اشىق اسپان استىنداعى مۇراجايعا ەكىنشى دۇنيەجۇزىلىك سوعىستا پايدالانىلعان وتىز شاقتى اسكەري تەحنيكانىڭ, اتاپ ايتقاندا, «ت-34», «ت-62» تانكتەرىنىڭ, قۇرىشتان قۇيىلعان بىرنەشە تەحنيكانىڭ, ايگىلى «كاتيۋشا» ارتيللەريالىق قارۋىنىڭ, ءتۇرلى زەڭبىرەكتىڭ ماكەتتەرى قويىلعان.
«اتا-انامىز وسى ساياباققا جاقىن جەردە تۇرادى. كەشكىلىك جاتار الدىندا بالا-شاعامىزبەن بىرگە وسىندا كەلىپ, ءبىراز سەرۋەندەپ قايتامىز. مۇنداعى اسكەري تەحنيكالاردى جاقىننان كورۋدىڭ ءوزى قورقىنىشتى. بەسىكتەگى بالانى جەتىم, جاس كەلىنشەكتى جەسىر ەتكەن سۇراپىل سوعىستىڭ قاسىرەتى ءالى ۇمىتىلعان جوق. بەيبىت زاماننان ارتىق ەشتەڭە جوق. مۇنداي سوعىس تەحنيكالارى وسىلاي مۋزەيدە تۇرا بەرسىن, جەر بەتىندە تەك تىنىشتىق سالتانات قۇرسىن», دەيدى وسىدان ەكى اپتا بۇرىن كوكشەتاۋ قالاسىنان قوناققا كەلگەن نارعىز ءجۇنىسوۆا.
1942 جىلدىڭ كوكتەمىندە ءدال وسى الاڭنان قوستاناي وبلىسىندا جاساقتالعان 151-ارنايى اتقىشتار بريگاداسى مايدانعا اتتانعان بولاتىن. كەيىن قاتارى سەلدىرەگەن بريگادا 150-اتقىشتار ديۆيزياسىنىڭ قۇرامىنا ەنەدى. 1945 جىلى رەيحستاگقا جەڭىس تۋىن تىككەن قاھارماندار قاتارىندا وسى 151-اتقىشتار بريگاداسىنىڭ جاۋىنگەرلەرى دە بولعان. رەيحستاگ توبەسىندە جەڭىس تۋىن جەلبىرەتكەن جاۋىنگەرلەردى قوستانايلىق يليا سيانوۆ باسقارعان اۆتوماتشىلار روتاسى وقپەن قالقالاپ تۇرعان ەدى. جاۋىنگەرلىك تەحنيكا مۋزەيىنىڭ كىرەبەرىسىندە وسى بريگادانىڭ قۇرمەتىنە قويىلعان بيىك ەسكەرتكىش تۇر.
قوستاناي وبلىسى
