فوتو: اشىق دەرەككوز
اتاپ ايتقاندا, سىيىمدىلىعى 245 ميلليون تەكشە مەتردى قۇرايتىن اقتوبە سۋ قويماسى, 120 مىڭ گەكتار جەرگە سۋ جەتكىزەتىن قىزىلوردا سۋ تورابى جانە شىمكەنت قالاسىنداعى توعىس سۋ قويماسى جاڭعىرتىلىپ, پايدالانۋعا بەرىلگەن.
سونىمەن قاتار التى وڭىردە, اتاپ ايتساق اقمولا, الماتى, قىزىلوردا, سولتۇستىك قازاقستان, ماڭعىستاۋ جانە ۇلىتاۋ وبلىستارىندا 200 مىڭعا جۋىق تۇرعىنى بار 49 ەلدى مەكەنگە ساپالى اۋىز سۋ جەتكىزەتىن سەگىز سۋ نىسانىنىڭ قۇرىلىسى اياقتالعان.
وتكەن جىلى سۋ رەسۋرستارى جانە يرريگاتسيا مينيسترلىگى جالپى قۇنى شامامەن 600 ميلليارد تەڭگە بولاتىن 137 جوبانى جۇزەگە اسىردى. بۇل جوبالارعا 110,5 ميلليارد تەڭگە كولەمىندە قارجى بولىنگەن.
سونىمەن قاتار مينيسترلىك 2025 جىلعا قاراي جالپى سوماسى 184 ميلليارد تەڭگەنى قۇرايتىن 138 جوبانى ىسكە اسىرۋ جوسپارلانعانىن اتاپ ءوتتى. بۇل وتكەن جىلعى كولەمنەن 67%-عا ارتىق. اتالعان جوبالاردىڭ 31-ءى ەلىمىزدىڭ 9 وبلىسىندا, اتاپ ايتساق اقمولا, اتىراۋ, الماتى, قىزىلوردا, تۇركىستان, باتىس قازاقستان, سولتۇستىك قازاقستان, ماڭعىستاۋ جانە ۇلىتاۋ وبلىستارىندا سۋمەن جابدىقتاۋ نىساندارىن سالۋ مەن قايتا جاڭارتۋعا باعىتتالعان. وسى ماقساتتارعا 2025 جىلى 71 ميلليارد تەڭگە بولىنەدى. جوبالاردىڭ ناتيجەسىندە شامامەن 1,3 ميلليون ادام تۇراتىن 468 اۋىل تازا اۋىز سۋمەن قامتىلىپ, 2,5 مىڭ شاقىرىمنان استام سۋ قۇبىرى سالىنادى جانە جاڭارتىلادى.
ء«ىرى ينفراقۇرىلىمدىق جوبالار قاتارىندا تۇركىستان وبلىسىنداعى قاراقۋىس سۋ قويماسىنىڭ (1,1 ملن م³) قۇرىلىسى, جەتىسۋ وبلىسىنداعى قىزىلاعاش سۋ قويماسىن (42,6 ملن م³) رەكونسترۋكتسيالاۋ, سولتۇستىك قازاقستان وبلىسىنداعى «بيوپرۋد» سۋ جيناقتاۋىشىنىڭ قورعانىس دامباسىن (35 ملن م³) سالۋ, اقمولا وبلىسىندا جاباي وزەنىنىڭ بويىندا بالكاشينو اۋىلى ماڭىندا (1,5 ملن م³) سۋ جيناقتاۋىش تۇرعىزۋ, سونداي-اق جامبىل وبلىسىنداعى «انداس 1 جانە 2» توعاندارىنىڭ (1,4 ملن م³) قۇرىلىسىن اياقتاۋ جوسپارلانعان», دەلىنگەن اقپاراتتا.
ايتا كەتەيىك, جامبىل وبلىسىنداعى ىنتالى, باتىس قازاقستانداعى كيروۆ, تۇركىستان وبلىسىنداعى قاپشاعاي سۋ قويمالارىن رەكونسترۋكتسيالاۋ جۇمىستارى جالعاسىپ جاتىر. اتالعان جوبالار شەڭبەرىندە 2025 جىلدىڭ سوڭىنا دەيىن 180 ميلليون تەكشە مەترگە دەيىن تاسقىن جانە ەرىگەن سۋدى جيناۋعا مۇمكىندىك بەرەتىن سۋ قويمالارى پايدالانۋعا بەرىلەدى.
«قازىرگى ۋاقىتتا 214 جوبا بويىنشا جوبالىق-سمەتالىق قۇجاتتاما جانە تەحنيكالىق-ەكونوميكالىق نەگىزدەمە دايىندالۋدا. ونىڭ ىشىندە جالپى كولەمى 1,8 ميلليارد تەكشە مەتردەن اساتىن 21 سۋ قويماسىنا (6 – جاڭا, 15 – رەكونسترۋكتسيا), ۇزىندىعى 4024 شاقىرىم بولاتىن 243 يرريگاتسيالىق كانالعا جانە 13 گيدروتەحنيكالىق نىسانعا قاتىستى جوبالار بار. بارلىق جوبالاردا سۋ رەسۋرستارىن ءتيىمدى پايدالانۋ ماقساتىندا اۆتوماتتاندىرۋ جۇيەلەرى قاراستىرىلعان», دەلىنگەن حابارلامادا.
اۋقىمدى جوبالاردى جۇزەگە اسىرۋ ءۇشىن شەتەلدىك قارجى ينستيتۋتتارىن تارتۋ باعىتىندا جۇمىستار جۇرگىزىلىپ جاتىر. يسلام دامۋ بانكىنىڭ ديرەكتورلار كەڭەسى جالپى قۇنى 2,7 ميلليارد اقش دوللارىن قۇرايتىن نەسيە مەن گرانت ءبولۋ تۋرالى شەشىم قابىلدادى. جوبا ەكى كەزەڭمەن جۇزەگە اسىرىلادى.
ءبىرىنشى كەزەڭ (2025–2027 جج.) اياسىندا 1,153 ميلليارد اقش دوللارى بولىنەدى. ونىڭ ىشىندە 1,1 ميلليارد دوللارى قۇرىلىس پەن تسيفرلاندىرۋعا, 50 ميلليون دوللارى جوبالىق-سمەتالىق قۇجاتتاما ازىرلەۋگە جانە 3,5 ميلليون دوللارى مينيسترلىككە قاراستى ۇيىمداردىڭ الەۋەتىن ارتتىرۋعا باعىتتالادى.
ەكىنشى كەزەڭدە (2027–2029 جج.) 1,6 ميلليارد اقش دوللارى كولەمىندە قوسىمشا ينۆەستيتسيا تارتۋ جوسپارلانعان.
نەسيە قارجىسى ەسەبىنەن 2025 جىلى اقمولا, قالعۇتى, قاراوزەك جانە ۇلكەن وزەن سۋ قويمالارىنىڭ قۇرىلىسى باستالادى. بۇل نىساندار وڭتۇستىك وڭىرلەردە ورنالاسقان 22,5 مىڭ گەكتار سۋارمالى جەردىڭ ۆەگەتاتسيالىق كەزەڭدەگى سۋ تاپشىلىعىن جويۋعا جانە ەكى ەلدى مەكەندى سۋ تاسقىنىنان قورعاۋعا مۇمكىندىك بەرەدى.
سونداي-اق جامبىل وبلىسىنداعى تەرىس-اششىبۇلاق پەن قاراقوڭىز, تۇركىستان وبلىسىنداعى قوسقورعان مەن كوكساراي كونتررەتتەۋىشتەرىن رەكونسترۋكتسيالاۋ جوسپارلانعان.
الماتى, جامبىل, جەتىسۋ, باتىس قازاقستان, قىزىلوردا جانە تۇركىستان وبلىستارىندا جالپى ۇزىندىعى 3452 شاقىرىمدى قۇرايتىن 115 يرريگاتسيالىق كانال زاماناۋي تسيفرلىق جۇيەلەرمەن جاڭعىرتىلادى. سونىمەن قاتار «تۇران سۋ» (تۇركىستان) جانە «الماتىوبلسۋشار» (الماتى) كوممۋنالدىق كاسىپورىندارى ءۇشىن دە تەحنيكالىق جۇمىستار جۇرگىزىلەدى.
جوبالاردىڭ بارلىعى ەلىمىزدىڭ سۋ قاۋىپسىزدىگىن قامتاماسىز ەتۋگە جانە حالىقتىڭ ءومىر ءسۇرۋ ساپاسىن جاقسارتۋعا باعىتتالعان.
