اتالعان جارىستا جەڭىس تۇعىرىنا كوتەرىلگەندەر اراسىندا اسقان شەبەرلىك تانىتقان اككى بالۋاندار از بولعان جوق. اسىرەسە, قىزىلوردا مەن قوستانايدان كەلگەن جىگىتتەرگە ءدان ريزا بولدىق. العاشقى كۇنى بۇل كوماندالاردىڭ ارقايسى ەكى التىننان ولجالادى. اتاپ ايتساق, 60 كگ سالماق دارەجەسىندە ايدوس سۇلتانعانليعا تەڭ كەلەر ەشكىم تابىلمادى. الەم چەمپيوناتىندا ەكى مارتە قولا مەدالدى ولجالاعان وعىلان فينالدا دا ءوزىنىڭ مىقتىلىعىن مويىنداتتى. شەشۋشى تۇستا سىر بويىنىڭ ساڭلاعى كانىگى قارسىلاسى جەتىسۋلىق عالىم قابدۋناساروۆتى قوس جاۋىرىنىمەن جەرگە قادادى. ايدوستىڭ كوماندالىق ارىپتەسى الپامىس داستانبەك 55 كگ سالماقتا توپ جاردى. فينالدا ول استانالىق مارلان مۇقاشەۆپەن تەڭ ءتۇستى. ەرەجە بويىنشا ونداي جاعدايدا سوڭعى ءادىستى كىم جاسادى جەڭىس سوعان بەرىلەدى. بۇل رەتتە الپامىستىڭ اسىعى الشىسىنان ءتۇستى.
قوستاناي وبلىسى وكىلدەرى اراسىنان يۋسۋپ ماتسيەۆ (97 كگ) پەن مانسۋر شادۋكاەۆتىڭ (130 كگ) مەرەيى ۇستەم بولدى. نەبىر مىقتىلاردى جولىنان ىعىستىرعان ماتسيەۆ اقتىق سىندا شىعىسقازاقستاندىق سالاۆات احمەتقاليدى جەڭدى. باستاپقى باسەكەلەردىڭ بىرىندە ازيا چەمپيونى ءالىمحان سىزدىقوۆقا سان سوقتىرعاننان كەيىن-اق شادۋكاەۆتىڭ ەندى شاشاسىنا شاڭ جۇقتىرمايتىنا سەنىمدى بولدىق. ىشكى تۇيسىگىمىز الداماعان ەكەن. فينالدا مانسۇر الماتى وبلىسىنىڭ سپورتشىسى اقارىس بەرداشروۆتان باسىم ءتۇستى. تاعى ءبىر التىندى استانالىق مەرەي ماۋلەتقانوۆ (72 كگ) ولجالادى. باس جۇلدە ءۇشىن تارتىستا ول سولتۇستىك وڭىردەن كەلگەن دانيار قالەنوۆتى قاپى قالدىردى.
كەلەسى كۇنى 63 كگ سالماقتا الماتىلىق ەركەبۇلان ارداقوۆتىڭ ايى وڭىنان تۋدى. فينالدا ول جارىس قوجايىنى اساۋحات مۇحاماديەۆتىڭ ورەسكەل قاتەلىگىن ۇتىمدى پايدالاندى. «قازاقستان» سپورت كەشەنىنە جينالعان جانكۇيەرلەر 67 كگ سالماق دارەجەسىندەگى تارتىستى تاعاتسىزدانا كۇتتى. سەبەبى, بوزكىلەمگە شىققان بالۋاندار ازۋلى ەدى. 24 جاستاعى ەرجەت جارىلقاسىن – 2024 جىلعى الەم چەمپيوناتىنىڭ كۇمىس جۇلدەگەرى, ونىڭ قۇرداسى سۇلتان اسەت ۇلى – 2023 جىلعى جاستار اراسىنداعى (U-23) الەم بىرىنشىلىگىنىڭ جەڭىمپازى. ەكەۋىنىڭ دە ازيا چەمپيونى دەگەن دارداي اتاقتارى بار. بىراق جامبىل وبلىسىنىڭ وكىلدەرى ءبىر-بىرمەن ارپالىسۋدى ءجون كورمەدى دە, الدە جارىلقاسىننىڭ جاراقاتى بولدى ما, ايەتۋىر جەڭىس اسەت ۇلىنا بەرىلدى. كونە تارازدان كەلگەن تاعى ءبىر بالۋان تالاس ءاشىرحانوۆ 77 كگ سالماقتا الدىنا جان سالمادى. جاس سپورتشىنىڭ كۇرەسى ءتاسىلى مەن مانەرى جانە دە جەڭىسكە دەگەن قۇشتارلىعى وتە جاقسى اسەر قالدىردى. 82 كگ سالماقتا المير تولەباەۆ توپ جاردى. فينالدا الماتى وبلىسىنىڭ ءاپايتوسى تاجىريبەلى قاھارمان قيسمەتوۆتى قاپى قالدىردى. 72 كگ سالماقتا مەرەي ماۋلەتقانوۆقا ەشكىم قارسىلىق كورسەتە العان جوق.
87 كگ سالماقتىڭ فينالدىق سايىسىندا استانالىق ماقسات سايلاۋ مەن سولتۇستىكقازاقستاندىق يسلام ەۆلوەۆ كۇش سىناستى. وسىدان ەكى ايعا جۋىق ۋاقىت بۇرىن 23 جاسقا دەيىنگى بالۋاندار اراسىنداعى ەل بىرىنشىلىگىنىڭ باس جۇلدەسى ءۇشىن تارتىستا ءدال سول سپورتشىدان ماقساتتىڭ مىسى باسىم بولدى. بۇل جولى ەكەۋى دە ايانعان جوق. باسەكە بارىسىندا كەسەك ادىستەردىڭ سان-الۋان ءتۇرىن كوردىك. تارازى باسى ۇزاق ۋاقىت تەڭسەلىپ تۇردى. بىردە سايلاۋ, بىردە ەۆولوەۆ العا شىقتى. ەڭ وكىنىشتىسى, سىن ساعاتتا بوزكىلەم يەسىنىڭ ەسكە جاراقاتى سىر بەردى. سونىڭ سالدارىنان ول جەڭىستى ۋىسىنان شىعارىپ الدى. سان ءسىى كورەرمەنگە كەرەمەت ەموتسيا سىيلاعان جان الىسىپ, جان بەرىسكەن اياقتالۋىنا 10 سەكۋند قالعاندا يسلام قارسىلاسىن كەۋدەسىنەن اسا لاقتىرىپ, ايقىن جەڭىسكە قول جەتكىزدى. ءسويتىپ, قاراعاندىدا جىبەرگەن ەسەسىن قايتارعان ەۆلوەۆ ەل كۋبوگىن يەلەندى. ماقسات كۇمىس مەدالدى قاناعات تۇتتى.
