اۋقىمدى جوبانى «قازاقستان» رەسپۋبليكالىق تەلەراديوكورپوراتسياسى ۇيىمداستىرىپ كەلەدى. مەديامەكتەپ باعدارلاماسى ەلىمىزدىڭ جوعارى وقۋ ورىندارىنىڭ جۋرناليستيكا, تسيفرلىق مەديانى باسقارۋ, قوعاممەن بايلانىس, مەدياونەر, كينو جانە تەلەۆيزيا رەجيسسۋراسى, مەدياكوممۋنيكاتسيا سىندى ماماندىقتار بويىنشا ءبىلىم الىپ جاتقان ستۋدەنتتەرگە ارنالعان. بيىل 104 ءوتىنىم ءتۇسىپ, ونىڭ ىشىندە 48 قاتىسۋشى ىرىكتەۋدەن ءوتتى. سونىمەن قاتار وڭىرلىك جوعارى وقۋ ورىندارىنان قابىلدانعان 23 ستۋدەنت ءبىلىمدى ونلاين فورماتتا الدى.
– بيىل مەديامەكتەپتە ەكى بىردەي ەرەكشەلىك بولدى. ءبىز تۇڭعىش رەت تەك استانادان عانا ەمەس, ايماقتاردان دا ءبىلىم الۋشىلار جينادىق. 14 ۋنيۆەرسيتەتتى قامتي الدىق. ەكىنشىدەن, ءبىز تەك قانا كورپوراتسيامىزدىڭ ىشىندەگى مىقتى مامانداردى عانا ەمەس, سىزدەرگە ءدارىس بەرۋ ءۇشىن سىرتتا, نارىقتا جۇمىس ىستەپ جۇرگەن مىقتى مەديامامانداردى ارنايى شاقىردىق. ولار نارىقتىق تاجىريبەلەرىمەن بولىسە الدى, – دەدى «قازاقستان» رترك» اق باسقارما توراعاسى ءلاززات تانىسباي.
مەديامەكتەپكە ىرىكتەلگەن ستۋدەنتتەر ەلىمىزدىڭ جەتەكشى وقۋ ورىندارىنىڭ وكىلدەرى. ولاردىڭ قاتارىندا: ءال-فارابي اتىنداعى قازاق ۇلتتىق ۋنيۆەرسيتەتى, ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى, ت.جۇرگەنوۆ اتىنداعى قازاق ۇلتتىق ونەر اكادەمياسى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, نازارباەۆ ۋنيۆەرسيتەتى, م.اۋەزوۆ اتىنداعى وڭتۇستىك قازاقستان ۋنيۆەرسيتەتى, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى, ە.ا.بوكەتوۆ اتىنداعى قاراعاندى زەرتتەۋ ۋنيۆەرسيتەتى, س.تورايعىروۆ اتىنداعى پاۆلودار ۋنيۆەرسيتەتى جانە س.امانجولوۆ اتىنداعى شىعىس قازاقستان ۋنيۆەرسيتەتى بار.
ايتا كەتۋ كەرەك, مەديامەكتەپ ستۋدەنتتەرى 7 اي بويى اقىسىز نەگىزدە ءبىلىم الدى. وسى جىلى وقۋدى اياقتاعان ستۋدەنتتەردى قوسا العاندا, جالپى 129 تۇلەك مەديامەكتەپتى تامامداعان. ولاردىڭ بىرقاتارى قازىر «قازاقستان» تەلەراديوكورپوراتسياسىنا قاراستى تەلەارنالاردا قىزمەت اتقارىپ ءجۇر.
اقەركە قابدۇلكاكىم,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
