كورنەكتى ساۋلەتشى الدىمەن شىراقبەك قابىلباەۆ اتىنداعى قوستاناي اكادەمياسىنىڭ كۋرسانتتارىمەن جۇزدەستى. اكادەميا ۇجىمى الاڭعا ساپ تۇزەپ, مەملەكەتتىك رامىزدەرگە قۇرمەت ءراسىمىن وتكىزدى. سالتاناتتى جيىندا اكادەميا باستىعى, پوليتسيا گەنەرال-مايورى اقىنقالي دارمەنوۆ ءسوز سويلەپ, قادىرلى مەيمانعا وقۋ ورنى ۇجىمىنىڭ اتىنان العىس ايتتى.
«بۇگىن – ءبىز ءۇشىن ايرىقشا كۇن. مەملەكەتتىك ەلتاڭبانىڭ اۆتورى جانداربەك مالىبەك ۇلىن اكادەميا قابىرعاسىندا قارسى الىپ, قۇرمەت كورسەتۋ – ءبىز ءۇشىن ۇلكەن مارتەبە. ءسىزدىڭ قولىڭىزدان شىققان ەلتاڭبا – ەل تاريحى مەن رۋحانياتىنىڭ, ۇلتىمىزدىڭ مادەنيەتى مەن بولمىسىنىڭ ايشىقتى بەينەسى. بۇل – ەگەمەندىگىمىزدىڭ, بىرلىگىمىز بەن ايبىنىمىزدىڭ نىشانى. ءسىزدىڭ وسى باعىتتاعى ەڭبەگىڭىز – ۇرپاققا ۇلگى بولارلىق باعا جەتپەس مۇرا», دەدى اكادەميا باستىعى.
جانداربەك مالىبەكوۆ كۋرسانتتارعا ەلتاڭبانىڭ يدەيالىق مازمۇنى, تاريحي تامىرى مەن كوركەمدىك ەرەكشەلىگى جايىندا اڭگىمەلەپ بەردى.
«ەلىمىزدىڭ ەرتەڭى, بولاشاقتىڭ كىلتى وسىندا ساپ تۇزەپ تۇرعان جاس ساربازداردىڭ قولىندا. سىزدەرگە وسىنى جەتە ءتۇسىنىپ, ساپالى ءبىلىم الىپ, بولاشاقتا ەلگە ادال قىزمەت ەتۋ – پارىز. اتا-بابامىز اڭساعان, الاش ارىستارى ارمانداعان تاۋەلسىزدىگىمىز ماڭگى جاساسىن! وڭىرلەرىڭىز وركەندەپ, ەلىمىز گۇلدەنە بەرسىن. ول ءۇشىن جاستار ءبىلىمدى, سانالى, ەلجاندى بولۋى قاجەت. ءبىلىم مەن ەڭبەك جولىندا ايانباي تەر توگىپ, ەل مۇددەسى ءۇشىن قىزمەت ەتىڭىزدەر», دەدى ج.مالىبەكوۆ.
ەلتاڭبا اۆتورى ودان كەيىن ىبىراي التىنسارين اتىنداعى مۋزەيگە بارىپ, جەرگىلىكتى زيالى قاۋىم وكىلدەرىمەن كەزدەستى. باسقوسۋدا ەلتاڭبانىڭ جاسالۋ تاريحى, ۇلتتىق ساۋلەت ونەرى تۋرالى اڭگىمە بولدى. قادىرلى مەيمان الاش بالاسى ءۇشىن قاستەرلى دۇنيەگە اينالعان ەلتاڭبا بەدەرىندە كورىنىس تاپقان نىشاندارعا توقتالىپ, ءار بەلگىنىڭ نەندەي ماعىنا بەرەتىنىن ايتىپ بەردى.
كەش سوڭىندا جانداربەك مالىبەكوۆ ىبىراي التىنسارين مۋزەيىنە «قازاقستان ەلتاڭباسى» كىتابى مەن ەلتاڭبا توسبەلگىسىن تارتۋ ەتتى.
ەلتاڭبا اۆتورى كەلەسى كۇنى مەملەكەتتىك قىزمەتشىلەرگە رامىزدەردى دۇرىس پايدالانۋ, ورناتۋ, ورنالاستىرۋ ءتارتىبى جونىندە سەمينار وتكىزدى. ءىس-شارا بارىسىندا مەملەكەتتىك رامىزدەردىڭ شىعۋ تاريحى, قازىرگى قولدانىستاعى جاعدايى, مەملەكەتتىك رامىزدەردى جاساپ شىعاراتىن كاسىپورىنداردىڭ جۇمىس ساپاسىن باقىلاۋ ماسەلەلەرى تالقىلاندى.
«مەملەكەتتىك رامىزدەردى دايىنداۋدا ساپا مەن بارلىق تالاپتىڭ ساقتالۋىنا ەرەكشە كوڭىل بولەمىز. ەڭ باستىسى, تاپسىرىس بەرۋشى تەحنيكالىق سيپاتتامانى دۇرىس تولتىرىپ جىبەرۋى قاجەت. ويتكەنى كەيدە دۇرىس تولتىرىلماعان قۇجاتتاردىڭ سالدارىنان ءبىزدىڭ اتىمىزعا جاعىمسىز پىكىرلەر ايتىلىپ قالىپ جاتادى. ءبىز جۇمىسىمىزدى سول قۇجات نەگىزىندە عانا جۇرگىزەمىز جانە وعان ەشقانداي وزگەرتۋلەر ەنگىزبەيمىز. قازىرگى تەحنولوگيالار وتە دامىعان, اۆتوماتتاندىرىلعان قۇرىلعىلارمەن جۇمىس ىستەيمىز. بۇل بىزگە ءونىمنىڭ ساپاسىن جوعارى دەڭگەيدە قامتاماسىز ەتۋگە مۇمكىندىك بەرەدى», دەدى مەملەكەتتىك رامىزدەردى دايىنداپ شىعاراتىن جەكە كاسىپكەر جاندوس تىنىمباەۆ.
سەمينارعا قاتىسۋشىلاردىڭ ايتۋىنشا, تەحنيكالىق رەتتەۋ جانە مەترولوگيا كوميتەتى مەملەكەتتىك رامىزدەرگە قاتىستى مەملەكەتتىك باقىلاۋدى تۇراقتى جۇرگىزەدى. قانداي دا ءبىر كەمشىلىك انىقتالسا, ءتيىستى تۇزەتۋ ەنگىزۋ ءۇشىن ەسكەرتپە بەرىلەدى.
«جىل سايىن بەلگىلەنگەن كەستەگە ساي رامىزدەردى قولدانۋ بويىنشا ستاندارتتاردى ءتۇسىندىرۋ جانە مونيتورينگ جۇرگىزۋ جۇمىستارىن جۇزەگە اسىرامىز. ءبىزدىڭ مەكەمەدە 988 ستاندارت بەكىتىلگەن. وندىرۋشىلەردىڭ تەحنيكالىق جابدىعىنىڭ بولۋى, ليتسەنزيالارىنىڭ بار-جوعى تەكسەرىلەدى. سونىمەن قاتار سىزىقتار مەن ولشەمدەرگە, ءتۇسى مەن ساپاسىنا قويىلاتىن تالاپتار قاتاڭ باقىلانادى. مەملەكەتتىك ەلتاڭبانىڭ ساپاسىنا جاۋاپكەرشىلىكپەن قوسا, ستاندارت تالاپتارىن دا وندىرۋشىلەر ساقتاۋعا مىندەتتى», دەيدى تەحنيكالىق رەتتەۋ جانە مەترولوگيا كوميتەتى قوستاناي وبلىستىق دەپارتامەنتىنىڭ باسشىسى نۇرگۇل شودوروۆا.
سەمينار بارىسىندا مەملەكەتتىك رامىزدەر زاڭ بەلگىلەگەن تالاپقا سايكەس كەلمەسە, 20 اەك-تەن 900 اەك-كە دەيىن ايىپپۇل سالىناتىنى ايتىلدى. الايدا سوعان قاراماستان, اتالعان تالاپتى ءالى دە ساقتاي بەرمەيتىن مەكەمەلەر كەزدەسىپ قالىپ جاتادى. سوندىقتان جيىنعا قاتىسۋشىلار مەملەكەتتىك رامىزدەرگە قاتىستى بىركەلكى تالاپتاردى قامتيتىن جادىناما شىعارۋ كەرەك دەگەن ۇيعارىمعا كەلدى.
كەزدەسۋ سوڭىندا وبلىس اكىمىنىڭ ورىنباسارى باقىتجان نارىمبەتوۆ ەلتاڭبا اۆتورىنا بۇكىل وبلىس تۇرعىندارىنىڭ العىسىن جەتكىزىپ, مۇنداي تاعىلىمدى ءىس-شارالاردىڭ كوپشىلىكتىڭ كوكەيىنە وتانعا دەگەن سۇيىسپەنشىلىك, مەملەكەتشىلدىك رۋحىن ورنىقتىراتىنىن ايتتى.
قوستاناي وبلىسى
