فوتو: اشىق دەرەككوز
وتكىزىلگەن ءىس-شارالاردىڭ ناتيجەسىندە 121 مىڭ توننادان استام قالدىق جينالىپ, 584 مىڭ گەكتارعا جۋىق اۋماق تازارتىلدى جانە 1,7 ميلليوننان استام اعاش كوشەتى وتىرعىزىلعان.
ءىس-شارالارعا 1,4 ميلليونعا جۋىق ادام قاتىستى, ونىڭ ىشىندە 82 مىڭ ەرىكتى بار. سونىمەن قاتار جوو مەن مەكتەپتەردە ەكوساعاتتار اياسىندا ەكولوگيا دەپارتامەنتتەرىنىڭ زەرتحانالارىنا ەكسكۋرسيالار مەن دارىستەر وتكىزىلىپ, 5000-نان استام ستۋدەنت ەكولوگيالىق مونيتورينگ قۇرالدارىمەن تانىسقان.
سونداي-اق سۋ ايدىندارىن تازارتۋ كەزىندە 342 بالىق اۋلاۋ تورى جينالدى, 21 بۇلاق قالپىنا كەلتىرىلدى, مەكتەپ وقۋشىلارى 1982 ۇيا (قۇس ۇيشىگى) ورناتتى.
ەستەرىڭىزگە سالا كەتەيىك, 21–23 ءساۋىر ارالىعىندا استانادا مەملەكەت باسشىسىنىڭ قاتىسۋىمەن «تازا قازاقستان» ەكوفەستيۆالى ءوتتى. كورمە الاڭىندا كەلەسىدەي جوبالار تانىستىرىلدى:
- قالدىقتاردى قايتا وڭدەۋ جانە كادەگە جاراتۋ جوبالارى;
- ءىرى ونەركاسىپتىك كومپانيالاردىڭ باستامالارى (ERG, تشو, كپو, قازاحمىس);
- حالىقارالىق جاسىل تەحنولوگيالار ورتالىعىنىڭ قولداۋىمەن ەكوستارتاپتار;
- مەكتەپ وقۋشىلارىنىڭ ەكولوگيالىق جوبالارى.
كورمەنى 1500-دەن استام ادام, سونىڭ ىشىندە ەلوردا جوو-لارى مەن كوللەدجدەرىنىڭ ستۋدەنتتەرى تاماشالادى.
ايتا كەتەيىك, «تازا قازاقستان» باستاماسى اياسىندا حالىقپەن كەرى بايلانىس ورناتۋ ماقساتىندا Telegram-دا چات-بوت جۇمىس ىستەپ تۇر. بۇل چات-بوت ارقىلى ءاربىر ازامات لاستانعان اۋماقتىڭ فوتوسىن جانە گەولوكاتسياسىن جولداي الادى. وتىنىمدەر اۆتوماتتى تۇردە ءتيىستى ورگاندارعا جىبەرىلىپ, جەدەل تۇردە قاراستىرىلادى.
چات-بوت ىسكە قوسىلعاننان بەرى جۇيەگە 18322 ءوتىنىم كەلىپ ءتۇستى, ونىڭ 16907-ءسى ورىندالعان. چات-بوتتى ەڭ بەلسەندى قولداناتىندار — الماتى مەن استانا قالالارىنىڭ, سونداي-اق تۇركىستان وبلىسىنىڭ تۇرعىندارى.
