بۇل ماراپاتتاردى ۆەدومستۆو باسشىسى عاني بەيسەمباەۆ تابىستاپ, اۋىل بالالارىنىڭ سپورتتاعى جەتىستىكتەرىنە شىنايى قۇرمەت كورسەتتى. ءمينيستردىڭ ايتۋىنشا, بۇل – اۋىل جاستارىنىڭ قاجىرلى ەڭبەگىنە بەرىلگەن ءادىل باعا.
سالتاناتتى ساتتە جاسوسپىرىمدەردىڭ قۋانىشى كوزدەرىنەن بايقالدى. سەربيادا وتكەن GYMNASIADE U15 حالىقارالىق جارىسىنىڭ جەڭىمپازى نۇرتاس ءالىمباي العان اسەرىن ءبولىستى.
«AUYLSPORT جوباسى ارقىلى بۇرىن تەك ارمان بولىپ كورىنگەن دۇنيەلەر شىندىققا اينالدى. ءمينيستردىڭ قولىنان ماراپات الۋ – مەن ءۇشىن قول جەتپەيتىندەي بيىك ەدى. بۇگىن سول ارمان ورىندالدى. بۇل – مەن سەكىلدى مىڭداعان اۋىل بالاسىنىڭ ۇمىتىنە جول اشقان جوبا», دەدى جاس سپورتشى.
2024 جىلى ىسكە قوسىلعان AUYLSPORT جوباسى قىسقا ۋاقىت ىشىندە ەلىمىزدىڭ بارلىق وڭىرىنەن كەڭ قولداۋ تاپتى. بۇگىندە 10 مىڭنان استام بالا وسى باستاما اياسىندا جۇيەلى تۇردە سپورتپەن اينالىسىپ ءجۇر. سەربيادا وتكەن گيمنازيادادا قازاقستان قۇراماسى ساپىندا سىنعا تۇسكەن 22 سپورتشىنىڭ 12-ءسى – وسى باستامانىڭ جەمىسى بولىپ وتىر.
«مينيسترلىك تاراپىنان بەرىلگەن بۇل ماراپات – AUYLSPORT جوباسىنىڭ جاڭا دەڭگەيگە كوتەرىلگەنىنىڭ ايعاعى. بۇل – اۋىلداعى دارىندى جاسوسپىرىمدەردىڭ بولاشاعىنا سەنىم ارتۋدىڭ كورىنىسى. بۇل قۇرمەت – بولاشاق جەڭىستەرگە باستايتىن بەرىك نەگىز», دەدى Halyk قورىنىڭ اتقارۋشى ديرەكتورى عالىمبەك جاقسىلىقوۆ.
AUYLSPORT – اۋىل جاستارىنا ارنالعان سپورت سەكتسياسى عانا ەمەس, ولاردىڭ ءومىرىن وزگەرتەتىن جاڭا باعدار. جوبا بەلگىلى مەتسەنات تيمۋر ق ۇلىباەۆتىڭ باستاماسىمەن قولعا الىنعان. العاشقى كەزەڭدە 200 اۋىلدان 12 مىڭنان استام بالا قاتىسقان. Halyk قورى اۋىل سپورتىنىڭ دامۋىنا 500 ميلليون تەڭگەگە جۋىق قارجى باعىتتاعان.
