اقمولا وبلىسىنىڭ اقكول قالاسىندا تاۋەلسىز قازاقستاننىڭ ءبىرىنشى قورعانىس ءمينيسترىنىڭ ەسكەرتكىشىندە ميتينگ ءوتتى. وعان قۇرلىق اسكەرلەرىنىڭ باس قولباسشىسى گەنەرال-مايور مەرەكە كوشەكباەۆ پەن اسكەري-تەڭىز كۇشتەرىنىڭ باس قولباسشىسى ۆيتسە-ادميرال سەرىك بورامباەۆ, اتقارۋشى بيلىك پەن قوعام وكىلدەرى, قارۋلى كۇشتەردىڭ اسكەري قىزمەتشىلەرى مەن ارداگەرلەرى قاتىستى.
سالتاناتتى راسىمدە ءسوز سويلەۋشىلەر اتى اڭىزعا اينالعان اسكەري قولباسشى ساعادات نۇرماعامبەتوۆتىڭ قازاقستان ارمياسىنىڭ قالىپتاسۋى مەن دامۋىنا قوسقان زور ۇلەسىن, ونىڭ ۇلى وتان سوعىسى جىلدارىنداعى ەرلىگىن جانە بەيبىت ۋاقىتتا وتانعا ءمىنسىز قىزمەتىن اتاپ ءوتتى. باتىردى ءبىر مينۋت ۇنسىزدىكپەن ەسكە الىپ, ونىڭ ەسكەرتكىشكە گۇل سەبەتتەرىن قويدى.
الماتىدا ساعادات نۇرماعامبەتوۆ تۇرعان ۇيدەگى مەموريالدىق تاقتادا قولباسشىلىقتىڭ, گارنيزون اسكەري قىزمەتشىلەرىنىڭ, اكىمدىك وكىلدەرىنىڭ, زامانداستارىنىڭ, ارداگەرلەردىڭ, وقىتۋشىلاردىڭ, جوعارى اسكەري وقۋ ورىندارىنىڭ كۋرسانتتارىنىڭ جانە باتىردىڭ قىزى ايسۇلۋ نۇرماعامبەتوۆانىڭ قاتىسۋىمەن جيىن ءوتتى.
ۇلى جەڭىستىڭ 80 جىلدىعىنا وراي استانا مەن ماسكەۋدە اسكەري شەرۋلەر ءوتتى. دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەەۆ كەڭەستىك كەزەڭدە 1965, 1985, 1990 جىلدارى ساعادات قوجاحمەت ۇلى جەڭىس پارادىن ءوزى باسقارعانىن ەسكە سالدى. كەيىنگى جىلدارى, 1995 جىلدان باستاپ, مۇنداي شەرۋلەردى ول تاۋەلسىز قازاقستاندا ۇيىمداستىردى.
– مەنىڭ اكەم ارقاشان اعا بۋىننىڭ, ونىمەن بىرگە قىزمەت ەتكەن ادامداردىڭ جادىندا قالادى. وسكەلەڭ ۇرپاق ءۇشىن ول ءوز وتانىن سۇيەتىن ناعىز ازاماتتىڭ ۇلگىسى. ارميا ونىڭ ءۇيى, ەكىنشى تىنىسى بولاتىن. ول اتاق ءۇشىن ەمەس, ەلى ءۇشىن قىزمەت ەتتى, – دەدى ايسۇلۋ ساعاداتقىزى.
جينالعاندار ەسكەرتكىش تاقتاعا گۇل شوقتارىن قويدى. اسكەري وركەستردىڭ ۇنىمەن دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى, اسكەري وقۋ ورىندارى مەن اسكەري-تەحنيكالىق مەكتەپتىڭ كۋرسانتتارى سالتاناتتى مارشپەن ءجۇرىپ ءوتتى.
مۇنداي شارا اسكەر قولباسشىسى ساعادات نۇرماعامبەتوۆ جەرلەگەن كەڭساي زيراتىندا دا ءوتتى. كەڭەس وداعىنىڭ باتىرى, حالىق قاھارمانىنىڭ قابىرىنىڭ جانىنداعى ەسكەرتكىشتە اسكەري قىزمەتشىلەر ونىڭ مەملەكەتتىك ناگرادالارىنىڭ كوشىرمەلەرىن ورناتتى.
جامبىل وبلىسىنىڭ گۆاردەيسك گارنيزونىندا ساعادات نۇرماعامبەتوۆ اتىنداعى ساياباقتا ميتينگ ءوتىپ, اتى اڭىزعا اينالعان قولباسشىنىڭ بيۋستىنە گۇل سەبەتتەرى قويىلدى. قاتىسۋشىلار باتىردى ءبىر مينۋت ۇنسىزدىكپەن ەسكە الدى. وتاننىڭ اڭىزعا اينالعان ۇلىنىڭ قۇرمەتىنە ساليۋت كومانداسى قارۋمەن سالتاناتتى تۇردە دۇركىندەتىپ وق اتتى.
استانا مەن الماتىداعى رەسپۋبليكالىق ماڭىزى بار قالالاردا اسكەري كوللەدجدىڭ جانە قۇرلىق اسكەرلەرى اسكەري ينستيتۋتىنىڭ باسشىلىعى, جەكە قۇرامى ارميا گەنەرالى ساعادات نۇرماعامبەتوۆتىڭ بيۋستىنە گۇل شوقتارىن قويدى.
ۇلى وتان سوعىسىنىڭ باتىرىن ەسكە الۋ ءۇشىن اسكەري بولىمدەردە ونىڭ ءومىرى مەن جاۋىنگەرلىك جولى تۋرالى دەرەكتى ءفيلمدى تاماشالاۋ شارالارى ءوتتى. اسكەري جوعارى وقۋ ورىندارىنىڭ كۋرسانتتىق بولىمشەلەرىندە جەڭىمپازدار ءداۋىرىنىڭ داڭقتى وكىلى, ناعىز پاتريوت ساعادات نۇرماعامبەتوۆ تۋرالى ولەڭدەردى ورىنداۋدان چەللەندجدەر ۇيىمداستىرىلدى.
