شىمكەنت قالالىق دەنساۋلىق ساقتاۋ باسقارماسىنىڭ مالىمدەۋىنشە جۋىردا شەت ەلدەردە وتا جاساتىپ, ەم قابىلداعان بىراق ەشقانداي ناتيجە كورمەگەن 33 جاستاعى ناۋقاسقا شاھارداعى №1 كلينيكالىق اۋرۋحانا دارىگەرلەرى قايتادان كۇردەلى وپەراتسيا جاساپتى. بىلىكتى ماماندار ناۋقاستىڭ ءىش قۋىسىنداعى ۇلكەن ىسىكتى ليمفا تامىرلارىن زاقىمداماستان حيرۋرگيالىق جولمەن الىپ تاستاعان. سونىڭ ناتيجەسىندە ناۋقاس ومىرگە قايتا كەلگەندەي بولدى. ويتكەنى بۇل ىسىك ونىڭ دەنساۋلىعىنا ومىرىنە ۇلكەن قاتەر توندىرگەن ەدى. ەگەر ونى دەر كەزىندە الىپ تاستاماعاندا ناۋقاستىڭ جاعدايى ودان سايىن قيىنداپ كەتەر ەدى. ول ءوزىن اجالدان اراشالاپ الىپ قالعان «اق حالاتتى ابزال جاندارعا» ۇلكەن العىس ايتادى. شەتەل كەزىپ ىزدەگەن ەمى ءوز ەلىندە تابىلعانىنا قۋانىشتى. سوندىقتان ول قازاقستاننىڭ وتاندىق مەديتسيناسى بۇگىنگى تاڭدا جوعارى دەڭگەيدە دامىپ كەلە جاتقانىن جانە مەديتسينا قىزمەتكەرلەرىنىڭ دە بىلىكتىلىگى جىل ساناپ ءوسىپ كەلە جاتقانىن مويىندادى.
ناۋقاس 2024 جىلى تاشكەنت قالاسىندا ءبىرىنشى وپەراتسياسىن جاساتقان ەكەن, سوسىن ءۇندىستاندا كونسەرۆاتيۆتى ەم قابىلداعان. بىراق جوعارىدا ايتقانىمىزداي شەتەلدە قانشا جەردەن مەديتسينالىق كومەك العانىمەن, ناۋقاستىڭ دەنساۋلىعى جاقسارماي, كەرىسىنشە, اۋىرلاي تۇسكەن. سوڭىندا امال جوق وزىمىزدەگى اۋرۋحاناعا كەلىپ قايتا كورىنگەن.
شىمكەنت قالالىق №1 كلينيكالىق اۋرۋحانا دارىگەرلەرى 33 جاستاعى ازاماتتى تولىق تەكسەرۋدەن وتكىزىپ ءىش قۋىسىنداعى كەڭىستىكتە (زابريۋشيننوە پروسترانستۆو) وسكەن ۇلكەن ىسىكتى انىقتاعان. سودان كەيىن ناۋقاس شۇعىل جاعدايدا اۋرۋحانانىڭ حيرۋرگيا بولىمىنە جاتقىزىلادى. الدىن الا دايىندىقتان سوڭ حيرۋرگتەر وعان كۇردەلى ءارى اۋقىمدى وتا جاسايدى. وپەراتسيانىڭ ارقاسىندا ىسىكپەن بىرگە ليمفانىڭ دا تامىرلارى تازالانادى. ناۋقاستىڭ بۇگىنگى تاڭدا جاعدايى ءبىر قالىپتى, بىرنەشە كۇننەن كەيىن ۇيىنە شىعارساق دەگەن جوسپار بار دەيدى دارىگەرلەر.
شىمكەنت
