فوتو: اشىق دەرەككوز
«مەملەكەتتىك ارنايى قىزمەتكەر رەتىندەگى وكىلەتتىگىم اياقتالۋعا جاقىن. وسى مۇمكىندىكتى پايدالانىپ, ارتىق شىعىنداردى ازايتۋعا مۇمكىندىك بەرگەنى ءۇشىن پرەزيدەنت دونالد ترامپقا العىس ايتقىم كەلەدى», دەپ جازدى X-تەگى پاراقشاسىندا.
سونىمەن قاتار يلون ماسك DOGE ميسسياسى ۋاقىت وتە كەلە نىعايا تۇسەتىنىن جانە ونىڭ مەملەكەتتىك باسقارۋداعى ءومىر سالتىنا اينالاتىنىن اتاپ ءوتتى.
بۇعان دەيىن CBS تەلەارناسىنا بەرگەن سۇحباتىندا ماسك ترامپ اكىمشىلىگىنىڭ «ۇلكەن ءارى ادەمى» دەپ سيپاتتالعان سالىق جانە بيۋدجەت زاڭىنا كوڭىلى تولمايتىنىن ايتقان ەدى. ونىڭ پىكىرىنشە, بۇل زاڭ ۇنەمدەۋ شارالارىنا كەدەرگى كەلتىرىپ, بيۋدجەت تاپشىلىعىن ارتتىرادى.
20 قاڭتاردا ترامپ قىزمەتكە كىرىسكەن سوڭ, ماسك ارنايى مەملەكەتتىك قىزمەتكەر رەتىندە تاعايىندالعان بولاتىن. بۇل لاۋازىم وعان جىلىنا 130 كۇن مەملەكەتتىك قىزمەتتە جۇمىس ىستەۋگە مۇمكىندىك بەردى. بۇل مەرزىم مامىر ايىنىڭ سوڭىندا اياقتالادى.
ءساۋىر ايىندا ماسك ءوزىنىڭ جەكە كومپانيالارىنا كوبىرەك كوڭىل بولەتىنىن ايتىپ, DOGE جۇمىسىنا اپتاسىنا ءبىر-ەكى كۇن عانا ارناۋدى جوسپارلاعانىن جەتكىزگەن ەدى. كەيىنىرەك ول ساياسي جوبالارعا جاسالاتىن قايىرىمدىلىقتى دا قىسقارتاتىنىن مالىمدەگەن.
ماسكتىڭ باستاماسىمەن ونداعان مىڭ مەملەكەتتىك قىزمەتكەر جۇمىستان بوساتىلىپ, بىرنەشە اگەنتتىك پەن ۆەدومستۆو جابىلعانىمەن, كۇتكەن ناتيجەلەرگە قول جەتكىزىلمەگەن.
«فەدەرالدى بيۋروكراتيانىڭ جاعدايى مەن ويلاعاننان دا ناشار ەكەن. ماسەلەلەردىڭ بارىن ءبىلدىم, بىراق ۆاشينگتونداعى جاعدايدى جاقسارتۋ – وتە قيىن مىندەت», دەگەن ەدى ماسك.
