قازاقستاننىڭ حالىقارالىق بىتىمگەرلىك ميسسيالارعا قاتىسۋى 2003 جىلى العاشقى ينجەنەرلىك-ساپەرلىك «قازبات» جاساعىنىڭ قۇرىلۋىمەن باستالدى. بۇل ەلدىڭ بەيبىتشىلىك پەن قاۋىپسىزدىك جولىنداعى العاشقى ناقتى قادامى بولدى.
2014 جىلى قازاقستان العاش رەت ءوز اسكەري قىزمەتشىسىن بۇۇ-نىڭ باتىس ساحاراداعى ميسسياسىنا اسكەري باقىلاۋشى رەتىندە جىبەرىپ, حالىقارالىق ۇيىممەن رەسمي ىنتىماقتاستىقتى باستادى.
سودان بەرى قازاقستاندىق بىتىمگەرلەر ليۆان, باتىس ساحارا, كوت-د’يۆۋار سياقتى ءتۇرلى ايماقتاردا بەيبىتشىلىك ورناتۋعا اتسالىسىپ كەلەدى. 2024 جىلى قازاقستان بۇۇ-نىڭ افريكا مەن تاياۋ شىعىستاعى ميسسيالارىنا قوسىمشا اسكەري ماماندار جىبەردى. اسىرەسە ورتالىق افريكا رەسپۋبليكاسى, مالي جانە كونگو دەموكراتيالىق رەسپۋبليكاسىنداعى جاعدايلار كۇردەلىلىگىمەن ەرەكشەلەندى.
قازاقستان – تمد ەلدەرىنىڭ ىشىندە بۇۇ-نىڭ گولان جوتالارىنداعى ميسسياسىنا جەكە مانداتپەن قاتىسۋعا رۇقسات العان جالعىز مەملەكەت. قازىرگى تاڭدا ەلىمىزدىڭ 139 اسكەري قىزمەتشىسى اتىستى توقتاتۋ رەجيمىن ساقتاۋ سەكىلدى ماڭىزدى تاپسىرمالاردى ورىنداۋدا.
بۇۇ كونتينگەنتىن ءوز بەتىنشە ورنالاستىرۋ شەشىمى نورماتيۆتىك-قۇقىقتىق بازانى جەتىلدىرۋ مەن اسكەري دايارلىق جۇيەسىن دامىتۋعا باعىتتالعان اۋقىمدى جۇمىستىڭ جەمىسى بولدى. وسى پروتسەستە الماتى قالاسىندا قۇرىلعان بىتىمگەرلىك وپەراتسيالار ورتالىعى ماڭىزدى ءرول اتقارىپ وتىر. ول بىتىمگەرلەردى قۇقىقتىق, تىلدىك, گۋمانيتارلىق جانە پسيحولوگيالىق تۇرعىدان جان-جاقتى دايىنداۋمەن اينالىسادى.
قازاقستاننىڭ بىتىمگەرلىك ميسسيالارعا قاتىسۋى حالىقارالىق قاۋىپسىزدىككە ۇلەس قوسۋمەن قاتار, ەلىمىزدىڭ جاھاندىق بەدەلىن ارتتىرىپ, اسكەري قىزمەتشىلەردىڭ كاسىبي ماشىقتارىن جەتىلدىرۋگە مۇمكىندىك بەرەدى. ولار كوپۇلتتى ورتادا ارەكەت ەتۋ تاجىريبەسىن جيناقتاپ, جاۋىنگەرلىك داعدىلارىن شىڭداي تۇسەدى.
