فوتو: اشىق دەرەككوز
ەۆگەني كوچەتوۆتىڭ ايتۋىنشا, مادەني ورتالىقتى قۇرۋ – قازاقستان مەن قىتاي اراسىنداعى جوعارى دەڭگەيدەگى كەلىسىمدەردىڭ ناتيجەسى.
«قىتاي – قازاقستان رەسپۋبليكاسىنىڭ سەنىمدى دوسى, وداقتاسى جانە ستراتەگيالىق ارىپتەسى. ەكى ەلدى عاسىرلار بويعى دوستىق, ورتاق رۋحاني قۇندىلىقتار مەن بەرىك ىنتىماقتاستىق ءداستۇرى بايلانىستىرادى», دەدى ۆيتسە-مينيستر.
سونداي-اق ول مادەني-گۋمانيتارلىق ءوزارا ارەكەتتەستىكتىڭ قارقىندى دامىپ كەلە جاتقانىن اتاپ ءوتتى.
«بۇل باعىتقا مەملەكەت باسشىلارىنىڭ قوس استانادا مادەني ورتالىقتار اشۋ تۋرالى باستاماسى قوسىمشا سەرپىن بەردى. قازىر بۇل جوبا اياقتالۋعا جاقىن. بيىل قازاقستان رەسپۋبليكاسىنىڭ مادەني ورتالىعى قىتاي حالىق رەسپۋبليكاسىنىڭ استاناسى بەيجىڭ قالاسىندا ەسىگىن ايقارا اشادى», دەدى ول.
قازاقستان تاراپى ءوز كەزەگىندە استانادا قىتاي مادەني ورتالىعىن اشۋعا تولىق قولداۋ ءبىلدىرىپ وتىر.
«بۇل قادام – حالىقتارىمىز اراسىنداعى مادەني بايلانىستى تەرەڭدەتىپ, ءوزارا تۇسىنىستىكتى نىعايتۋدا ماڭىزدى ءرول اتقاراتىنىنا سەنىمدىمىز», دەدى كوچەتوۆ.
سونىمەن قاتار, ول باق سالاسىنداعى ىنتىماقتاستىقتىڭ ارتىپ كەلە جاتقانىن اتاپ ءوتتى.
«قازاقستاندىق تەلەارنالار قىتايدىڭ جەتەكشى اقپارات قۇرالدارىمەن, ونىڭ ىشىندە سينحۋا اگەنتتىگى مەن جەنمين جيباو گازەتىمەن ءساتتى ىنتىماقتاستىق ورناتىپ وتىر. ءبىز ءاردايىم سەرىكتەستىككە, ديالوگقا جانە ءوزارا ءتيىمدى بايلانىسقا اشىقپىز», دەدى ۆيتسە-مينيستر.
