فوتو:اشىق دەرەككوز
پرەزيدەنتتىڭ ايتۋىنشا, حالقىمىزدىڭ جاۋىنگەرلىك ءداستۇرى عاسىرلار بويى جالعاسىپ كەلەدى.
«التىن وردا, قازاق حاندىعى كەزىندەگى ءباھادۇر بابالارىمىز كەڭ بايتاق جەرىمىزدى قورعاپ, كەيىنگى بۋىنعا امانات ەتتى. ولاردىڭ بۇگىنگى ءىزباسارلارى قازاقتىڭ مەملەكەتتىلىگىن قاس قاقپاي كۇزەتىپ تۇر», دەدى مەملەكەت باسشىسى.
قاسىم-جومارت توقاەۆ قارۋلى كۇشتەردىڭ ەل بىرلىگى مەن بەيبىت ءومىردى قورعاۋداعى ماڭىزىن ەرەكشە اتاپ ءوتتى. بۇگىندە قازاقستان ساربازدارى بىرىككەن ۇلتتار ۇيىمىنىڭ بىتىمگەرلىك ميسسيالارىنا قاتىسىپ, الەمدىك تۇراقتىلىققا ءوز ۇلەسىن قوسىپ كەلەدى.
«بۇل – بۇكىل الەمدەگى قازاقستان ارمياسىنا دەگەن زور سەنىم», دەدى پرەزيدەنت.
مەملەكەت باسشىسى ەلىمىزدىڭ قورعانىس قابىلەتىن نىعايتۋ باستى مىندەت ەكەنىن ايتىپ, ارميانى جاڭعىرتۋ بويىنشا ناقتى جۇمىستار اتقارىلىپ جاتقانىن جەتكىزدى.
«پارلامەنت ءتيىستى زاڭ قابىلدادى. مەملەكەت اسكەري قىزمەتشىلەرگە جانە ازاماتتىق قورعانىس سالاسىنىڭ قىزمەتكەرلەرىنە ءاردايىم قولداۋ كورسەتەدى», دەدى قاسىم-جومارت توقاەۆ.
مەملەكەت باسشىسى ارميا قۋاتى تەك تەحنيكالىق جابدىقپەن ەمەس, جاۋىنگەرلىك رۋح پەن تەمىردەي تارتىپپەن نىعاياتىنىن ايتتى.
ء«بىز وزىق ويلى ۇلت رەتىندە زاڭ مەن ءتارتىپتى بارىنەن بيىك قوياتىن بولدىق. ءار ازاماتتىڭ بويىندا وتانعا دەگەن ادالدىق پەن ادىلدىك بولۋعا ءتيىس», دەدى توقاەۆ.
ءسوز سوڭىندا مەملەكەت باسشىسى بارشا ازاماتتاردى ادىلەتتى, قۋاتتى, قاۋىپسىز جانە تازا قازاقستان قۇرۋ جولىندا بىرىگۋگە شاقىرىپ: «رۋحىمىز مىقتى, مەملەكەتتىلىگىمىز ماڭگى بولسىن! كوك تۋىمىز بيىكتە جەلبىرەسىن! ۇلى جەڭىستىڭ 80 جىلدىعى قۇتتى بولسىن!», دەپ قورىتىندىلادى.
