رەسپۋبليكالىق اشىق تۋرنيرگە تۇركىستان, الماتى, قاراعاندى, جامبىل, قوستاناي وبلىستارى مەن شىمكەنت قالاسى, قازىعۇرت اۋدانىنىڭ ۇزدىك شاباندوزدارى قاتىسىپ, باق سىنادى.
– وتكەن عاسىردىڭ 70-جىلدارىنان باستاپ, 1984 جىلعا دەيىن ەكى جىلدا ءبىر رەت, ودان سوڭ 1991 جىلعا دەيىن ءتورت جىلدا ءبىر دۇركىن بۇكىلوداقتىق ات سپورتى ويىندارى ۇيىمداستىرىلىپ, كوكپاردان كسرو چەمپيوناتى ءوتىپ تۇراتىن. سول چەمپيوناتتارعا 1980 جىلدان باستاپ ەلىمىزدىڭ كوكپار قۇراماسىنىڭ كاپيتانى رەتىندە 1991 جىلعا دەيىن ۇزبەي قاتىسىپ, توعىز دۇركىن كسرو چەمپيونى اتاعىنا قول جەتكىزدىم. اتالعان جارىسقا ۇزبەي قاتىسقان مەنەن باسقا قازاق جوق, – دەيدى ءابىلحان داۋىلباەۆ.
باسەكەگە قاتىسقان 8 كوماندا ءۇش كۇن بويى باس جۇلدەنى ءوزارا ساراپقا سالدى. تارتىستى وتكەن سايىس ناتيجەسىندە ءتورتىنشى ورىندى الماتى وبلىسىنىڭ كومانداسى يەلەنىپ, تەمىر تۇلپارعا يە بولدى. قولا جۇلدە شىمكەنت قالاسىنىڭ قۇراماسىنا بۇيىرىپ, شاباندوزدار 2 ملن تەڭگە كولەمىندەگى قارجىلاي سىياقىنى قانجىعالارىنا بايلادى. ەكىنشى ورىندى ەنشىلەگەن تۇركىستان وبلىسىنىڭ كوكپارشىلارىنا 3 ملن تەڭگە كولەمىندە جۇلدە تابىس ەتىلدى. ۇلتتىق ويىننىڭ مايتالماندارى – جامبىل وبلىسىنىڭ قۇراماسى باس جۇلدەگە قول جەتكىزىپ, 5 ملن تەڭگە قارجىلاي سىيلىققا يە بولدى. «ۇزدىك ويىنشى» اتالىمىنا جامبىل وبلىسىنىڭ شاباندوزى ەرعالىم جاقسىلىق لايىقتى دەپ تانىلسا, شىمكەنت قالاسىنىڭ ويىنشىسى ادىلەت مامىت «ۇزدىك قورعاۋشى», تۇركىستاندىق ابىلايحان نىشانبەكوۆ «ۇزدىك شابۋىلشى» اتالىمىمەن ماراپاتتالدى. شاردارادان كەلگەن سەيفۋللا نۇرحالىقوۆتىڭ «سايان» اتتى تۇلپارى «ۇزدىك سايگ ۇلىك» اتاندى.
تۇركىستان وبلىسى
