فوتو: قورعانىس مينيسترلىگى
كونتسەرت بارىسىندا قازاقستاننىڭ تانىمال مادەنيەت قايراتكەرلەرى مەن جەتەكشى ارتىستەرى, وركەسترلىك, حور جانە بي ۇجىمدارى كورەرمەندەرگە پاتريوتتىق رۋح سىيلادى. ولار اسكەري قىزمەتشىلەرگە, قارۋلى كۇشتەردىڭ ارداگەرلەرىنە, اسكەري كوللەدج كۋرسانتتارى مەن «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرىنە ارناپ سوعىس جىلدارىنداعى جانە قازىرگى پاتريوتتىق اندەردى ورىندادى.
ساحنا تورىندە ەسترادالىق-سيمفونيالىق وركەستر مەن فولكلورلىق-ەتنوگرافيالىق انسامبل نۇرعيسا تىلەنديەۆتىڭ «اتا تولعاۋى» اتتى تەرەڭ ماعىنالى كۇيىن ورىنداپ, ۇلى كومپوزيتوردىڭ دۇنيەتانىمىن اسەرلى جەتكىزە ءبىلدى. سونداي-اق جوڭعار شاپقىنشىلىعى كەزىندەگى قازاق حالقىنىڭ ازاپتى كەزەڭىن سۋرەتتەيتىن تاريحي-مۋزىكالىق «ەلىم-اي» تۋىندىسى شىرقالدى.
كونتسەرتتىڭ مازمۇنىن تەرەڭدەتە تۇسكەن ەرەكشە قويىلىم – «سوعىس حاتتارى» ميزانستسەناسى بولدى. وندا ءاليا ەسىمدى كەيىپكەر كەڭەس وداعىنىڭ باتىرى ءاليا مولداعۇلوۆاعا ارناپ ۇندەۋ جولدادى. كورىنىس پاتريوتتىق سەزىمدى قوزعاعان ء«اليا» انىمەن تۇيىندەلدى.
سوعىس جىلدارىنان بەرى حالىق جادىندا ساقتالعان «جاس قازاق», «جۋراۆلي», «تاليانوچكا», «تري تانكيستا», «يابلوچكو», «ەح, دوروگي», «سيني پلاتوچەك», «كاتيۋشا», «ەحال يا يز بەرلينا» جانە «مايسكي ۆالس» سەكىلدى اندەر ورىندالىپ, كورەرمەندەر تاراپىنان جىلى قابىلداندى.
سونىمەن قاتار, سوليستەر مەن ۆوكالدىق توپتار, حور ۇجىمدارى ورىنداعان «قارۋلى كۇشتەر», «عاسىرلار ءۇنى», «ۇمىتپايمىز», «مەن قازاق», «قازاقستان – بايتاق دالا», «ساۋىت» جانە «اتامەكەن» اندەرى كورەرمەندەرگە ەل مەن جەرگە دەگەن سۇيىسپەنشىلىك سەزىمىن ۇيالاتتى.
كەش سوڭىندا قۇرمانعازى اتىنداعى قازاق ۇلتتىق كونسەرۆاتورياسى مەن ك. بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ دومبىراشىلارى مەن سوليستەرى «جەڭىس كۇنى» جانە «اتامەكەن» اندەرىن ورىنداپ, پاتريوتتىق كونتسەرتتى جوعارى نوتامەن قورىتىندىلادى.
