بۇل – بازالىق ستانتسيا مەن كوشە شامىنىڭ قىزمەتىن بىرىكتىرەتىن زاماناۋي ينجەنەرلىك شەشىم. بولاشاقتا مۇنداي قۇرىلىمدار بەينەباقىلاۋ جۇيەسىمەن دە جابدىقتالۋى مۇمكىن. جوبا Huawei كومپانياسىنىڭ باستاماسىمەن, الماتى وبلىسىنىڭ تسيفرلىق تەحنولوگيالار باسقارماسى مەن «كار-تەل» جشس (Beeline ساۋدا بەلگىسى) اراسىنداعى ءوزارا ىنتىماقتاستىق تۋرالى مەموراندۋم اياسىندا جۇزەگە اسىرىلدى.
ءداستۇرلى انتەننالاردان ايىرماشىلىعى — كولەمدى ءارى كوزگە ۇرمايتىن بۇل تىرەك ىقشام ءارى فۋنكتسيونالدى ديزاينمەن ەرەكشەلەنەدى. ول ەلدى مەكەننىڭ كەلبەتىنە ۇيلەسىمدى ەنىپ, بىرنەشە فۋنكتسيانى قاتار اتقارادى: بايلانىس وپەراتورلارىنىڭ جابدىقتارىن ورنالاستىرۋعا مۇمكىندىك بەرىپ, كوشە جارىعىمەن قامتاماسىز ەتەدى. بۇل – اۋىلدىق جانە قالالىق ينفراقۇرىلىم ءۇشىن ءتيىمدى شەشىم.
قوس فۋنكتسيالى تىرەكتىڭ باستى ارتىقشىلىقتارىنىڭ ءبىرى – ورناتۋ مەرزىمىنىڭ قىسقالىعى. ەگەر ستاندارتتى بايلانىس مۇناراسىن سالۋ التى ايدان استام ۋاقىتتى السا, بۇل قۇرىلىم نەبارى ءبىر اي ىشىندە ورناتىلادى. بۇل, اسىرەسە, ءموبيلدى بايلانىستى جاقسارتۋ مەن بەينەباقىلاۋ جۇيەسىن ەنگىزۋ اسا قاجەت وڭىرلەر ءۇشىن ماڭىزدى.
«كار-تەل» جشس-ءنىڭ تەحنيكالىق ديرەكتورى ولەگ سنيمششيكوۆتىڭ ايتۋىنشا, بۇل جوبانىڭ بولاشاعى زور: «مۇنداي تىرەكتەردى بۇكىل الماتى وبلىسىنا ەنگىزۋدى جوسپارلاپ وتىرمىز. بۇل, اسىرەسە, اۋىلدىق جەرلەردە بايلانىس ساپاسىن ارتتىرىپ, ءوڭىردىڭ تسيفرلىق ينفراقۇرىلىمىنىڭ ماڭىزدى بولىگىنە اينالادى», — دەدى ول.
قوس فۋنكتسيالى تىرەك تەك بايلانىس ءۇشىن ەمەس, قوعامدىق كەڭىستىكتەردى جارىقتاندىرۋ ارقىلى تۇنگى قاۋىپسىزدىكتى قامتاماسىز ەتەدى. الداعى ۋاقىتتا مۇنداي قۇرىلىمدارعا بەينەباقىلاۋ كامەرالارىن ورناتۋ ارقىلى جەرگىلىكتى بيلىك كوشەلەردەگى جاعدايدى باقىلاپ, قوعامدىق قاۋىپسىزدىكتى ارتتىرا الادى. وسىلايشا, تىرەك — اقىلدى ءارى كوپفۋنكتسيونالدى قوعامدىق كەڭىستىكتىڭ ءبىر بولىگىنە اينالادى.
اۋىلدىق جەرلەردە جەكە ينفراقۇرىلىم تارتۋعا مۇمكىندىك بولا بەرمەيتىن جاعدايدا مۇنداي شەشىمدەر اسا وزەكتى. كەشەندى ءتاسىل رەسۋرستاردى ۇنەمدەۋگە جانە زاماناۋي تەحنولوگيالاردى ەڭ قاجەت جەرلەرگە ەنگىزۋگە سەپتىگىن تيگىزەدى.
Huawei Technologies Kazakhstan كومپانياسى اتاپ ءوتتى: ء«بىز ارقاشان تەحنولوگيالاردى ادامدارعا جاقىنداتۋعا تىرىسامىز. كوشەنى جارىقتاندىرىپ, بايلانىس سيگنالىن كۇشەيتەتىن تىرەك – بۇل فۋتۋريزم ەمەس, جايلى ءارى زاماناۋي ءومىر ءسۇرۋ سالتىنا جاسالعان ناقتى قادام. ەڭ باستىسى – بۇل قادام بەساعاش سەكىلدى اۋىلداردان باستالۋى ءبىز ءۇشىن ماڭىزدى».
قازىرگى تاڭدا وسىنداي تىرەك الماتى قالاسىندا دا ورناتىلىپ جاتىر — ىسكە قوسۋ مامىر ايىنا جوسپارلانعان. بۇل جوبا تەك اۋىلدىق ەمەس, مەگاپوليس جاعدايىندا دا قولدانۋعا بولاتىنىن كورسەتەدى.
سونىمەن قاتار, بۇل پيلوتتىق جوبا مەملەكەت پەن بيزنەس اراسىنداعى جاڭا فورماتتاعى سەرىكتەستىككە جول اشادى. مۇنداي باستامالار تەحنولوگيالىق دامۋعا عانا ەمەس, سونىمەن قاتار جاڭا جۇمىس ورىندارىن قۇرۋعا, حالىقتىڭ تسيفرلىق ساۋاتتىلىعىن ارتتىرۋعا جانە جەرگىلىكتى قاۋىمداستىقتاردى دامىتۋعا ىقپال ەتەدى.
بەساعاش اۋىلىنداعى جوبا – زاماناۋي تەحنولوگيالىق شەشىمدەردى جىلدام, ساپالى جانە قورشاعان ورتانىڭ ەستەتيكاسىن ەسكەرە وتىرىپ ىسكە اسىرۋعا بولاتىندىعىن دالەلدەيتىن مەملەكەتتىك جانە جەكە سەكتوردىڭ بىرلەسكەن جۇمىسىنىڭ جارقىن مىسالى.
الماتى وبلىسى.
