مەملەكەت باسشىسى گەرمانيا بۋندەسراتىنىڭ پرەزيدەنتىمەن كەزدەستى

پرەزيدەنت گەرمانيانى قازاقستاننىڭ ەۋروپا وداعىنداعى نەگىزگى ستراتەگيالىق سەرىكتەسى رەتىندە اتاپ, بۇل ەل ەكونوميكامىزدىڭ جەتەكشى ينۆەستورىنىڭ ءبىرى سانالاتىنىن ايتتى.

«گەرمانيا – ءبىز ءۇشىن ماڭىزدى ەل, ەۋروپاداعى نەگىزگى سەرىكتەسىمىز. سىزدەردىڭ مەملەكەتپەن ىنتىماقتاستىققا ايرىقشا ءمان بەرەمىز. وسى ورايلى ءساتتى پايدالانا وتىرىپ, گەرمانياعا جاساعان ساپارىم تۋرالى ويىممەن بولىسكىم كەلەدى. ءوزىم بۇرىننان جاقسى بىلەتىن شتاينمايەر مىرزامەن كەلىسسوز جۇرگىزدىم. ال پارلامەنتارالىق بايلانىستارعا كەلەتىن بولساق, مەن ىقپالداستىقتىڭ بۇل باعىتىن قولدايمىن», دەدى قازاقستان پرەزيدەنتى.

مەملەكەت باسشىسى مارتەبەلى مەيمانعا ەلىمىزدىڭ ەكونوميكالىق ساياساتىنىڭ باسىم باعىتتارى جايىندا اڭگىمەلەپ بەردى.

«قازىر ءىرى ينفراقۇرىلىمدىق جوبالاردى, تسيفرلاندىرۋ جانە جاساندى ينتەللەكتتى دامىتۋعا كۇش سالۋ كەرەك دەپ ويلايمىز. سونىمەن قاتار كولىك-لوگيستيكا جانە اۋىل شارۋاشىلىعى سالالارىن دا وركەندەتۋ قاجەت», دەدى قاسىم-جومارت توقاەۆ.

پرەزيدەنت قازاقستان سوڭعى جىلدارى اۋقىمدى ساياسي رەفورمالار جۇرگىزگەنىن جەتكىزدى.

«زاڭناماعا, ەڭ اۋەلى, كونستيتۋتسياعا جاسالعان وزگەرىستەر قازاقستاننىڭ جاڭعىرۋ جولىنا تۇبەگەيلى تۇسكەنىن كورسەتەدى. ارينە, رەفورمالار جالعاسىپ جاتىر. قۇقىق قورعاۋ جانە سوت جۇيەسىنە دە وزگەرىستەر ەنگىزىلۋى مۇمكىن. بۇل – وتە ماڭىزدى. بىراق مەملەكەتتىڭ قۇرىلىمى, مەن بۇل جەردە پرەزيدەنتتىك باسقارۋ جۇيەسى تۋرالى ايتىپ وتىرمىن, بۇرىنعى قالپىندا ساقتالادى. ويتكەنى قازىرگىدەي الماعايىپ كەزەڭدە مەملەكەتتىڭ سيپاتى وسىنداي بولۋعا ءتيىس. بۇل ءبىزدىڭ تۇسىنىگىمىزگە ساي كەلەدى», دەدى مەملەكەت باسشىسى.