فوتو: اشىق دەرەككوزدەن
كومپانيا استانا اۋەجايىن قارجىلاندىرۋدى ءبىر جىلدىق ءجىتى تەكسەرۋدەن كەيىن شەشكەن. كەشەندى تالداۋ كەزىندە اۋەجايدىڭ قازىرگى ۋاقىتتاعى جاي-كۇيىن ەگجەي-تەگجەيلى ساراپتالىپ, اۋەجايدىڭ 2023 جىلعى 14 ملرد تەڭگەدەن استام شىعىنى بار ەكەنى انىقتالعان.
Terminals Astana Airport Limited كومپانياسى وزدەرى باسقارعان 1 جىلدا (2024) اۋەجاي 790 ميلليون تەڭگە كىرىسكە قول جەتكىزگەنىن مالىمدەدى.
«جولاۋشىلار اعىنى 2023 جىلى جىلىنا 7,5 ميلليون جولاۋشىدان 2024 جىلى 8,3 ميلليون جولاۋشىعا دەيىن ءوستى. 2024 جىلى جۇرگىزىلگەن تالداۋ ناتيجەلەرى مەن جوبانىڭ بولاشاعىن ايقىنداعان العاشقى تابىستارعا سۇيەنە وتىرىپ, ءبىز استانا اۋەجايىن دامىتۋعا باعىتتالعان كەشەندى باعدارلامانى جۇزەگە اسىرۋ تۋرالى شەشىم قابىلدادىق. باعدارلاما اياسىندا تىكەلەي ينۆەستيتسيا كولەمى 153 ميلليارد تەڭگەنى قۇرايدى. سونىمەن قاتار, الداعى 25 جىل ىشىندە ءۇشىنشى تاراپتاردان 393 ميلليارد تەڭگەگە دەيىن جاناما ينۆەستيتسيالار تارتۋ كوزدەلىپ وتىر. بۇل قاراجات ينفراقۇرىلىمدى اۋقىمدى تۇردە كەڭەيتۋگە باعىتتالادى», دەلىنگەن كومپانيا حابارلاماسىندا.
قاراجات قايدا ينۆەستيتسيالانادى؟
قاراجات حالىقارالىق قاۋىپسىزدىك جانە تيىمدىلىك ستاندارتتارىنا سايكەس كەلەتىن ۇزىندىعى 3,5 كم قۇرايتىن جاڭا (قوسىمشا) ۇشۋ-قونۋ جولاعىنىڭ قۇرىلىسىنا جۇمسالماق. جاڭا ۇشۋ-قونۋ جولاعى اۋەجايدىڭ وتكىزۋ قابىلەتىن ايتارلىقتاي ارتتىرىپ, ۇشىپ-قونۋ وپەراتسيالارىن قاتار جۇرگىزۋ مۇمكىندىگىن قامتاماسىز ەتەدى.
كومپانيا اۋەجايدىڭ وتكىزۋ قابىلەتىن 2033 جىلعا قاراي جىلىنا 15 ميلليون جولاۋشىعا دەيىن جانە 2053 جىلعا قاراي 30 ميلليون جولاۋشىعا دەيىن ارتتىرۋعا مۇمكىندىك بەرەتىن قولدانىستاعى ت2 جولاۋشىلار تەرمينالىن كەڭەيتىپ, جاڭا حالىقارالىق ت3 تەرمينالىنىڭ قۇرىلىسىن باستاۋدى جوسپارلار وتىر.
2053 جىلعا قاراي جۇك اينالىمىن قازىرگى ماكسيمۋم 12 000 توننادان 130 000 تونناعا دەيىن ۇلعايتۋ ماقساتىندا جۇك تەرمينالى دا جاڭعىرتىلىپ, ونىڭ ىشىندە قويما كەڭىستىگى كەڭەيتىلىپ, زاماناۋي لوگيستيكالىق تەحنولوگيالار ەنگىزىلەدى.
سانى ارتىپ جاتقان رەيستەرگە ۇزدىكسىز قىزمەت كورسەتۋ ماقساتىندا جانار-جاعارماي قۇيۋ كەشەنىنىڭ اۋماعى 5,2-دەن 11,6 گەكتارعا دەيىن ۇلعايتىلادى.
«ينۆەستيتسيالىق باعدارلامامىزدا قوناق ءۇي كەشەندەرىن, ىسكەرلىك جانە ساۋدا ورتالىقتارىن, سونداي-اق زاماناۋي كورمەلەر مەن كونفەرەنتس-زالداردى قامتيتىن Aero City يننوۆاتسيالىق كوپفۋنكتسيونالدى كلاستەرىن قۇرۋعا ەرەكشە كوڭىل بولىنەدى. Aero City جوباسى اۋەجايدىڭ تارتىمدىلىعىن ارتتىرىپ قانا قويماي, جاڭا جۇمىس ورىندارىن اشىپ, بۇكىل ايماقتىڭ ەكونوميكالىق دامۋىنىڭ كاتاليزاتورىنا اينالادى. سونىمەن قاتار, بۇل جوبا ءۇشىنشى تاراپتاردان قوسىمشا ينۆەستيتسيالار تارتۋعا جانە جەرگىلىكتى ەكونوميكانىڭ وسۋىنە ىقپال ەتەدى.بارلىق ينۆەستيتسيالار قازاقستاننىڭ مەملەكەتتىك بيۋدجەتىنىڭ قاراجاتىن پايدالانباي جۇزەگە اسىرىلاتىنىن ەرەكشە اتاپ وتكەن ءجون», دەلىنگەن مينيسترلىك حابارلاماسىندا.
نەگىزگى ينفراقۇرىلىمعا مەنشىك قۇقىعى «نۇرسۇلتان نازارباەۆ حالىقارالىق اۋەجايى» اق-دا قالادى, ال مەملەكەت بيۋدجەتكە تۇراقتى كىرىستەردى الۋدى جالعاستىرادى.
اۋەجايدىڭ بارلىق قىزمەتكەرلەرى كەپىلدەندىرىلگەن تۇراقتى جۇمىسقا ورنالاسۋ ارقىلى ءوز جۇمىستارىن جالعاستىرادى, سونىمەن قاتار قىزمەتكەرلەردى وقىتۋ جانە بىلىكتىلىگىن ارتتىرۋ بويىنشا ارنايى باستامالار دا بار.
