ماۋلەن اشىمباەۆ مەيمانعا ءىلتيپات بىلدىرە كەلىپ, گەرمانيا قازاقستاننىڭ ەۋروپالىق وداقتاعى ستراتەگيالىق سەرىكتەسى ەكەنىن ايتتى. سەنات سپيكەرى اتاپ وتكەندەي, ديپلوماتيالىق قارىم-قاتىناس ورناعالى بەرى قازاقستان مەن گەرمانيا اراسىندا سەنىمدى ساياسي ديالوگ جولعا قويىلدى. سونداي-اق ساۋدا-ەكونوميكالىق جانە ينۆەستيتسيالىق ىنتىماقتاستىق پەن مادەني-گۋمانيتارلىق بايلانىستار دا ناتيجەلى دامىپ كەلەدى.
– مەملەكەت باسشىسى قاسىم-جومارت توقاەۆ قازاقستان مەن گەرمانيا اراسىنداعى دوستىق جانە ءوزارا ءتيىمدى قارىم-قاتىناستى نىعايتۋعا ۇنەمى باسا ءمان بەرەدى. بۇعان كەيىنگى ءۇش جىلدا گەرمانيانىڭ فەدەرالدى پرەزيدەنتى فرانك-ۆالتەر شتاينمايەردىڭ, قازاقستان پرەزيدەنتى قاسىم-جومارت توقاەۆتىڭ جانە گەرمانيانىڭ فەدەرالدى كانتسلەرى ولاف شولتستىڭ ءوزارا ساپارلارى ايقىن دالەل. سونىمەن قاتار بىلتىر ىنتىماقتاستىق تۋرالى بىرلەسكەن دەكلاراتسياعا قول قويىلعانى بەلگىلى. بۇل ستراتەگيالىق سەرىكتەستىكتى ودان ءارى نىعايتۋ جولىنداعى ماڭىزدى قادام بولدى. ءبىز سەنات تاراپىنان زاڭنامالىق قولداۋ كورسەتۋگە جانە بارلىق كەلىسىمدى ءتيىمدى ىسكە اسىرۋ جولىندا بىرلەسىپ جۇمىس ىستەۋگە دايىنبىز, – دەپ پالاتا توراعاسى بۋندەسرات پرەزيدەنتىنىڭ بۇل ساپارى ەلدەر اراسىنداعى قاتىناستاردى ودان ءارى ىلگەرىلەتۋگە ەلەۋلى سەرپىن بەرەتىنىنە سەنىم ءبىلدىردى.
سۇحبات كەزىندە ماۋلەن اشىمباەۆ پەن انكە رەلينگەر پارلامەنتارالىق بايلانىستاردى نىعايتۋ پەرسپەكتيۆالارىنا, ونىڭ ىشىندە زاڭ شىعارۋ قىزمەتىندە تاجىريبە الماسۋعا قاتىستى ماسەلەلەرگە دە نازار اۋداردى.
– پارلامەنتارالىق ديالوگ ەلدەرىمىز اراسىنداعى ىنتىماقتاستىقتى نىعايتۋ جولىندا ماڭىزدى ءرول اتقارادى. وسى باعىتتاعى العاشقى قادام رەتىندە سالالىق كوميتەتتەر جانە سەنات پەن بۋندەسرات اپپاراتتارى اراسىندا جۇمىس بايلانىستارىن ورناتۋعا مول مۇمكىندىك بار. ءبىزدىڭ پارلامەنتتىڭ ەكى پالاتاسىندا دا گەرمانيامەن دوستىق توپتارى جۇمىس ىستەيدى. بۇل توپتاردىڭ قىزمەتى ەكىجاقتى ىنتىماقتاستىقتىڭ ماڭىزدى تەتىگى سانالادى. ولاردىڭ الەۋەتىن بارىنشا بەلسەندى پايدالانۋعا بولادى, – دەدى م.اشىمباەۆ.
سونىمەن قاتار كەزدەسۋدە ورتالىق ازيا – گەرمانيا ستراتەگيالىق سەرىكتەستىك ورناتقان ايماق ەكەنى ءسوز بولدى. وسىعان بايلانىستى پالاتا توراعاسى ساۋدا-ەكونوميكالىق, ينۆەستيتسيالىق ىنتىماقتاستىق, سونداي-اق جاسىل ەكونوميكا جانە وڭىرارالىق ءوزارا ءىس-قيمىل سالالارىن دامىتۋدى زاڭنامالىق تۇرعىدان قولداۋدى كوزدەيتىن بىرلەسكەن جۇمىستىڭ نەگىزگى باعىتتارىنا توقتالدى.
– بۋندەسرات – «جەر پالاتاسى» ەكەنىن بىلەمىز. سەنات تا – قازاقستانداعى وڭىرلەردىڭ مۇددەسىن قورعايتىن پالاتا. سوندىقتان ءبىز ەلدەرىمىزدىڭ وڭىرلەرى اراسىندا بايلانىس ورناتۋعا مۇددەلىمىز. جاسىل ەنەرگەتيكا, كولىك جانە لوگيستيكا, ەكولوگيا جانە اۋىل شارۋاشىلىعى, تۋريزم سياقتى سەكتورلار ءوزارا ءتيىمدى ىنتىماقتاستىقتىڭ پەرسپەكتيۆالى باعىتتارى بولا الادى. وڭىرلەر اراسىنداعى بايلانىستاردى نىعايتۋ ىسىندە فەدەراتيۆتىك جەرلەر وكىلدەرىمەن دە بەلسەندى ىنتىماقتاستىق ورناتۋعا دايىنبىز, – دەپ سەنات سپيكەرى دەلەگاتتارعا قازاقستاندا جۇزەگە اسىرىلىپ جاتقان كەشەندى رەفورمالاردىڭ نەگىزگى ءمانى مەن ماڭىزى جونىندە ايتىپ بەردى.
ءوز كەزەگىندە انكە رەلينگەر قازاقستانداعى الەۋمەتتىك-ەكونوميكالىق جانە ساياسي وزگەرىستەرگە جوعارى باعا بەردى جانە ەكى ەلدىڭ ىنتىماقتاستىعى ودان ءارى نىعايا تۇسەتىنىنە سەنىم ءبىلدىردى.
كەزدەسۋدە رۋحاني ديپلوماتيانى دامىتۋ ماسەلەسىنە دە ەرەكشە كوڭىل ءبولىندى. بۇل رەتتە بيىلعى قىركۇيەكتە قازاقستاندا وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسى اڭگىمەگە ارقاۋ بولدى.
