قازاقستاندا قۇربان ايت مەرەكەسى بيىلعى جىلى 6 ماۋسىمدا باستالادى. بۇل جونىندە قازاقستان مۇسىلماندارى ءدىني باسقارماسىنىڭ (قمدب) شاريعات جانە ءپاتۋا ءبولىمى مالىمدەدى, دەپ حابارلايدى Skifnews.kz اقپاراتتىق پورتالى.
ۇسىنىلعان كۇندەر حيجري كۇنتىزبەسىنە جانە حالىقارالىق استرونوميالىق ەسەپتەۋلەرگە سۇيەنە وتىرىپ انىقتالعان. 2025 جىلعى قۇربان ايت 6, 7 جانە 8 ماۋسىم كۇندەرىنە سايكەس كەلەدى. ايتتىڭ ءبىرىنشى كۇنى – 6 ماۋسىم بەيسەنبىگە ءتۇسىپ, ەلىمىزدە رەسمي دەمالىس كۇنى بولىپ ەسەپتەلەدى.
سونىمەن قاتار ءپاتۋا ءبولىمىنىڭ ماماندارى اي كۇنتىزبەسىنە نەگىزدەلگەن ءدىني مەيرام كۇندەرى ايدىڭ تۋى مەن كورىنۋىنە قاراي ءسال وزگەرۋى مۇمكىن ەكەنىن ەسكەرتتى. ياعني, كورسەتىلگەن مەرزىم ناقتى استرونوميالىق باقىلاۋلارعا بايلانىستى ءبىر كۇنگە ىلگەرى نە كەيىن جىلجۋى ىقتيمال.
قۇربان ايت – مۇسىلماندار ءۇشىن قاسيەتتى ءارى ماڭىزدى مەيرام. بۇل كۇندەرى ايت نامازى وقىلىپ, تۇرمىسى جەتكىلىكتى جاندارعا قۇرباندىق شالۋ پارىز بولىپ سانالادى. قمدب ەرەجەسىنە ساي, قۇرباندىقتى ايت نامازىنان كەيىن باستاپ, ءۇش كۇن ىشىندە شالۋعا بولادى.
