مەرەكەلىك شارانىڭ باستى ءبولىمى ىلە اۋدانىنىڭ وتەگەن باتىر كەنتى مەن قوناەۆ قالاسىنىڭ 5-جاعاجايىندا ۇيىمداستىرىلدى. تاڭعى ساعات 9:00-دە وتەگەن باتىر اۋىلىندا مەملەكەتتىك تۋ تۇعىرى ماڭىنا جينالعان كوپشىلىك ءانۇراندى بىرگە شىرقاپ, كوك بايراقتىڭ كوككە كوتەرىلۋ ساتىنە كۋا بولدى.
الماتى وبلىسىنىڭ اكىمى مارات سۇلتانعازيەۆ جينالعان جۇرتشىلىقتى قۇتتىقتاپ, مەملەكەتتىك رامىزدەردىڭ ەل بولاشاعىن تاربيەلەۋدەگى ماڭىزىن اتاپ ءوتتى.
«تۋ كوتەرۋ – تەك سالتاناتتى ءراسىم عانا ەمەس, بۇل – ۇرپاققا پاتريوتتىق تاربيە بەرۋدىڭ, ۇلتتىق رۋحتى جاڭعىرتۋدىڭ ناقتى كورىنىسى. مەملەكەتتىك رامىزدەر – ءار ازاماتتىڭ جۇرەگىندەگى وتانسۇيگىشتىك سەزىمىن وياتاتىن كيەلى نىشان», دەدى ءوڭىر باسشىسى.
سونداي-اق ول, مەملەكەت باسشىسى قاسىم-جومارت توقاەۆتىڭ «مەملەكەتتىك رامىزدەرىمىز – كۇللى حالقىمىزعا قاستەرلى نىشاندار» دەگەن سوزىنە توقتالىپ, تاۋەلسىزدىكتىڭ قۇندىلىعىنا ەرەكشە ءمان بەردى.
شارا اياسىندا كونتسەرتتىك باعدارلاما ۇسىنىلىپ, پاتريوتتىق اندەر شىرقالدى.
مەرەكەنىڭ ەكىنشى كەزەڭى قوناەۆ قالاسىنداعى 5-جاعاجايدا جالعاستى. قالا كوشەلەرىمەن وتكەن «تۇلپار» رەترو كولىكتەر شەرۋى مەرەكەگە كورىك بەرىپ, جاعاجاي الاڭىنا ءتىزىلىپ قويىلدى. قالا اكىمىنىڭ قۇتتىقتاۋىنان سوڭ, كونتسەرتتىك باعدارلاما ۇسىنىلدى.
كوپشىلىكتىڭ ەرەكشە ىقىلاسىنا بولەنگەن ءسات — كاسىبي فلايبوردشى ولەسيا كولەسنيچەنكونىڭ سۋ ۇستىندەگى كورىنىسى بولدى. ول كاتەرلەر مەن جەلكەندى قايىقتاردىڭ اراسىندا اۋەگە كوتەرىلىپ, اكروباتيكالىق ونەر كورسەتتى.
«تۇعىرلى تۋىم» اكتسياسى — حالىقتىڭ پاتريوتتىق رۋحىن كوتەرىپ, مەملەكەتتىك نىشاندارعا دەگەن قۇرمەتتى ارتتىرۋعا باعىتتالعان تاعىلىمدى باستاما. بۇل كۇن — جاس ۇرپاققا ەلدىك پەن بىرلىك تۋرالى وي سالىپ, ەل رامىزدەرىنىڭ قادىرىن تەرەڭ ۇعىنۋعا مۇمكىندىك بەردى.
ء«بىر مەزەتتە كوككە كوتەرىلگەن تۋ – ەلىمىزدىڭ تۇتاستىعى مەن حالقىمىزدىڭ جۇرەگىندەگى ورتاق ماقتانىشتىڭ بەلگىسى», دەيدى ۇيىمداستىرۋشىلار.
ەلىمىزدىڭ تاۋەلسىزدىگىن الەمگە ايگىلەيتىن مەملەكەتتىك رامىزدەر كۇنىنە وراي, «AMANAT» پارتياسىنىڭ الماتى وبلىستىق فيليالىنىڭ قولداۋىمەن بىرقاتار ءىس-شارا جۇزەگە استى.
اتاپ ايتساق, قوناەۆ قالاسىنداعى Asp Club دريفت الاڭىندا, قاپشاعاي سۋ قويماسىنىڭ جاعالاۋىندا مەملەكەتتىك رامىزدەر كۇنىنە ارنالعان ەرەكشە اۆتواكتسيا ءوتتى. ءار كولىكتىڭ توبەسىنە قازاقستاننىڭ كوك تۋى ورناتىلىپ, 16 اۆتوكولىك بىرلەسىپ «KZ» جازۋىن قۇرادى.
مارە الدىندا جۇرگىزۋشىلەر شەكتەۋلى الاڭدا سينحروندى دريفت جاساپ, كولىكتەردىڭ قوزعالىسىن ءدال ۇيلەستىرە ءبىلدى. وسىلايشا قاتىسۋشىلار مەملەكەتتىك رامىزدەرگە دەگەن قۇرمەتتەرىن اۆتوسپورت ارقىلى ءبىلدىردى.
مەملەكەتتىك رامىزدەر كۇنىنە وراي ەڭبەكشىقازاق اۋدانىنداعى ەسىك كولى جاعاسىندا 30-دان استام بالا ءانۇراندى ۇلتتىق اسپاپتاردا ورىندادى. تەڭىز دەڭگەيىنەن 1759 مەتر بيىكتىكتە وتكەن بۇل كورىنىس – تابيعات پەن ەل رۋحىنىڭ ۇيلەسىمىن پاش ەتتى.
سونىمەن قاتار, مەملەكەتتىك تۋ الماتى وبلىسىنىڭ كورىكتى جەرلەرىندە جەلبىرەدى. اتاقتى قاپشاعاي جاعالاۋى, شارىن شاتقالى, كولساي مەن كوشپەندىلەر قالاشىعىندا جەلبىرەگەن كوك تۋىمىز كوز ءسۇيسىنتتى.
الماتى وبلىسى
