ەلىمىزدە ەركىن كۇرەستەن باسەكەلەستىك وتە كۇشتى. ەلوردا تورىندە وتكەن جارىستا سوعان تاعى ءبىر كوز جەتتى. ماسەلەن, وسى كۇنگە دەيىن 125 كگ سالماق دارەجەسىنىڭ باس بالۋانى سانالىپ كەلگەن يۋسۋپ باتىرمۇرزاەۆ شيرەك فينالدا الىشەر ەرعاليدەن ويسىراي ۇتىلدى. ءسوز جوق, الىشەر – مىقتى بالۋان. ازيا چەمپيوناتىندا ءتورت رەت جەڭىس تۇعىرىنا كوتەرىلىپ, توكيو, پاريج وليمپيادالارىنا قاتىستى. دەگەنمەن جامبىل وبلىسىنىڭ وكىلى بۇل تابىستارعا 97 كگ سالماقتا قول جەتكىزدى. ال اسا اۋىر سالماقتىڭ ءوز مىقتىلارى بار. سوعان قاراماستان ءا.ەرعالي باتىرمۇرزاەۆتى قوس جاۋىرىنىمەن جەرگە قادادى. فينالدا اقمولالىق نۇرسۇلتان ازوۆتان ايلاسىن اسىردى. ءۇشىنشى ورىنعا قاراعاندى وبلىسىنىڭ قوس الىبى – سەرىك باقىتحانوۆ پەن ءاليحان قۇسايىنوۆ تابان تىرەدى.
الەم چەمپيوناتىنىڭ قولا, ازيا ويىندارىنىڭ كۇمىس جۇلدەگەرى, قۇرلىقتىڭ ەكى دۇركىن چەمپيونى دانيار قايسانوۆ بىردەن ەكى سالماق دارەجەسىنە جوعارىلاۋدى ءجون كورگەن ەكەن. ونىڭ بۇل شەشىمى دۇرىس بولماعانى باسەكە بارىسىندا انىق بايقالدى. 86 كگ سالماقتا سايىسقا تۇسكەن اتاقتى بالۋان العاشقى اينالىمنان كەيىن-اق كورەرمەندەر قاتارىنا قوسىلدى. دانيار بيبارىس نۇرىلا ۇلىنا جول بەردى. اقتوبەنىڭ سپورتشىسى الماتىلىق نۇرسۇلتان ابدىحالىقپەن بىرگە قولا مەدالدى قاناعات تۇتسا, التىن, كۇمىس مەدالداردى بولات ساقاەۆ (اتىراۋ) پەن نۇرجان يساعاليەۆ (بقو) يەلەندى.
57 كگ سالماقتىڭ ۇزدىگى, ازيانىڭ ءۇش دۇركىن جۇلدەگەرى جامبىلدىق راحات قالجانوۆتىڭ بۇل جولى جۇلدەگەرلەر قاتارىنان كورىنۋگە قارىم-قابىلەتى جەتپەدى. ويدا-جوقتا ءوزىنىڭ كوماندالىق ارىپتەسى ادىلەت المۇحامەدوۆكە جول بەردى. ادىلەت فينالدا ابزال وكەنوۆتى (استانا) ءسۇرىندىردى. ودان كەيىنگى ورىنداردا – ۆاگيف گاسانوۆ (الماتى وبلىسى) پەن داۋلەت ءامىرحان (بقو).
65 كگ سالماقتا ناچىن كۋلار توپ جاردى. ول – شىمكەنت قالاسىنىڭ اتىنان سىنعا ءتۇسىپ جۇرگەنىمەن, تازا لەگيونەر. تۋعان جەرى – تىۆا. جاسى دا 30-عا تاياپ قالعان. بىلتىر ونى ءبىزدىڭ باپكەرلەر اممانداعى ازيا چەمپيوناتىنا اپاردى. ول جاقتا كۋلار ويسىراي ۇتىلدى. استانادا ناچىن الدىنا جان سالمادى. فينالدا مەيرامبەك قارتبايدى (اقتوبە) ءبىر عانا ۇپاي ايىرماشىلىعىمەن ۇتتى. بەكزات سىبانباي (شقو) مەن شەرحان ءابىل (الماتى) ۇزدىك ۇشتىكتى تۇيىندەدى. 97 كگ سالماقتا بەكزات ۇركىمبايعا (استانا) تەڭ كەلەر ەشكىم تابىلمادى. اقتىق باسەكەدە ول رۋستام ەكاجەۆتى (استانا) ەڭسەردى. نۇرداۋلەت بەكەنوۆ (شقو) پەن اكەجان ايتبەكوۆكە (جەتىسۋ) قولا مەدال بۇيىردى.
كەلەسى كۇنى تاعى بەس سالماق دارەجەسىندە جەڭىمپازدار مەن جۇلدەگەرلەر انىقتالدى. 61 كگ سالماقتا ءادىل وسپانوۆ (قاراعاندى) وزدى. شەشۋشى سايىستا ول اسىل ايتاقىننان (الماتى وبلىسى) ايلاسىن اسىردى. 70 كگ سالماقتىڭ فينالىندا مايس اليەۆ (ماڭعىستاۋ) مەيىرجان اشىروۆتەن (جامبىل) باسىم ءتۇستى. بۇل باسەكەنىڭ تاعدىرىن ءبىر عانا ۇپاي شەشتى. 74 كگ سالماقتا الىبەك ابدىقاسىموۆتىڭ (الماتى وبلىسى) اسىعى الشىسىنان ءتۇستى. 79 كگ سالماقتىڭ باس جۇلدەسىن 27 جاستاعى داۋلەت ەرگەش (جامبىل) پەن 38 جاستاعى نۇرلان بەكجانوۆ (استانا) ءوزارا ساراپقا سالدى. جاستار اراسىنداعى الەم بىرىنشىلىگىنىڭ كۇمىس جۇلدەگەرى ەرەسەكتەر اراسىنداعى الەم چەمپيوناتىنىڭ ءفيناليسىن ۇتتى. 92 كگ سالماقتا ازامات داۋلەتبەكوۆتىڭ (شقو) مەرەيى ۇستەم بولدى. اتاقتى بالۋان فينالدا سامير دۋرسۋنوۆتى ايقىن باسىمدىقپەن ۇتتى.
جالپىكوماندالىق ەسەپتە جامبىل وبلىسىنىڭ جامپوزدارى الدارىنا جان سالمادى. الماتى قالاسىنىڭ اپايتوستەرى ەكىنشى ورىن السا, ۇزدىك ۇشتىكتى شىعىس قازاقستان وبلىسىنىڭ بالۋاندارى تۇيىندەدى.
