تۋريزم سالاسىنداعى بيزنەسكە مەملەكەتتەن قانداي كومەك بەرىلەدى

2022 جىلدىڭ 1 قاڭتارىنان باستاپ تۋريزم سالاسىنداعى كاسىپكەرلىك سۋبەكتىلەرىنە جەتى ءتۇرلى مەملەكەتتىك قولداۋ كورسەتىلەدى. ولار مىنالار:

1. كەلۋ ءتۋريزمىن دامىتۋعا ارنالعان سۋبسيديالار
   وتانداعى تۋروپەراتورلارعا شەتەلدىك تۋريستەردى تارتقانى ءۇشىن ءار ادامعا 15 000 تەڭگە مولشەرىندە قارجىلاي كومەك بەرىلەدى. بۇل ءۇشىن شەتەلدىك ءتۋريستىڭ قازاقستاندا كەمىندە 4 كۇن, 3 ءتۇن تۇرعانى جانە eQonaq جۇيەسىندە تىركەلگەنى راستالۋى قاجەت.

2. بالالارعا ارنالعان اۋە بيلەتتەرىن سۋبسيديالاۋ
   ىشكى ءتۋريزمدى قولداۋ ماقساتىندا 18 جاسقا دەيىنگى بالالار ءۇشىن ەلىمىزدە تەگىن ۇشۋ قاراستىرىلعان. ول ءۇشىن ىشكى تۋريزم سالاسىندا قىزمەت كورسەتەتىن تۋروپەراتوردان تۋر ساتىپ الۋ تالاپ ەتىلەدى. مۇنداي جاعدايدا اۋە بيلەتتەرىنىڭ قۇنى تولىقتاي سۋبسيديالانادى.

3. تاۋ شاڭعىسى كۋرورتتارىنىڭ جابدىقتارى مەن تەحنيكالارىن ساتىپ الۋعا كومەك
   كاسىپكەرلەر اسپالى جولدار, قار تازالاۋ تەحنيكاسى جانە جاساندى قار جاساۋ قۇرالدارىن ساتىپ العاندا مەملەكەت شىعىننىڭ 25%-ىن وتەيدى.

4. جول بويىنداعى سەرۆيس نىساندارىن سالۋعا جۇمسالعان شىعىنداردى وتەۋ
   موتەلدەر, جانارماي قۇيۋ بەكەتتەرى, تاماقتانۋ ورىندارى, ءدارىحانالار جانە باسقا دا قىزمەت كورسەتۋ ورىندارىن سالۋ ءۇشىن جۇمسالعان شىعىنداردىڭ 10%-ى مەملەكەت ەسەبىنەن وتەلەدى.

5. سانيتارلىق-گيگيەنالىق توراپتاردى ۇستاۋعا ارنالعان سۋبسيديا
   تۋريستىك ايماقتاردا, اۆتوموبيل جولدارىنىڭ بويىندا جانە قورعالاتىن تابيعي اۋماقتاردا ورنالاسقان سانيتارلىق-گيگيەنالىق توراپتارعا اي سايىن 83 300 تەڭگە كولەمىندە قارجىلاي قولداۋ بەرىلەدى.

6. تۋريستىك وبەكتىلەردى سالۋ نەمەسە جاڭارتۋ شىعىندارىن وتەۋ
   تۋريستىك قىزمەت كورسەتۋ نىساندارىن جانە تۋريستەرگە قاجەتتى باعىتتاردا سالىناتىن نەمەسە جاڭارتىلاتىن وبەكتىلەردىڭ شىعىندارىنىڭ 10%-ى سۋبسيديالانادى.

7. تۋريستىك اۆتوبۋستاردى ساتىپ الۋعا قارجىلاي وتەماقى
   سىيىمدىلىعى 8 ورىننان جوعارى (جۇرگىزۋشىنى قوسپاعاندا) اۆتوبۋستاردى ساتىپ الۋ كەزىندە شىعىنداردىڭ 25%-ى وتەلەدى. اۆتوبۋس كەمىندە 5 جىل بويى تەك تۋريستىك ماقساتتا پايدالانىلۋى ءتيىس.

اتالعان قولداۋ شارالارى ىشكى تۋريزم اعىنىن كوبەيتۋگە, كاسىپكەرلەرگە تۋريستىك ونىمدەردى دامىتۋعا, ينفراقۇرىلىمدى جاقسارتۋعا جانە قىزمەت ساپاسىن ارتتىرۋعا مۇمكىندىك بەرەدى.

داميرا تولەگەن

ەۇۋ ستۋدەنتى