كونفەرەنتسيادا سۋ تاپشىلىعى, ترانسشەكارالىق سۋ رەسۋرستارىن ءتيىمدى باسقارۋ, جانە وڭىرلىك ىنتىماقتاستىقتى نىعايتۋ ماسەلەلەرى تالقىلاندى. جيىننىڭ اشىلۋ سالتاناتىندا «بايتاق» پارتياسىنىڭ توراعاسى ازاماتحان امىرتاەۆ ءسوز سويلەدى.
«باق بەتتەرىندە بولاشاقتا سۋ قاقتىعىستارى ەڭ وتكىر ماسەلەگە اينالادى دەگەن بولجام ايتىلىپ ءجۇر. وسى سەبەپتى بۇگىننەن باستاپ كەلىسسوزدەر جۇرگىزۋ قاجەت. سۋ تاپشىلىعىنىڭ الدىن الۋ ءۇشىن كورشى ەلدەرمەن ءتيىمدى ىنتىماقتاستىق ورناتىپ, رەسۋرستى ۇنەمدەپ پايدالانۋىمىز كەرەك. سوندا بۇل سۋ ءجۇز جىلعا دەيىن جەتۋى مۇمكىن», دەدى ول.
اتالعان كونفەرەنتسيا 2026 جىلى پرەزيدەنت قاسىم-جومارت توقاەۆتىڭ باستاماسىمەن وتەتىن ورتالىق ازيا ەلدەرىنىڭ وڭىرلىك كليماتتىق سامميتىنە ماڭىزدى ساياسي جانە مازمۇندىق نەگىز بولادى. ءىس-شارادا اۋعانستاندا سالىنىپ جاتقان كوش-تەپە كانالىنا ەرەكشە نازار اۋدارىلدى. بۇل جوبانىڭ ىسكە اسۋى ءامۋداريا وزەنىنىڭ تومەنگى اعىسىنداعى وزبەكستان مەن تۇرىكمەنستانعا اسەر ەتۋى مۇمكىن. ال بۇل ءوز كەزەگىندە قازاقستاننىڭ دا سۋ رەسۋرستارىنا قىسىم ءتۇسىرۋى ىقتيمال.
ء«امۋداريا سۋىنىڭ 25–30%-ى كوش-تەپە كانالىنا تارتىلۋى مۇمكىن. بۇل وزبەكستان مەن تۇرىكمەنستاننىڭ سۋ كولەمىنىڭ ازايۋىنا الىپ كەلەدى. ال وزبەكستان سىرداريادان كوبىرەك سۋ الا باستايدى. سونىڭ سالدارىنان قازاقستانعا كەلەتىن سۋ كولەمى 30–40%-عا ازايۋى ىقتيمال. ءبىز بىرەۋدى سىناۋ ءۇشىن ەمەس, تۇسىنىستىك ورناتۋ ءۇشىن جينالدىق. اۋعانستانعا زاماناۋي تەحنولوگيا ارقىلى كومەكتەسۋ – ءبارىمىز ءۇشىن ءتيىمدى شەشىم بولۋى مۇمكىن», دەدى ازاماتحان امىرتاەۆ.
كونفەرەنتسيا بارىسىندا «بايتاق» پارتياسى سۋ قاۋىپسىزدىگىنە قاتىستى وڭىرلىك كەلىسىمدەر مەن عىلىمي-تەحنيكالىق ىنتىماقتاستىقتى دامىتۋ جونىندە ۇسىنىس جاسادى. Green Finance Centre وكىلدەرى ترانسشەكارالىق سۋ جوبالارىن قارجىلاندىرۋ جولدارىن تالقىلادى. باسقوسۋعا قازاقستانداعى تۇركيا, يزرايل, قىرعىز رەسپۋبليكاسى, ۆەنگريا, تاجىكستان, اقش, اۋعانستان, كورەيا رەسپۋبليكاسى, تۇرىكمەنستان جانە وزگە دە ەلدەردىڭ ەلشىلەرى مەن ەلشىلىكتەرىنىڭ وكىلدەرى قاتىستى. جيىنعا سونداي-اق سالالىق مينيسترلىكتەردىڭ وكىلدەرى, وبلىستار مەن رەسپۋبليكالىق ماڭىزى بار قالالار اكىمدىكتەرىنىڭ تابيعي رەسۋرستار جانە تابيعات پايدالانۋدى رەتتەۋ باسقارمالارىنىڭ باسشىلارى, عىلىمي-زەرتتەۋ ينستيتۋتتارى, حالىقارالىق ارالدى قۇتقارۋ قورى, بۇۇ قورشاعان ورتا باعدارلاماسى, قازاق تەحنولوگيا جانە بيزنەس ۋنيۆەرسيتەتى, ءتۇرلى قاۋىمداستىقتار, وتاندىق جانە حالىقارالىق عالىمدار, ساراپشىلار مەن گيدرولوگيا, ەكولوگيا جانە سۋ قۇقىعى سالاسىنىڭ جەتەكشى ماماندارى قاتىستى.
كونفەرەنتسيا سوڭىندا قاتىسۋشىلار سۋ قاۋىپسىزدىگى سالاسىنداعى وڭىرلىك كەلىسىمدەردى نىعايتۋ, عىلىمي زەرتتەۋلەر جۇرگىزۋ, يننوۆاتسيالىق تەحنولوگيالاردى ەنگىزۋ جانە سۋ رەسۋرستارىن ءتيىمدى باسقارۋ سالالارىندا بىرلەسىپ جۇمىس ىستەۋگە ۋاعدالاستى. ءىس-شارا ايماقتىڭ سۋ ماسەلەلەرىن تالقىلاۋ ءۇشىن ماڭىزدى حالىقارالىق الاڭ بولدى.
