كوركەمدىك كومپوزيتسيا كەڭەس وداعىنىڭ باتىرلارى – مالىك عابدۋللين, لەسبەك جولداسوۆ, قاناش قامزين, قۇدايبەرگەن سۇراعانوۆ, راحىمجان توقاتاەۆ, احمەديار قۇسايىنوۆ, ءسادۋ شاكىروۆ, ەۆگەني برەۋسوۆ, جولدىباي نۇرلىباەۆ جانە مايدانعا اتتانعان 114 قازپي (قازىرگى - اباي اتىنداعى قازۇپۋ) ستۋدەنتتەرى مەن وقىتۋشىلارىنا تاعزىم رەتىندە قويىلدى.
ەسكەرتكىشتىڭ اشىلۋى – ۇلى وتان سوعىسىندا ەرلىك كورسەتكەن باتىرلارىمىزدى ۇلىقتاپ, ولاردىڭ ەسىمدەرىن ۇرپاق ساناسىندا ماڭگى ەستە قالدىرۋ ماقساتىندا ۇيىمداستىرىلدى.
ءىس-شاراعا اباي اتىنداعى قازۇپۋ باسقارما توراعاسى-رەكتور بولات تىلەپ, الماتى قالاسى جاستار ساياساتى باسقارماسى باسشىسىنىڭ ورىنباسارى الماز كەڭەسباي, پرورەكتورلار, فاكۋلتەت دەكاندارى, كافەدرا جانە ءبولىم مەڭگەرۋشىلەرى, پروفەسسورلىق-وقىتۋشىلار قۇرامى, ارداگەر ۇستازدار مەن كەڭەس وداعىنىڭ باتىرلارى اتانعان ۋنيۆەرسيتەت تۇلەكتەرىنىڭ ۇرپاقتارى, سونداي-اق ءبىلىم الۋشى جاستار قاتىستى.
اباي ۋنيۆەرسيتەتىنىڭ باسقارما توراعاسى-رەكتور بولات تىلەپ قۇتتىقتاۋ سوزىندە: «وسى كۇنگە دەيىن ۋنيۆەرسيتەتىمىزدەن مايدانعا اتتانىپ, كەڭەس وداعى باتىرى جوعارى دارەجەسىنە يە بولعان 8 تۇلعا بەلگىلى بولعان بولسا, جەڭىستىڭ 80 جىلدىعى قارساڭىندا ءبىزدىڭ تاريحشى عالىمدارىمىزدىڭ زەرتتەپ-زەردەلەۋىمەن, ارحيۆتىك قۇجاتتاردى قايتا قاراپ, جۇمىستانۋىنىڭ ناتيجەسىندە توعىزىنشى باتىردىڭ دا وسى ۋنيۆەرسيتەتتەن شىققانى انىقتالىپ وتىر. وسى ورايدا ۋنيۆەرسيتەت تۇلەكتەرىنىڭ قولداۋىمەن ارنايى بەلگى تاس ورناتىلىپ جاتىر. بۇل بەلگى – ۋنيۆەرسيتەتىمىزدەن مايدانعا اتتانعان وقىتۋشىلار, عالىمدار مەن ستۋدەنتتەردىڭ ەرلىگىنە, بابالار رۋحىنا تاعزىم رەتىندە قويىلدى», - دەپ اتاپ ءوتتى.
رەسمي ءىس-شارا سوڭى «ەرلىككە تاعزىم» اتتى كونتسەرتتىك باعدارلامامەن جالعاستى.
ايتا كەتەيىك, «ەرلىككە تاعزىم» ەسكەرتكىش تاس بەلگىسى اباي اتىنداعى قازۇپۋ-دىڭ تۇلەگى راقىمبەردى جەتىبايدىڭ دەمەۋشىلىگىمەن ورناتىلدى. ال اتالعان شارانىڭ ۇيىمداستىرىلۋىنا ۋنيۆەرسيتەتتىڭ الەۋمەتتىك جانە جاستار ساياساتى جونىندەگى دەپارتامەنتى مۇرىندىق بولدى.
