وبلىس اكىمىنىڭ ورىنباسارى قايرات نۇرتاەۆتىڭ ايتۋىنا قاراعاندا, مۇنايلى شاھاردىڭ سولتۇستىگىنەن اينالىپ وتەتىن جولدىڭ قۇرىلىسىن 2026 جىلى اياقتاۋ جوسپارلانىپ وتىر. وسى كەزگە دەيىن جوباعا سايكەس 7 شاقىرىم جولدىڭ نەگىزگى قاباتى سالىندى.
«اسفالت جابىنىنىڭ استىڭعى قاباتى توسەلدى. كوپىردىڭ جانە جول ايرىعىنىڭ قادالارى قاعىلدى. سولتۇستىك اينالما جول وزگە وڭىرلەردەن كەلەتىن جۇك كولىكتەرىنىڭ اتىراۋ قالاسىنا كىرمەي-اق, ورال, اقتاۋ, اقتوبە جانە رەسەي شەكاراسى باعىتىنداعى جولعا شىعۋىنا مۇمكىندىك بەرەدى. دەمەك الداعى ۋاقىتتا بۇل جوبا كولىك جانە لوگيستيكا سالاسىنىڭ ەكونوميكالىق تۇرعىدان تيىمدىلىگىن ارتتىرادى», دەيدى ق.نۇرتاەۆ.
اكىم ورىنباسارىنىڭ مالىمەتىنشە, اتالعان جوبا اياسىندا جايىق وزەنى مەن سارىوزەك كانالى ۇستىمەن وتەتىن كوپىرلەر سالىنادى. وعان قوسا ءۇش جول ايرىعىن سالۋ قاراستىرىلىپ وتىر. جايىق وزەنىنىڭ ۇستىنەن سالىناتىن كوپىر اتىراۋ – ورال جانە اتىراۋ – يندەر جولىنا قوسىلادى.
«مۇنايلى ءوڭىر تۇرعىندارىن «اتىراۋ قالاسىنان رەسەي شەكاراسىنا دەيىن قاتىنايتىن جولدىڭ 5 شاقىرىمى قاشان سالىنادى؟» دەگەن ساۋال تولعاندىرادى. جولدىڭ بۇل بولىگىن ءبىرىنشى ساناتقا اۋىستىرۋ ماقساتىندا وبلىستىڭ كوممۋنالدىق مەنشىگىنە الدىق. سودان سوڭ جول بولىگىن رەكونسترۋكتسيالاۋ ءۇشىن جوبالىق-سمەتالىق قۇجات دايىندالدى. جوباعا مەملەكەتتىك ساراپتامانىڭ وڭ قورىتىندىسى بەرىلدى», دەپ مالىمدەدى اكىم ورىنباسارى.
جاقىندا اتالعان جولدىڭ بولىگىن جوندەۋ باستالدى. اتىراۋ وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باس مامانى التىنبەك بەيبىتوۆتىڭ دەرەگىنە سۇيەنسەك, جاڭعىرتۋ جۇمىسىنىڭ مەردىگەرى – «كازاحدورستروي» جشس.
«بۇرىن جولدىڭ بۇل ۋچاسكەسى ءۇشىنشى ساناتتا ءارى ەكىجولاقتى ەدى. ەندى ءبىرىنشى ساناتقا اۋىستىرىلىپ, وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ تەڭگەرىمىنە بەرىلدى. بۇل ۋچاسكەنىڭ ۇزىندىعى – 5 شاقىرىم. ونىڭ ىشىندە تەمىرجولدىڭ ۇستىمەن وتەتىن 89,4 مەترلىك كوپىر بار. جاڭعىرتۋ جوباسى اياسىندا ەسكى كوپىر تولىق بۇزىلىپ, جاڭادان سالىنادى. جول ءتورت جولاق بولادى», دەيدى ا.بەيبىتوۆ.
جوبا جەتەكشىسىنىڭ ورىنباسارى اسەت بەكتەنوۆتىڭ ايتۋىنا قاراعاندا, جولدىڭ ەسكى قاباتىن بۇزۋ باستالعان. قازىر كولىك قوزعالىسىن توقتاتپاۋ ءۇشىن اينالما جول سالىنىپ جاتىر. جول قۇرىلىسىنا 10 جۇمىسشى, 15 تەحنيكا تارتىلعان.
«الدىمەن جولدىڭ ۇستىڭگى قاباتىن تولىق قازىپ الامىز. ال اينالما جول دايىن بولعان سوڭ, نەگىزگى قۇرىلىس جۇمىستارى جالعاسادى», دەپ ءمالىم ەتتى ءا.بەكتەنوۆ.
اتىراۋ وبلىسى
