ارۋجان ساكەن – كوكشەتاۋ قالاسى-نىڭ تۋماسى. وبلىس ورتالىعىنداعى ازاماتتىق قورعانىس جوعارى كوپسالالى كوللەدجىنىڭ تۇلەگى. ۇلتتىق ۇلاننىڭ «ورتالىق» وڭىرلىك قولباسشىلىعىنا قاراستى 5510 اسكەري ءبولىمىنىڭ جاۋىنگەرى. نەگىزگى قىزمەتى – تۇرمەدەگى باقىلاۋ پۋنكتىندە.
– ارۋجان بىرلىكقىزى, – دەيمىز ءبىز, – جۇمىسىڭىز جاۋاپكەرشىلىكتى تالاپ ەتەدى ءارى مۇنداي جەردە جۇمىس ىستەۋ دە وڭاي ەمەس شىعار, اسكەري جۇمىستى قالاۋىڭىزعا نە سەبەپ؟
– وتباسىنداعى ءتالىم-تاربيەدەن شىعار, اتام ساكەن دە, اكەم بىرلىك تە اسكەري ادامدار بولعان. اتام ەكىنشى دۇنيەجۇزىلىك سوعىس ارداگەرى, مايدانداعى ەرلىك ءىسى تۋرالى دەرەكتەر تۋعان جەرى زەرەندى اۋدانىنداعى يگىلىك اۋىلىنىڭ ورتا مەكتەبىندە ساقتالىپ, جاس ۇرپاققا ۇلگى بولىپ تۇر. ءبىز دە ەل قورعاعان ەرلەردىڭ ىسىنەن تاعىلىم الىپ وستىك. اكەمنىڭ ءىنىسى ۋاحيت ءمۇتاللاپوۆ تا – سوعىس ارداگەرى. ارۋاعى رازى بولسىن دەپ ءبىراۋىز ءسوز ايتا كەتەيىنشى. ۋاحيت اتام سول زاماندا باستاۋىش ءبىلىم العان ادام بولىپتى. يگىلىك ۇجىمشارىندا ەڭبەك ەتكەن. 1939 جىلى مىندەتتى اسكەري بورىشىن وتەۋگە شاقىرىلعان. اق فيندەردىڭ سوعىسىنا قاتىسىپتى. مايداندا مينومەتشى بولسا كەرەك. سول سوعىستا ءبىر ۆزۆود جاۋ سولداتىن مينومەتپەن اتىپ, قۇرتىپ جىبەرگەن. بۇل ەرلىك ءىسى تۋرالى ديۆيزيا كومانديرى اكەسى مۇتاللاپقا حات جازىپ, ۇلىنىڭ ەرلىگىن حابارلاسا كەرەك. سول تۇستاعى اۋداندىق گازەتكە اتامنىڭ ەرلىگى تۋرالى ماقالا شىعىپتى. كونەكوز قاريالار ايتىپ وتىراتىن. ەل ەگىس باسىندا جۇرگەندە جاقسىلىق حابار جەتكەن عوي. مايدان دالاسىنان كەلگەن حاتتى دا, اۋداندىق گازەتكە شىققان ماقالانى دا قۇداش اتا وقىپ بەرىپتى. ماقالادا ديۆيزيا جاۋىنگەرلەرىنىڭ الدىندا ۋاحيت اتاما العىس جاريالانعانى ايتىلعان ەكەن. سول ۇرىستا اتامنىڭ شينەلىن ون ەكى جەردەن وق تەسىپ وتكەن. ايتەۋىر امان قالىپتى. سوعىستان كەيىن حالىق شارۋاشىلىعىن قالپىنا كەلتىرۋگە قاتىستى. تىڭ يگەرۋ كەزىندە ناتي تراكتورىمەن جۇمىس ىستەپ, الدەنەشە رەت ماراپاتقا يە بولعان. 1973 جىلى ومىردەن ءوتىپتى. مىنە, وسىنداي اتالاردىڭ ارۋاقتى جولىن جالعاستىرايىن دەگەن ارمان ءسابي كوكىرەگىمدە ءبۇر جارعان ەدى, – دەدى كەيىپكەرىمىز.
ارۋجاننىڭ ايتۋىنا قاراعاندا, وسى ماماندىقتى تاڭداۋىنا اكەسى قارسى بولسا كەرەك. ءوزى دە اسكەري ءومىردىڭ تەزىنەن وتكەندىكتەن, بۇل جۇمىس قىزىنا لايىقتى بولمايدى دەپ ويلاعان بولار. العان بەتىنەن قايتپايتىن ارۋجان اتالار سالعان سوقپاقپەن ءجۇرىپ كەلەدى. ارينە, اكەسىنىڭ قارسىلىعىن باۋىر ەتى بالاسىنا دەگەن ماحاببات دەپ تۇسىنەدى.
ءوز ايتۋىنا قاراعاندا, كۇندەلىكتى قىزمەتتە الىپ بارا جاتقان قيىندىق جوق. باقىلاۋ پۋنكتى ارقىلى وتەتىن جازاسىن وتەۋشىلەردى مۇقيات تەكسەرەدى. مۇندايدا قىراعىلىق قاجەت. تۇرلەرى سۇستى, ءبىر وڭكەي ەر ادامداردى تەكسەرگەن كەزدە بالاڭ جۇرەكتىڭ بۇلك ەتەتىنى دە بار.
– مۇنداعى ءتارتىپ قاتاڭ, – دەيدى كەيىپكەرىمىز, – بىراق مەن قاتاڭ تارتىپكە ۇيرەنگەن اداممىن. اسكەريلەردىڭ وتباسىندا وسكەندىكتەن بالا كەزىمنەن بار جاۋاپكەرشىلىكتى جۇرەگىممەن سەزىنىپ, جولدان تايماي تۋرا جۇرۋگە ۇيرەنگەنمىن.
ەندىگى ارمانى – جوعارى وقۋ ورنىن اياقتاپ, وفيتسەرلىك شەن الۋ. قازىر وبلىس ورتالىعىنداعى جوعارى وقۋ ورنىندا سىرتتاي وقىپ ءجۇر. قىزمەتى مەن وقۋىن ورايلاستىرۋدا ەش قيىندىق جوق. بارلىعى مۇمكىندىگىنشە جوسپارلى تۇردە اتقارىلاتىندىقتان ىلكىمدى ۇيلەستىرە بىلەدى.
كوكشەتاۋ
