فوتو: باقىتگۇل بۋرباەۆا
«جەدەل جاردەم» شاقىرتۋلارىنىڭ 50%-دان استامى 4-ساناتقا تيەسىلى
مينيسترلىك مەڭزەگەن ومىرگە قاۋىپ توندىرمەيتىن جەدەلدىكتىڭ 4-ساناتىنا جوعارى قىسىم, تەمپەراتۋرا, جەڭىل جاراقاتتار جاتقىزىلعان.
مۇنداي شاقىرتۋلار تيىسىنشە, جەدەل كومەككە مۇقتاج, ومىرىنە قاۋىپ توندىرەتىن جاعدايلارى بار پاتسيەنتتەرگە دەر كەزىندە جەتۋگە كەدەرگى كەلتىرگەن.
ستاتيستيكاعا ساي, وسى جىلدىڭء بىرىنشى توقسانىندا قازاقستاندا «جەدەل جاردەم» قىزمەتى 2, 1 ملن-نان استام شاقىرتۋعا قىزمەت كورسەتكەن. ەڭ كوپ وتىنىشتەر جوعارىدا اتالعانداي جەدەلدىلىكتىڭ 4-ساناتى بويىنشا تىركەلگەن: 763 463 شاقىرتۋ, ونىڭ 518 مىڭنان استامىنا مساك موبيلدىك بريگادالارى بارعان. 1-سانات بويىنشا شاقىرتۋلاردىڭ سانى 104 443, 2-سانات بويىنشا — 642 312, 3-سانات بويىنشا — 574 580 شاقىرتۋدى قۇراعان.
«ەندى مەديتسينالىق-سانيتاريالىق العاشقى كومەكتىڭ موبيلدىك بريگادالارى (مساك) شاقىرتۋلارعا شىعىپ, پاتسيەنتتەردىڭ ۇيىنە جوسپارلى تۇردە بارادى. بۇل ازاماتتاردىڭ دەنساۋلىق جاعدايىن ۋاقتىلى باقىلاۋدى قامتاماسىز ەتۋگە, اسىرەسە سوزىلمالى اۋرۋلارى بار پاتسيەنتتەردىڭ جاعدايىنىڭ ناشارلاۋىنا جەدەل دەن قويۋعا مۇمكىندىك بەرەدى.
مساك موبيلدىك بريگادالارى 25 مىڭ تۇرعىنعا ءبىر بريگادا ەسەبىنەن قۇرىلادى. ولار پاتسيەنتتىڭ تۇرعىلىقتى جەرى نەمەسە بەكىتىلۋىنە قاراماستان ناقتى كەلگەن جەرى بويىنشا جۇمىس ىستەيدى.
قاجەت بولعان جاعدايدا موبيلدىك بريگادالارمەن ارنايى باعىتتاعى ماماندار دا بىرگە بولادى, اتاپ ايتقاندا بالالارعا كومەك پەدياتردىڭ قاتىسۋىمەن, ەرەسەكتەرگە — پاتسيەنت جاعدايىنىڭ سيپاتى مەن اۋىرلىعىنا بايلانىستى ارنايى مامانداردى (كارديولوگتار, نەۆروپاتولوگتار جانە باسقا دارىگەرلەر) تارتا وتىرىپ كورسەتىلەتىن بولادى. بۇل ءتاسىل ارقىلى جوعارى ساپالى اتاۋلى مەديتسينالىق كومەك كورسەتىلەدى», دەپ ءتۇسىندىردى دەنساۋلىق ساقتاۋ مينيسترلىگىنىڭ ءباسپاسوز قىزمەتى.
جاڭا جۇيە بويىنشا جەدەل جاردەم قىزمەتىنىڭ جۇمىس ءتارتىبى قانداي؟
مساك موبيلدىك بريگاداسىنىڭ شاقىرتۋعا كەلۋ ۋاقىتى - 60 مينۋتقا دەيىن بولىپ بەكىتىلگەن.
بارىنشا شۇعىل ساناتتار: 1-ساناتقا - 10 مينۋت, 2-ساناتقا - 15 مينۋت, 3-ساناتقا - 30 مينۋتتا جەدەل جاردەم جەتۋى ءتيىس.
ال «جەدەل جاردەمدى» شاقىرتۋ بۇرىنعىداي «103» نومەرى ارقىلى جۇزەگە اسىرىلادى.
ديسپەتچەر ارنايى الگوريتمدى پايدالانا وتىرىپ, ولاردى شۇعىلدىق دەڭگەيىنە قاراي بىرىنشىدەن ءتورتىنشى ساناتقا دەيىن جىكتەيدى. بۇل جۇيە بىرنەشە جىلدان بەرى قولدانىستا ەكەنى بەلگىلى.
نەگىزگى وزگەرىس رەتىندە شۇعىل مەديتسينالىق كومەكتى قاجەت ەتپەيتىن بارلىق وتىنىشتەر ناقتى بەلگىلەنگەن ۋاقىتتا العاشقى مەديتسينالىق-سانيتاريالىق كومەك ۇيىمدارىنا (ەمحانالارعا) جولداناتىنىندا. جۇمىس كۇندەرى ساعات 08:00-دەن 19:00-گە دەيىن جانە سەنبى كۇندەرى ساعات 08:00-دەن 12:00-گە دەيىن. قالعان ۋاقىتتا شاقىرتۋلارعا «103» قىزمەتىنىڭ بريگادالارى بۇرىنعى تارتىپپەن قىزمەت كورسەتەدى.
بارلىق قالالىق ەمحانا 1 مامىرعا دەيىن ءوز ءموبيلدى بريگادالارىن قۇرۋ باعىتىندا جۇمىس ىستەگەن. اتالعان ءموبيلدى بريگادالار «جەدەل جاردەم» قىزمەتى نەمەسە ۋچاسكەلىك قىزمەتپەن تەڭەستىرىلمەيدى. ۋچاسكەلىك دارىگەرلەر پاتسيەنتتەردى قابىلداعاننان كەيىن ۇيگە بارادى, ءموبيلدى بريگادا – بولەك قىزمەت. ونىڭ قۇرامىنا دارىگەر (نەمەسە فەلدشەر) جانە ارنايى جابدىقتالعان اۆتوكولىگى بار جۇرگىزۋشى كىرەدى.
قازىرگى ۋاقىتتا قازاقستاندا مىندەتتى الەۋمەتتىك مەديتسينالىق ساقتاندىرۋ قورى ارقىلى العاشقى مەديتسينالىق-سانيتاريالىق كومەك (امسك) كورسەتەتىن 691 كلينيكا بار.
استانادا امسك جۇيەسىمەن شامامەن 40 مەديتسينالىق ۇيىم جۇمىس ىستەيدى. ولاردىڭ ىشىندە نەگىزىنەن ءىرى كلينيكالاردان تۇراتىن 10 شاقتى ۇيىم بىرنەشە جىلدان بەرى ءتورتىنشى ساناتتاعى شاقىرتۋلاردى ءوز بەتىنشە قامتاماسىز ەتىپ كەلگەن. ەندى ولار شاعىن سەرىكتەستەرىنىڭ شاقىرتۋلارىن دا قابىلداي الادى, ياعني, ەمحانالار اراسىندا ءوزارا اۋتسورسينگتىك كەلىسىمشارتتار جاساۋ قۇقىعى ساقتالعان.
وسىلايشا, سالالىق مينيسترلىك «جەدەل جاردەم» قىزمەتىن جۇيەلەۋدى كوزدەگەن.
