وسى وڭىردە تۇراتىن سوعىس ارداگەرلەرىنە قر پرەزيدەنتى قاسىم-جومارت توقاەۆتىڭ اتىنان قۇتتىقتاۋلار كەلىپ ءتۇستى. جەڭىستى جاقىنداتقان ارداگەرلەرگە اتاۋلى كۇنگە وراي ىستىق لەبىزگە تولى حاتتار, ەستەلىك سىيلىقتار جانە جەڭىستىڭ 80 جىلدىعىنا ارنالعان مەرەكەلىك مەدالدار بەرىلدى. بۇل كۇنگى باستى قۋانىشتى جاڭالىقتىڭ ءبىرى – بەيبىت ءومىر سىيلاعان سوعىس ارداگەرلەرىنە مەملەكەت تاراپىنان كورسەتىلگەن قامقورلىق پەن قۇرمەت رەتىندە قوناەۆ قالاسىندا سالىنعان تۇرعىن ۇيلەردەن دەمەۋشىلەردىڭ اتىنان باسپانا كىلتىنىڭ تابىس ەتىلۋى بولدى. سونىمەن بىرگە, وبلىس اكىمى مارات سۇلتانعازيەۆتىڭ تاپسىرماسىمەن ايماقتا تۇراتىن كوزى ءتىرى 5 سوعىس ارداگەرىنە 5 ميلليون تەڭگەدەن الەۋمەتتىك كومەك بەرىلدى. جەڭىس كۇنىندەگى سالتاناتتى شارا وبلىس ورتالىعىنداعى "داڭق" مەموريالىنا گۇل شوقتارىن قويۋدان باستالدى. شاراعا وبلىس باسشىلىعى مەن ءار دەڭگەيدەگى ءماسليحات دەپۋتاتتارى, ارداگەرلەر ۇيىمى مەن ءتۇرلى مەكەمە وكىلدەرى قاتىستى.
سالتاناتتى راسىمگە سوعىس ارداگەرلەرى ارنايى كولىكپەن جەتكىزىلدى. وبلىستىق توتەنشە جاعدايلار دەپارتامەنتىنىڭ وركەسترى شارانى مۋزىكامەن ارلەپ, مەرەكە كوركىن قىزدىردى. شاراعا قاتىسقانداردىڭ اراسىندا ەكىنشى دۇنيەجۇزىلىك سوعىس ارداگەرلەرى سولتانباي جارىقباسوۆ پەن الىم كيبيروۆ تا بولدى.
سالتاناتتى شارادا ءسوز العان سولتانباي اتا "جەڭىس - ءبىزدىڭ بارشامىزعا ورتاق تاعىلىمدى تاريحىمىز, ءبىزدىڭ ءومىرىمىزدىڭ وزەگى ءارى داڭقىمىز, ابىروي-بەدەلىمىزدىڭ كورىنىسى" - دەسە, ال الىم كيبيروۆ اتا جەڭىستىڭ قادىر-قاسيەتىن كەيىنگى جاس ۇرپاق جادىنا ساقتاپ, سەزىنىپ وسسە دەگەن تىلەگىن جەتكىزدى.
- جەڭىستىڭ 80 جىلدىق مەرەكەسى تەك ارداگەرلەرگە قۇرمەت كورسەتۋمەن شەكتەلمەيدى. بۇل كۇننىڭ بولاشاق ۇرپاق ءۇشىن دە ماڭىزى زور, - دەدى وبلىس اكىمى مارات ەلەۋسىز ۇلى.
مەرەكە كۇنى ايماق باسشىسى ارداگەر وكسانا بەتەباەۆاعا قر پرەزيدەنتىنىڭ اتىنان قۇتتىقتاۋ حات, ەستەلىككە سىيلىق ۇسىنىپ, جاڭا پاتەردىڭ كىلتىن تابىستادى.
مەرەكەلىك ءىس-شارالار وبلىس اۋماعىندا ايرىقشا اتالدى. وبلىس مۇراجايلارىندا, كىتاپحانالاردا جانە مادەنيەت ۇيلەرىندە كورمەلەر, ەسكە الۋ كەشتەرى مەن ادەبي-تانىمدىق كەزدەسۋلەر ۇيىمداستىرىلدى.
ماسەلەن, وبلىستىق كىتاپحانادا قايسارلىق پەن باتىرلىق تاقىرىبىندا يگى شارا وتسە, ال قاراساي اۋدانىنداعى "اتامەكەن" ورتالىعىندا جينالعان قاۋىم حالىق قاھارمانى, گەنەرال-پولكوۆنيك ساپارعالي توقپاقباەۆتىڭ تاعىلىمدى اڭگىمەسىن تىڭدادى.
جەڭىس كۇنىن مەرەكەلەۋ 9 مامىرمەن شەكتەلمەسى انىق. وبلىس جاستارىنىڭ باستاماسىمەن "80 جىلعا – 80 يگى ءىس" اكتسياسى قولعا الىندى. بۇل اكتسيا اياسىندا 200-دەن استام ارداگەرگە كومەك كورسەتىلەدى. ەرىكتىلەر تىل ەڭبەككەرلەرى مەن جالعىز باستى قاريالاردىڭ شاڭىراقتارىنا باس سۇعىپ, ءۇي جيناۋعا جانە اۋلاسىن اباتتاندىرۋعا قول ۇشىن سوزۋدا. مەكتەپ وقۋشىلارى مەن ستۋدەنتتەر ءۇشىن دە اسكەري بولىمدەر مەن شەكارا زاستاۆالارى وتانشىلدىق رۋحتى كوتەرەتىن ەكسكۋرسيالار وتكىزەدى.
سونداي-اق, تالعار اۋدانىنداعى نۇرا اۋىلىندا بايگە ءوتىپ, جارىستا 100-گە جۋىق شاباندوز ونەر كورسەتتى. جەڭىس كۇنىندەگى يگى شارا رايىمبەك اۋدانى تالاس اۋىلىنداعى سوعىس ارداگەرلەرىنە ارنالعان ەسكەرتكىشتىڭ اشىلۋىمەن تۇيىندەلدى.
الماتى وبلىسى.
