فوتو: جي
سەناتتاعى جيىندا قورعانىس ءمينيسترىنىڭ ءبىرىنشى ورىنباسارى سۇلتان كامالەتدينوۆ اسكەرگە شاقىرۋ ناۋقانىنا قاتىستى پىكىر ءبىلدىردى. ول اسكەرگە ازاماتتاردى كوشەدەن ۇستاپ اكەتۋ وقيعالارىنىڭ بار ەكەنىن راستاپ, بۇل ارەكەتتەردىڭ زاڭسىز ەكەنىن مالىمدەدى.
«مۇنداي فاكتىلەر – تەك قارۋلى كۇشتەرگە عانا ەمەس, جالپى مەملەكەتكە, قوعامىمىزعا دەگەن قۇرمەتسىزدىك. بۇل – ورتاق ماسەلە. ءاربىر ازامات زاڭ اياسىندا اسكەري مىندەتىن وتەۋى كەرەك», دەدى ول.
سۇلتان كامالەتدينوۆ جۋرناليستەردى تەك تەرىس جاڭالىقتاردى ەمەس, ەلگە ۇلگى بولارلىق وقيعالاردى دا ناسيحاتتاۋعا شاقىردى.
«سىزدەر تەك وسىنداي تەرىس جايتتاردى ناسيحاتتايسىزدار. مەنىڭشە, بۇل دۇرىس ەمەس. ءوز ەركىمەن اسكەرگە بارعىسى كەلەتىن جاستاردى دا كورسەتۋ كەرەك. ولار — ءبىزدىڭ ماقتانىشىمىز», دەدى ءمينيستردىڭ ورىنباسارى.
ايتا كەتەيىك, كوكتەمگى اسكەرگە شاقىرۋ ناۋقانى ناۋرىز ايىنان ماۋسىمنىڭ سوڭىنا دەيىن جالعاسادى. رەسمي مالىمەتكە سايكەس, 2025 جىلى قازاقستاندا 20 مىڭنان استام ازامات اسكەر قاتارىنا شاقىرىلۋى ءتيىس.
جانەل تولەۋبەكوۆا, ەۇۋ ستۋدەنتى
