10 مامىر كۇنى ساعات 15:15 شاماسىندا جەتىسۋ وبلىسى كەربۇلاق اۋدانىنا قاراستى كوكسۋ اۋىلىنىڭ ماڭىندا 1989 جىلى تۋعان ازاماتتى ىزدەستىرۋ جۇمىستارى باستالعان. ول شامامەن ساعات 14:00-دە تەمىر ارقان ارقىلى وزەننەن وتپەك بولعان كەزىندە كوكسۋ وزەنىنە قۇلاپ, اعىس الىپ كەتكەن.
11 مامىر كۇنى تاڭعى ساعات 06:30-دان باستاپ اۋقىمدى ىزدەستىرۋ جۇمىستارى ۇيىمداستىرىلدى. وعان تجد قىزمەتكەرلەرى, ورمان شارۋاشىلىعى, جەرگىلىكتى اتقارۋشى ورگاندار, پوليتسيا, اسكەري پوليتسيا جانە قورعانىس مينيسترلىگىنىڭ بولىمشەلەرى جۇمىلدىرىلدى. بارلىعى 98 ادام جانە 22 بىرلىك تەحنيكا, سونىڭ ىشىندە ءجۇزۋ قۇرالدارى, دروندار مەن سپۋتنيكتىك بايلانىس تارتىلدى.
بۇگىن كەربۇلاق اۋدانىندا جوعالعان اسكەري قىزمەتكەردى ىزدەۋ جۇمىستارى اياقتالدى.15 مامىر كۇنى جەتىسۋ وبلىسى كەربۇلاق اۋدانىندا, وقيعا بولعان جەردەن 15 شاقىرىم تومەن قاراي كوكسۋ وزەنىنەن تجد-نىڭ وپەراتيۆتى-قۇتقارۋ جاساعىنىڭ قۇتقارۋشىلارى ەر ادامنىڭ دەنەسىن سۋدان تاۋىپ, جاعاعا شىعاردى. تابىلعان كەزدە ۇستىندە كيىمنىڭ ءبىر بولىگى بولعان. مارقۇمنىڭ دەنەسى پوليتسيا قىزمەتكەرلەرىنە تابىستالىپ, سوت-مەديتسينالىق ساراپتاما تاعايىندالدى.
ىزدەۋ-قۇتقارۋ جۇمىستارى بىرنەشە كۇن بويى تابيعي جانە اۋا رايىنىڭ كۇردەلى جاعدايىندا جۇرگىزىلدى. وپەراتسياعا بارلىعى جۇزگە جۋىق ادام جانە 22 تەحنيكا بىرلىگى جۇمىلدىرىلدى. ونىڭ ىشىندە تجد كۇشتەرى, اسكەري پوليتسيا, پوليتسيا دەپارتامەنتى, جەرگىلىكتى اتقارۋشى ورگاندار, ورمان شارۋاشىلىعى, اسكەري بولىمدەر جانە مارقۇمنىڭ تۋىستارى قاتىستى.
