ءبىرىنشى توقساننىڭ قورىتىندىسىمەن ەلىمىزدە جەك سالاسىنداعى نەگىزگى كورسەتكىشتەردىڭ ءوسۋى تىركەلدى. ەسەپتى كەزەڭنىڭ سوڭىندا جەك نىساندارىنىڭ جيىنتىق بەلگىلەنگەن قۋاتى 3082,12 مۆت-تى, ونىڭ ىشىندە: جەل ەلەكتر ستانتسيالارى – 1570,05 مۆت; كۇن ەلەكتر ستانتسيالارى –1222,61 مۆت; شاعىن سۋ ەلەكتر ستانتسيالارى – 287,685 مۆت; بيوەلەكتر ستانتسيالارى – 1,77 مۆت-تى قۇرادى.
جەك وبەكتىلەرى وندىرگەن ەلەكتر ەنەرگياسىنىڭ جالپى كولەمى 1961,6 ملن كۆت-ساعاتقا جەتتى, ونىڭ ىشىندە: 1417,19 ملن كۆت-ساعاتتى جەل ەلەكتر ستانتسيالارى وندىرسە, 373,503 ملن كۆت-ساعات – كۇن, 170,253 ملن كۆت-ساع – شاعىن گيدروەلەكتروستانتسيالار, 0,652 ملن كۆت-ساع – بيوەلەكتروستانتسيالار ەسەبىنەن. وسىلايشا رەسپۋبليكامىزدا ەلەكتر ەنەرگياسىن ءوندىرۋدىڭ جالپى كولەمىندەگى جەك ۇلەسى 5,93%-عا جەتتى.
بۇگىندە ەلىمىز جاسىل ەنەرگەتيكانى دامىتۋ جونىنەن كوشباسشى پوزيتسياعا يە. بۇل ءۇردىس بىلتىر جاڭا جۇمىس ورىندارىن قۇرۋ جانە الەمدىك كومپانيالارمەن ستراتەگيالىق كەلىسىمدەر جاساۋ ارقىلى نىعايا ءتۇستى. بۇل ەكولوگيالىق تازا تەحنولوگيالار كومىرتەگى ءىزىن ازايتۋدىڭ نەگىزگى فاكتورىنا عانا ەمەس, سونىمەن قاتار جاڭا جۇمىس ورىندارىنىڭ كوزىنە دە اينالىپ كەلە جاتقانىن كورسەتەدى. ءىرى حالىقارالىق كومپانيالارمەن ماڭىزدى كەلىسىمدەرگە قول قويۋ سالانى دامىتۋ ءۇشىن جاڭا مۇمكىندىكتەر اشادى. مۇنداي سەرىكتەستىكتەر تەحنولوگيالىق الماسۋ مەن ينۆەستيتسيالار اعىنىن مولايتىپ, سالانى جاڭعىرتۋعا جانە ەلدىڭ ەنەرگەتيكالىق قاۋىپسىزدىگىن ارتتىرۋعا ىقپال ەتەدى.
حالىق اراسىندا شاعىن كولەمدى جەك جوبالارىن ىنتالاندىرۋ تۋرالى زاڭ تۇرعىندارعا جاسىل ەنەرگياعا كوشۋ ۇدەرىسىنە بەلسەندى قاتىسۋعا مۇمكىندىك بەرىپ, تۇرعىن ۇيلەرگە جانە باسقا دا وبەكتىلەرگە كۇن پانەلدەرىن ورناتۋدى ەگجەي-تەگجەيلى رەتتەدى. ناتيجەسىندە قازاقستان جەك-ءتى دامىتۋ بويىنشا ورتالىق ازياداعى كوشباسشىلىق ۇستانىمىن ساقتاپ, ورنىقتى, ەكولوگيالىق قاۋىپسىز بولاشاققا ۇمتىلىسىن جالعاستىرىپ كەلەدى. قابىلدانعان شەشىمدەر ەلىمىزدى الەمدىك ەنەرگەتيكالىق ارەنادا سالماقتى ويىنشىعا اينالدىرا وتىرىپ, تاياۋ جىلداردا دامۋدىڭ ستراتەگيالىق باعىتىنا سەرپىن بەرمەك.
