ءماجىلىس سپيكەرى ءبىزدىڭ ەلىمىز ارمەنيا باسشىلىعى جۇزەگە اسىرىپ جاتقان اۋقىمدى ساياسي, ەكونوميكالىق جانە الەۋمەتتىك رەفورمالاردى ۇلكەن قىزىعۋشىلىقپەن باقىلاپ وتىرعانىن ايتتى.
«بىلتىر قازاقستان مەن ارمەنيا اراسىنداعى دوستىق جانە ىنتىماقتاستىق تۋرالى شارتتىڭ 25 جىلدىعىن اتاپ وتتىك. بۇل مەرەيتويعا وراي مەملەكەت باسشىلارىنىڭ رەسمي ساپارلار الماسۋىنىڭ سيمۆولدىق ءمانى زور. بۇل ەكى ماڭىزدى وقيعا جاڭا گەوساياسي جاعدايلارداعى مەملەكەتتەرىمىز اراسىنداعى ىنتىماقتاستىققا قۋاتتى قارقىن بەردى. وندا ارىپتەستىگىمىزدىڭ بارلىق سالالارىن قامتيتىن بىرقاتار كەلىسىمگە قول قويىلدى», دەدى ەرلان قوشانوۆ.
تاراپتار بىلتىر ەكى ەل اراسىنداعى دوستىق جانە ىنتىماقتاستىق تۋرالى شارتتىڭ 25 جىلدىعى اتاپ وتىلگەنىن, وسىعان وراي مەملەكەت باسشىلارىنىڭ رەسمي ساپارلارمەن الماسۋى مەملەكەتارالىق بايلانىستى جاڭا دەڭگەيگە كوتەرگەنىن اتاپ ءوتتى. سول كەزدەسۋلەر ناتيجەسىندە ەكىجاقتى سەرىكتەستىكتى قامتيتىن ماڭىزدى كەلىسىمدەرگە قول قويىلعان بولاتىن.
كەزدەسۋدە پارلامەنت توراعالارى جوعارى دەڭگەيدە جاسالعان كەلىسىمدەردىڭ زاڭدىق نەگىزىن بەكىتۋ ماسەلەلەرىن ءسوز ەتتى. سونىمەن قاتار تاراپتار جاڭا ەكونوميكالىق, مادەني جانە گۋمانيتارلىق جوبالاردى قولداۋعا دايىن ەكەندەرىن ءبىلدىردى. ەرلان قوشانوۆ ارميان ارىپتەسىن ەلىمىزدە ءجۇرىپ جاتقان رەفورمالارمەن تانىستىرىپ, الەۋمەتتىك ادىلەت, زاڭ ۇستەمدىگى مەن قوعامدىق ءتارتىپتى نىعايتۋعا باعىتتالعان زاڭدار تۋرالى اقپارات بەردى. بۇل باستامالار ارمەنيا تاراپىنان دا قىزىعۋشىلىق تۋدىرىپ وتىر.
سونداي-اق ەكى ەل دەپۋتاتتارى پروفيلدىك كوميتەتتەر ارقىلى زاڭ شىعارۋ تاجىريبەسىمەن الماسۋعا ۋاعدالاستى.
ۇلتتىق جينالىس توراعاسى الەن سيمونيان پارلامەنتارالىق بايلانىستىڭ ماڭىزدىلىعىنا توقتالىپ, ءساۋىر ايىندا وتكەن قازاقستان مادەنيەتى كۇندەرىنىڭ ارمەنيا جۇرتشىلىعى ءۇشىن ۇلكەن وقيعا بولعانىن ەرەكشە اتاپ ءوتتى. ونىڭ ايتۋىنشا, مۇنداي شارالار حالىقتار اراسىنداعى ءوزارا تۇسىنىستىك پەن دوستىقتى ارتتىرا تۇسەدى.
«ارمەنيا قازاقستان بيلىگى مەن حالقىنىڭ ارميان دياسپوراسىنا دەگەن كوزقاراسىن جوعارى باعالايدى. بۇل – مەملەكەتتەرىمىز بەن حالىقتارىمىز اراسىنداعى ماڭىزدى دانەكەر», دەدى الەن سيمونيان.
كەزدەسۋ سوڭىندا تاراپتار لوگيستيكا, ەكونوميكا جانە مادەني-گۋمانيتارلىق سالاداعى ىنتىماقتاستىقتى ودان ءارى دامىتۋ ماسەلەلەرىن جان-جاقتى تالقىلادى.
