فوتو: اشىق دەرەككوز
جيىنعا جوعارعى سوت القالارىنىڭ توراعالارى مەن سۋديالارى, عىلىمي-كونسۋلتاتيۆتىك كەڭەس مۇشەلەرى, قۇقىق قورعاۋ جانە وزگە دە مەملەكەتتىك ورگاندار - باس پروكۋراتۋرا, ىشكى ىستەر مينيسترلىگى, قارجى مونيتورينگى اگەنتتىگى, سونداي-اق نوتاريات وكىلدەرى قاتىستى. كۇن تارتىبىندە بىرنەشە ماڭىزدى نورماتيۆتىك قاۋلى جوبالارى تالقىلاندى.
جس سۋدياسى عازيزا مۇسابەكوۆا وتىرىس بارىسىندا 2025 جىلدىڭ 1 شىلدەسىنەن باستاپ كۇشىنە ەنەتىن نورماتيۆتىك قاۋلىلار جوباسىن تانىستىردى. وندا كاسساتسيالىق ساتىعا جوعارى تالاپتار بەلگىلەنگەن. بۇل وزگەرىستەر سوت تورەلىگىن ساپالى جۇزەگە اسىرۋ, قۇقىق قولدانۋ بىرىزدىلىگىن ساقتاۋ, سونداي-اق قۇقىقتىق تۇسىنىكسىزدىكتەر مەن ىقتيمال قاتەلىكتەردى ازايتۋ ماقساتىندا جاسالىپ وتىر.
نورماتيۆتىك قاۋلىلار جوباسىندا قاراستىرىلعان نەگىزگى ەرەجەلەر:
• قىلمىستىق ىستەر بويىنشا سوت اكتىلەرىن كاسساتسيالىق تارتىپتە قايتا قاراۋ نەگىزدەرى ناقتىلاندى;
• شاعىم جانە نارازىلىق بەرۋگە قۇقىعى بار تۇلعالاردىڭ ءتىزىمى كورسەتىلدى;
• شاعىمنىڭ مازمۇنىنا قويىلاتىن تالاپتار مەن ونى قاراۋ ءتارتىبى بەكىتىلدى;
• تومەنگى ساتىداعى سوتتاردىڭ شەشىمدەرىن قايتا قاراۋ كەزىندە كاسساتسيالىق سوتتىڭ ارەكەت ەتۋ ءتارتىبى ايقىندالدى.
جس سۋدياسى ەلەنا ماكسيۋتا سوت بيلىگىنە قاتىستى وزگەرىستەرگە توقتالىپ, تومەندەگى ماڭىزدى اسپەكتىلەردى اتاپ ءوتتى:
• كاسساتسيالىق سوت توراعاسىنىڭ ازاماتتاردى جەكە قابىلداۋى رەتتەلەدى;
• بۇقارالىق اقپارات قۇرالدارىنىڭ سوت وتىرىستارىنا قاتىسۋىنا نەگىزسىز شەكتەۋ قويۋعا تىيىم سالىنادى;
• سوتقا باق تاراپىنان ىقپال ەتۋ ارەكەتتەرى ءۇشىن جاۋاپكەرشىلىك كوزدەلەدى (بۇل «ماسس-مەديا تۋرالى» زاڭنىڭ 67-بابىنىڭ 2-تارماعىندا كورىنىس تاپقان);
• سۋديانى تارتىپتىك جاۋاپتىلىققا تارتۋ ءۇشىن ناقتى نەگىزدەر مەن تالاپتار ناقتىلاندى, سونىڭ ىشىندە زاڭدى ورەسكەل بۇزعان جاعدايدا قولدانىلاتىن شارالار.
جس سۋدياسى ءرازيا قۋانىشباەۆا نورماتيۆتىك قاۋلىداعى ازاماتتىق ىستەرگە قاتىستى وزگەرتۋلەردى ۇسىندى. اتاپ ايتقاندا, ەرلى-زايىپتىلاردىڭ ورتاق مۇلكىن ءبولۋ تۋرالى تالاپ قويۋ مەرزىمىن دۇرىس ەسەپتەۋ ەرەجەلەرى ناقتىلاندى جانە دە اليمەنت وندىرۋگە قاتىستى كەيبىر ەرەجەلەر الىنىپ تاستالعان.
قابىلدانعان نورماتيۆتىك قاۋلىلار تۋرالى تولىق اقپاراتپەن جوعارعى سوتتىڭ رەسمي سايتىنداعى «زاڭناما» بولىمىنەن تانىسۋعا بولادى. سونىمەن قاتار, قۇجاتتار قر نورماتيۆتىك قۇقىقتىق اكتىلەرىنىڭ ەتالوندىق باقىلاۋ بانكىندە رەسمي تۇردە جاريالانادى.
الينا قايراتقىزى,
ەۇۋ 2-كۋرس ستۋدەنتى
