2017 جىلدان باستاپ قازاقستان رەسمي تۇردە حالقى قارتايىپ جاتقان ەلدەردىڭ قاتارىنا كىردى. بۇگىندە 65 جاستان اسقان ادامدار حالىقتىڭ 9,2%-ىن قۇرايدى – بۇل شامامەن 1,87 ميلليون ادام. سالىستىرار بولساق, 2020 جىلى بۇل كورسەتكىش 6,8% بولعان.
قارتتارىمىزعا قامقورلىق كورسەتۋ, بەلسەندى جانە ءماندى ءومىر ءسۇرۋ ءۇشىن جاعداي جاساۋ – مەملەكەتتىك الەۋمەتتىك ساياساتتىڭ باسىم باعىتتارىنىڭ ءبىرى. سول سەبەپتى 2020 جىلى رەسپۋبليكادا العاشقى بەلسەندى ۇزاق ءومىر ءسۇرۋ ورتالىعى اشىلدى. 2021 جىلى اعا بۋىن ازاماتتارىنىڭ جاعدايىن جاقسارتۋ جونىندەگى 2025 جىلعا دەيىنگى «بەلسەندى ۇزاق ءومىر ءسۇرۋ» ءىس-شارالار جوسپارى قابىلداندى. ونىڭ اياسىندا زاڭناماعا وزگەرىستەر ەنگىزىلىپ, ۆەدومستۆوارالىق كوميسسيا قۇرىلدى جانە بەلسەندى ۇزاق ءومىر ءسۇرۋ يندەكسى ەسەپتەلدى.
بەلسەندى ۇزاق ءومىر ءسۇرۋ ورتالىقتارى ء«بىر تەرەزە» قاعيداتى بويىنشا ءۇش باعىتتا جۇمىس ىستەيدى: بەلسەندى ۇزاق ءومىر, دەنساۋلىق مادەنيەتى جانە قوعاممەن بايلانىس. ءبۇوو-نىڭ قىزمەتى ەگدە جاستاعى ادامداردىڭ ءومىر ءسۇرۋ ساپاسىن جاقسارتۋعا, ءونىمدى جانە بەلسەندى ۇزاق ءومىر ءسۇرۋدى ىنتالاندىرۋعا, ونىڭ ىشىندە جۇيەلى بوس ۋاقىتتى ۇيىمداستىرۋعا (يوگا, سكانديناۆيالىق ءجۇرىس, تسيفرلىق ساۋاتتىلىقتى ارتتىرۋ, موتيۆاتسيالىق جانە كاسىپكەرلىك كۋرستار, اعىلشىن ءتىلى كۋرستارى جانە ت.ب.), ەگدە جاستاعى ادامداردىڭ ەركىندىگىن قامتاماسىز ەتۋگە, قازاقستاندىق قوعامنىڭ ومىرىنە قاتىسۋعا باعىتتالعان.
ورتالىقتار جۇمىسىن باستاعالى بەرى 20 مىڭنان استام ءىس-شارا وتكىزىلدى, 3,8 مىڭنان استام قىزمەت كورسەتىلدى – ولاردىڭ قاتارىندا مەديتسينالىق, پسيحولوگيالىق, مادەني جانە ءبىلىم بەرۋ قىزمەتتەرى بار. مۇنىڭ ءبارى ەگدە جاستاعى ادامدارعا بەلسەندى بولۋعا, دەنساۋلىق پەن كوڭىل-كۇيدى جاقسارتۋعا كومەكتەسەدى.
ناتيجەلەرى دە كوڭىل قۋانتادى – ءبۇوو قىزمەت الۋشىلارى حالىقارالىق بايقاۋلارعا قاتىسىپ, جۇلدەلى ورىندارعا يە بولۋدا. مىسالى, «الماتى اجەلەرى» ۇجىمى يتالياداعى ءسان اپتالىعىندا قازاقستاننىڭ اتىنان قاتىسىپ, تۇركيا مەن قىرعىزستانداعى ەتنوفەستيۆالدەردە جەڭىسكە جەتتى.
