فوتو: اشىق دەرەككوز
ء«بىز «استرازەنەكا» حالىقارالىق كومپانياسىنىڭ قازاقستاندا يننوۆاتسيالىق ءدارى-دارمەكتەر ءوندىرىسىن جەرگىلىكتى دەڭگەيدە جولعا قويۋ باستاماسىن جوعارى باعالايمىز. كومپانيانىڭ بۇل جوباسى دەنساۋلىق ساقتاۋ جانە ونەركاسىپ سالالارىنداعى مەملەكەتتىك ساياساتتىڭ باسىم باعىتتارىن, سونداي-اق سالانىڭ تۇراقتى دامۋىن, زاماناۋي جانە ءتيىمدى دارىلىك زاتتاردىڭ قولجەتىمدىلىگىن ارتتىرۋدى كوزدەيدى. وسى ساياساتتىڭ ءساتتى جۇزەگە اسۋىنا مىسال رەتىندە 2-ءتيپتى قانت ديابەتى, جۇرەك جەتكىلىكسىزدىگى مەن بۇيرەك اۋرۋلارىن ەمدەۋگە ارنالعان «فورسيگا» پرەپاراتى ءوندىرىسىنىڭ ىسكە قوسىلۋىن ايتۋعا بولادى. بۇل - ناۋقاستاردى قاجەتتى تەراپيامەن قامتاماسىز ەتۋگە مۇمكىندىك بەرەتىن ماڭىزدى قادام», دەدى قر دەنساۋلىق ساقتاۋ ۆيتسە-ءمينيسترى تيمۋر مۇراتوۆ.
پرەپاراتتار 2018 جىلدان باستاپ امبۋلاتوريالىق تەگىن دارىلىك قامتاماسىز ەتۋ تىزىمىنە ەنگىزىلگەن. قازىرگى تاڭدا 2 ميلليونعا جۋىق قازاقستاندىق حبا دياگنوزىمەن تىركەلگەن, بۇل دەگەنىمىز قازاقستاندا ءاربىر ونىنشى ادامعا گەمودياليز قاجەت دەگەندى بىلدىرەدى. جوباعا قازىرگى تاڭدا 5 ملن دوللار ينۆەستيتسيا قۇيىلسا, 2030 جىلعا قاراي بۇل كورسەتكىش 40 ملن دوللارعا جەتپەك. ساراپشىلاردىڭ پىكىرىنشە, ءوندىرىستىڭ لوكاليزاتسياسى وتاندىق ناۋقاستاردى ۇزدىكسىز جانە ساپالى تەراپيامەن قامتاماسىز ەتۋگە مۇمكىندىك بەرەدى.
«قازىرگى تاڭدا ەلدە 15 مىڭ ناۋقاسقا تەراپيا قاجەت. ولاردىڭ ىشىندە جاستار دا كوپ. تەرمينالدىق كەزەڭدە ناۋقاستاردىڭ 35–40%-ى جاساندى بۇيرەك اپپاراتىنا تاۋەلدى بولادى. بۇل ناۋقاستاردىڭ كوپشىلىگى ارتەريالىق گيپەرتەنزيا جانە قانت ديابەتىمەن اۋىراتىندار. ەندى قازاقستاندا تيىمدىلىگى دالەلدەنگەن, اۋقىمدى زەرتتەۋلەردەن وتكەن, سەنىمدى جانە وتاندىق دەڭگەيدە وندىرىلەتىن پرەپاراتتى قولدانۋ مۇمكىندىگى بار. بۇل- ءبىز جانە ءبىزدىڭ پاتسيەنتتەر ءۇشىن وتە ماڭىزدى قادام», دەدى قر باس شتاتتان تىس نەفرولوگى, پروفەسسور تۋعانبەكوۆا سالتانات.
ايتا كەتۋ كەرەك, بۇل جوبا 2020–2025 جىلدارعا ارنالعان فارماتسەۆتيكالىق ونەركاسىپتى دامىتۋ جونىندەگى كەشەندى جوسپار اياسىندا جۇزەگە اسىرىلۋدا جانە قازاقستان, ۇلىبريتانيا مەن شۆەتسيا اراسىنداعى ينۆەستيتسيالىق ارىپتەستىكتىڭ جارقىن ۇلگىسى بولىپ وتىر.
الينا قايراتقىزى,
ەۇۋ 2-كۋرس ستۋدەنتى
