فوتو: ونەركاسىپ جانە قۇرىلىس مينيسترلىگى
ايتا كەتەلىك, قۇرىلىس سالاسى ەلىمىزدىڭ ەكونوميكاسىنىڭ نەگىزگى سالالارىنىڭ ءبىرى.
«2024 جىلى رەسپۋبليكا كولەمىندە 170 مىڭنان استام تۇرعىن ءۇي پايدالانۋعا بەرىلدى. مەملەكەتتىك ينۆەستيتسيالار ارقىلى 30 مىڭنان اسا پاتەر سالىندى, سونداي-اق 9 مىڭعا جۋىق جەڭىلدەتىلگەن زايم بەرىلدى. بيىلعى جىلى دا تۇرعىن ءۇي سالۋدى جالعاستىرۋ جانە ازاماتتاردى تۇرعىن ۇيمەن قامتاماسىز ەتۋدىڭ قوسىمشا شارالارىن ەنگىزۋ جوسپارلانعان. سونىڭ اياسىندا كرەديتتىك باعدارلامامەن 12 مىڭ پاتەر سالۋ جانە 5 مىڭنان استام جالعا بەرىلەتىن تۇرعىن ءۇي ساتىپ الۋ كوزدەلىپ وتىر», اتاپ ءوتتى ب.جۇنىسبەكوۆ.
قازىرگى ۋاقىتتا ەلىمىزدە تۇرعىن ءۇي كەزەگىندە 650 مىڭنان استام ادام بار. بۇل ازاماتتارعا جالعا بەرىلەتىن تۇرعىن ءۇي ساتىپ الۋ قۇقىعىمەن بەرىلەدى, ونىڭ كەمىندە 20%-ى جەتىم بالالارعا تيەسىلى.
2022 جىلدان باستاپ تۇرعىن ءۇيدى جالداۋ قۇنىنىڭ 50%-ىن سۋبسيديالاۋ ەنگىزىلدى, بۇل ءبىرىنشى جانە ەكىنشى توپتاعى مۇگەدەكتەر, جەتىم بالالار, كوپبالالى وتباسىلار سياقتى توپتارعا باعىتتالعان. بۇگىندە 11 مىڭعا جۋىق وتباسى تۇرعىن ءۇيدى جالعا الۋ بويىنشا مەملەكەتتىك قولداۋ الادى.
ونەركاسىپ جانە قۇرىلىس مينيسترلىگىنىڭ ءباسپاسوز قىزمەتىنىڭ مالىمدەۋىنشە اكىمدىكتەر تۇرعىن ءۇي سەرتيفيكاتتارى ارقىلى يپوتەكالىق نەسيەلەردىڭ باستاپقى جارناسىن جابۋعا كومەكتەسەدى. وتكەن جىلى 2300-دەن استام, ال بيىلعى جىلدىڭ العاشقى توقسانىندا 500-دەن استام سەرتيفيكات بەرىلگەن.
تۇرعىن ءۇي جاعدايىن جاقسارتۋعا مەملەكەتتىك قولداۋدىڭ قوسىمشا شاراسى – جەڭىلدەتىلگەن يپوتەكالىق نەسيەلەر بەرۋ. كەزەكتە تۇرعان ازاماتتارعا 2% جانە 5% مولشەرلەمەسى بويىنشا زايمدار بەرىلەدى. 2024 جىلى 3800-دەن استام ادام جەڭىلدەتىلگەن زايم السا, بيىلعى ءتورت ايدا 950-دەن استام ادام تۇرعىن ءۇي ساتىپ الۋ ءۇشىن زايم الدى.
«ناۋرىز» يپوتەكالىق باعدارلاماسى اياسىندا الەۋمەتتىك وسال توپتار ءۇشىن جىل سايىن 12 مىڭ زايم بەرىلۋ جوسپارلانعان, ال بيىلعى ءتورت ايدا 1 500-دەن استام ادام بۇل باعدارلامانىڭ ارتىقشىلىعىن پايدالاندى.
سونداي-اق, تۇرعىن ءۇي ساياساتىن رەفورمالاۋعا باعىتتالعان زاڭناماعا دا تۇزەتۋلەر ەنگىزىلدى. ەندى تۇرعىن ءۇي كەزەككە تىركەلگەن كۇنى مەن وتباسىنىڭ تابىس دەڭگەيىن ەسكەرە وتىرىپ بولىنەتىن بولادى.
