قورشاعان ورتانى ەندى عانا تانىپ-ءبىلىپ جاتقان بالپاناقتاي بالادان قانداي دا ءبىر اۋرۋ بەلگىلەرىن انىقتاۋ قيىننىڭ-قيىنى. انىقتاعان كۇننىڭ وزىندە كەشە عانا دۇنيە ەسىگىن اشقان بالاعا جىلدام وپەراتسيا جاساۋ اسقان ەپتىلىكتى قاجەت ەتەدى. جاعداي بىلاي بولعان. بالادا الدىمەن ينفەكتسيالىق اۋرۋدىڭ بەلگىلەرىن بايقاعان. ءسابيدىڭ بويىن السىزدىك دەندەپ, ءجيى قۇسقان. سودان بالانىڭ اتا-اناسى ۇرەيلەنىپ دارىگەرگە جۇگىنگەندە, بوبەك اق جەلەڭدىلەردىڭ كوز الدىندا ەسىنەن تانىپتى. بۇل كەز مەديتسينا ماماندارى ءبىر مينۋت تا ۋاقىت جوعالتپاي جەدەل ارەكەت ەتۋگە كىرىسكەن. بالانى كومپيۋتەرلىك توموگرافياعا تۇسىرەدى. ءسابيدىڭ ميىنداعى ۇلكەن ىسىكتى دارىگەرلەر وسىلاي بىردەن انىقتاعان.
مۇنداي كۇردەلى دياگنوزدىڭ ەمى وپەراتسيا ەكەنىن جاقسى بىلەتىن جەزقازعان قالاسى وبلىستىق كوپبەيىندى اۋرۋحانانىڭ نەيروحيرۋرگتەرى بارىنشا جەدەل شەشىم قابىلداعان. قۋانىشقا قاراي, نەيروحيرۋرگيا ءبولىمىنىڭ مەڭگەرۋشىسى ورالبەك مۇستافين, جاس مامان ابۋ دۇيسەنوۆ باستاعان دارىگەرلەر 3 ساعاتقا سوزىعان وتە كۇردەلى وپەراتسيانى ءساتتى جاسادى.
«وپەراتسيادان كەيىنگى كەزەڭ قالىپتى جاعدايدا ءوتتى. بالا ەسىن تەز جيىپ, جاراسى تەز جازىلدى. جاعدايى تۇراقتانىپ, جاقسارا باستاعاننان كەيىن ناۋقاستى ۇيىنە شىعاردىق. ءارى قاراي بالاعا وڭالتۋ كۋرسى قاجەت. قازىر اكە-شەشەسى «انا مەن بالا» ورتالىعىندا جوسپارلى ەم الۋعا دايىندىق ۇستىندە. اسقان دالدىكتى تالاپ ەتەتىن اسا كۇردەلى وتا ءمامس ەسەبىنەن جاسالدى»,دەيدى نەيروحيرۋرگ ابۋ دۇيسەنوۆ.
ۇعىنىڭقى بولۋى ءۇشىن ايتا كەتسەك, ءمامس اياسىندا ەلىمىزدىڭ ءار ايماعىندا كۇن سايىن وسىنداي نەبىر كۇردەلى وپەراتسيالار جاسالادى. ال, 18 جاسقا تولماعان بالالار ءمامس-تە مەملەكەت تاراپىنان ساقتاندىرىلعان.
