىن دا قامتيدى. اسىل تۇقىمدى مال باسىن ساتىپ الۋعا جانە اينالىم قاراجاتىن تولىقتىرۋعا جىلدىق 5% مولشەرلەمەمەن قولجەتىمدى قارجىلاندىرۋ قۇرالدارى ەنگىزىلدى.
باستى باسىمدىقتاردىڭ ءبىرى – تۇقىمدىق رەسۋرستاردى دامىتۋ بولىپ قالا بەرەدى. 2025 جىلى 75 جىلدىعىن اتاپ وتەتىن قازاقتىڭ اقباس سيىرى – تۇراقتىلىقتىڭ, ونىمدىلىكتىڭ جانە ۇلتتىق ماقتانىشتىڭ سيمۆولىنا اينالدى. بۇل تۇقىم ءساتتى ەكسپورتتالىپ, حالىقارالىق دەڭگەيدە باسەكەگە قابىلەتتىلىگىن دالەلدەپ وتىر.
ءماجىلىستىڭ اگرارلىق ماسەلەلەر كوميتەتىنىڭ توراعاسى سەرىك ەگىزباەۆ پەن قازاقستاننىڭ ەڭبەك ەرى, اۋىل شارۋاشىلىعى مينيسترلىگى جانىنداعى قوعامدىق كەڭەستىڭ توراعاسى گەننادي زەنچەنكو ەلدىڭ ازىق-ت ۇلىك تۇراقتىلىعىن قامتاماسىز ەتىپ, قازاق مال شارۋاشىلىعىنىڭ عاسىرلىق ءداستۇرىن جالعاستىرىپ كەلە جاتقان سالا ماماندارىن قۇتتىقتادى.
پرەمەر-ءمينيستردىڭ اتىنان 17 سالانىڭ وكىلىنە قۇرمەت گراموتالارى تابىستالدى.
