فوتو: ۇكىمەتتىڭ ءباسپاسوز قىزمەتى
فورۋمدا وتكەن جىلى ەكى ەل اراسىنداعى تاۋار اينالىمىنىڭ 31%-عا ارتىپ, $5,5 ملرد-قا جەتكەنى اتاپ ءوتىلدى. بۇل رەكوردتىق كورسەتكىشتىڭ $3,6 ملرد-ىن قازاقستاندىق ەكسپورت قۇراپ وتىر. بۇگىندە قازاقستاندا فرانتسۋز كاپيتالىنىڭ قاتىسۋىمەن 200-دەن استام كومپانيا بەلسەندى جۇمىس ىستەپ, جالپى ينۆەستيتسيا كولەمى $20 ملرد-قا جاقىنداعان. قازاقستان فرانتسيا ءۇشىن ورتالىق ازياداعى باستى سەرىكتەسكە اينالعان: ايماقپەن جۇرگىزىلەتىن ساۋدانىڭ شامامەن 80%-ى ءبىزدىڭ ەلدىڭ ۇلەسىنە تيەسىلى.
پرەمەر-مينيستر ەكى ەل باسشىلارى اراسىنداعى سەنىمدى قارىم-قاتىناس پەن ساياسي ديالوگتىڭ ارقاسىندا ىنتىماقتاستىق ستراتەگيالىق ارىپتەستىكتىڭ كەڭەيتىلگەن دەڭگەيىنە كوتەرىلگەنىن اتاپ ءوتتى.
«فرانتسيامەن ىنتىماقتاستىق – قازاقستاننىڭ سىرتقى ساياساتىنداعى نەگىزگى باسىمدىقتاردىڭ ءبىرى جانە ەۋروپالىق وداق شەڭبەرىندەگى سەرىكتەستىگىمىزدىڭ اجىراماس بولىگى. ءبىزدىڭ ەلدەرىمىز بەرىك ساياسي بايلانىستارمەن, بەلسەندى ۇكىمەتارالىق جانە پارلامەنتتىك ديالوگپەن, سونداي-اق قارقىندى ساۋدا جانە ينۆەستيتسيالىق ءوزارا ءىس-قيمىلمەن ەرەكشەلەنەتىن بەرىك جانە كوپقىرلى سەرىكتەستىككە يە», دەدى ولجاس بەكتەنوۆ.
ۇكىمەت باسشىسى فورۋم بارىسىندا بىرقاتار ماڭىزدى جوبالارعا توقتالدى:
- قازاقستاننىڭ وڭتۇستىگىندە Total Energies كومپانياسىمەن قۋاتى 1 گۆت بولاتىن جەل ەلەكتر ستانتسياسىن سالۋ;
- Alstom كومپانياسىمەن تەمىرجول سەكتورى بويىنشا جاڭا ينۆەستيتسيالار جانە ءوندىرىستى وقشاۋلاۋ;
- Air Liquide كومپانياسىنىڭ پاۆلودار مۇناي-حيميا زاۋىتىنداعى سۋتەگى ەنەرگەتيكاسى جوباسى;
- Danone, Lactalis جانە Lidea كومپانيالارىنىڭ قاتىسۋىمەن تاماق جانە ءسۇت ونەركاسىبىن دامىتۋ.
ايتا كەتەيىك, قازاقستان ترانسكاسپي حالىقارالىق كولىك ءدالىزىن دامىتۋعا جانە جاساندى ينتەللەكت, فارماتسەۆتيكا, تۋريزم مەن سۋ رەسۋرستارىن باسقارۋ سياقتى سالالاردا ىنتىماقتاستىقتى كەڭەيتۋگە مۇددەلى.
سونىمەن قاتار فورۋمدا ءبىلىم جانە عىلىم سالاسىنداعى سەرىكتەستىكتىڭ جاڭا كەزەڭى دە ءسوز بولدى. استانادا جانە الماتىدا فرانتسۋز مەكتەپتەرى اشىلادى, اباي اتىنداعى قازۇپۋ بازاسىندا Lumière ورتالىعى جانە لوتارينگيا ۋنيۆەرسيتەتىنىڭ فيليالى جۇمىسىن باستايدى.
پرەمەر-مينيستر قازاقستاننىڭ شەتەلدىك ينۆەستورلار ءۇشىن بارىنشا قولايلى احۋال جاساۋعا دايىن ەكەنىن ءبىلدىرىپ, قۇقىقتىق كەپىلدىكتەر, سالىقتىق جەڭىلدىكتەر, ارنايى ەكونوميكالىق ايماقتار مەن احقو مۇمكىندىكتەرىن ەرەكشە اتاپ ءوتتى.
ءىس-شارا قورىتىندىسىندا ەنەرگەتيكا, كولىك, دەنساۋلىق ساقتاۋ جانە سۋ رەسۋرستارى سالالارىنداعى بىرقاتار كەلىسىمگە قول قويۋ جوسپارلانعان.
