جينالعان قاۋىم ورتالىق الاڭدا ورناتىلعان ەڭسەلى ساحناداعى كەڭ ەكراننان استانا قالاسىنداعى اسكەري پارادتىڭ اشىلۋ سالتاناتىن تاماشالاپ, مەملەكەت باسشىسىنىڭ قۇتتىقتاۋىن تىكەلەي ەفيردە تىڭدادى. مەملەكەت باسشىسى قازاقستاندىقتاردى مەرەكەمەن قۇتتىقتاپ, ەلدەگى بەيبىتشىلىك پەن قاۋىپسىزدىكتى قامتاماسىز ەتۋدەگى قارۋلى كۇشتەردىڭ ماڭىزىن اتاپ ءوتتى.
ءىس-شارا بارىسىندا الماتى وبلىسىنىڭ اكىمى مارات سۇلتانعازيەۆ قۇتتىقتاۋ ءسوز سويلەدى. ول پرەزيدەنتتىڭ تاپسىرماسىمەن ەلىمىزدىڭ قارۋلى كۇشتەرىندە جۇيەلى جاڭعىرتۋ جۇرگىزىلىپ جاتقانىن اتاپ ءوتتى.
«مەملەكەت باسشىسىنىڭ تاپسىرماسىنا سايكەس قازاقستان رەسپۋبليكاسىنىڭ قارۋلى كۇشتەرى جاڭعىرۋ ۇستىندە. ولار ۇلتتىق قاۋىپسىزدىكتىڭ كەپىلىنە, قوعامنىڭ تىرەگىنە اينالۋدا. ءبىزدىڭ وتان قورعاۋشىلارىمىز تەك شەكارانى كۇزەتىپ قانا قويماي, ازاماتتىق كەلىسىمدى نىعايتۋعا جانە جاستاردى وتانسۇيگىشتىككە تاربيەلەۋگە زور ۇلەس قوسىپ كەلەدى», – دەدى ءوڭىر باسشىسى.
مەرەكەلىك شارا اياسىندا ماراپاتتاۋ ءراسىمى ءوتتى. الماتى وبلىسى اكىمىنىڭ اتىنان قوناەۆ گارنيزونىنىڭ جانە ۇلتتىق ۇلاننىڭ جيىرما شاقتى اسكەري قىزمەتشىسىنە العىس حاتتار تابىستالدى. ماراپاتتالعاندار اراسىندا پولكوۆنيك جەڭىسجان بايجان, پودپولكوۆنيكتەر دانيار مامەنوۆ پەن بەرىك ەلىكباەۆ, گۆارديا مايورى دارحان جانسىكباەۆ, مايور نۇرلان وجاروۆ, لەيتەنانت لاۋرا بەكبولاتوۆا جانە سەرجانت ەلدوس قاربوزوۆ پەن وزگە دە قىزمەتكەرلەر بار.
مەرەكەلىك كوڭىل كۇيدى شىعارماشىلىق ۇجىمداردىڭ قاتىسۋىمەن وتكەن كونتسەرتتىك باعدارلاما جالعاستىرىپ, ءىس-شاراعا ەرەكشە ءسان مەن جىلۋلىق سىيلادى.
سونىمەن قاتار, №20030 اسكەري ءبولىم اۋماعىندا زاماناۋي اسكەري تەحنيكا كورمەسى ۇيىمداستىرىلدى. وبلىس اكىمى ءبولىمنىڭ ماتەريالدىق-تەحنيكالىق بازاسىمەن تانىسىپ, جەكە قۇراممەن اڭگىمەلەسىپ, ءبولىمنىڭ جابدىقتالۋ دەڭگەيىنە جوعارى باعا بەردى.
قوناەۆ قالاسىندا وتكەن وتان قورعاۋشى كۇنى بىرلىك پەن ەل تىنىشتىعىن كۇزەتكەن جاندارعا دەگەن قۇرمەت رۋحىندا ءوتتى. مەرەكەلىك شارالار ارميا مەن حالىق اراسىنداعى بايلانىستى نىعايتۋدىڭ – قازاقستاننىڭ ورنىقتى دامۋىنىڭ كەپىلى ەكەنىن تاعى ءبىر مارتە كورسەتتى.
الماتى وبلىسى.
