ءسابيدىڭ اناسى ايبات قىزىنىڭ ۋاقىتىندا تۋىپ, قالىپتى دامىعانىن ايتادى. سول ءۇشىن دە دەنساۋلىعىندا كىنارات بار دەگەندى تىپتەن ويلاماعان. كەيىن, تۋعانىنا ەكى اي شامالاعاندا تەرىسى كوگەرىپ, ءجيى قۇسىپ, ەمبەي, مازاسى قاشقان. ءسابيدىڭ اتا-اناسى دەرەۋ پەدياترعا, سودان سوڭ نەۆروپاتولوگقا جۇگىنگەن. كوپ ۇزاماي ۋلترادىبىستىق زەرتتەۋدە بالانىڭ توبە-قاراقۇس ايماعىندا تۇزىلگەن سۇيىقتىق انىقتالعان.
كت اپپاراتى ءسابيدىڭ سول جاق توبە بولىگىندە كولەمدى ىسىكتىڭ بارىن راستاپتى. ال, مرت ميدىڭ فۋنكتسيونالدى ماڭىزدى ايماقتارىندا ورنالاسقان 5,6× 4,2 سم كولەمىندەگى ىسىكتى ناقتى كورسەتكەن. وسىدان سوڭ بالالار نەيروحيرۋرگى دميتري سۋردين, الىبەك جاراسوۆ جانە باسقارما توراعاسىنىڭ ورىنباسارى اسىلبەك قاليەۆ باستاعان ءبىر توپ مامان كەڭەسىپ, شۇعىل وپەراتسيا جاساۋ تۋرالى شەشىم قابىلداعان. ءسابيدى بالالار نەيروحيرۋرگياسى بولىمشەسىنە جاتقىزعان. بۇل كەز قىزدىڭ اناسى جانىن قويارعا جەر تاپپاي, قاتتى كۇيزەلگەن.
«العاشىندا قىزىمنىڭ اۋىر سىرقاتى بار دەگەنگە يلانعىم كەلمەگەنى راس. بىراق كەيىن ەس جيىپ, الدا قانداي قاۋىپ كۇتىپ تۇرعانىن تۇسىنگەن سوڭ, كەز-كەلگەن جاعدايعا دايىن بولۋعا تىرىستىم. قۋانىشقا قاراي, ءبىزدىڭ تىلەگىمىز قابىل بولىپ, قىزىمىز امان قالدى. قازىر جاعدايى جاقسارىپ كەلەدى. دارىگەرلەرگە, نەيروحيرۋرگ دميتري سۋردينگە, ورتالىقتاعى بارلىق مەديتسينا قىزمەتكەرلەرىنە ريزاشىلىعىمدى بىلدىرەمىن», دەگەن ءسابيدىڭ اناسى ايبات, ورتالىق ۇجىمىنا العىس ايتتى.
بالالار نەيروحيرۋرگياسى بولىمشەسىنىڭ مەڭگەرۋشىسى, پروفەسسور عابيت ولەڭبايدىڭ ايتۋىنشا, وپەراتسيا وتە كۇردەلى بولىپتى. الىپ ىسىك بالا ميىنىڭ جارتىسىنا جۋىق بولىگىن الىپ جاتقان. قان جوعالتۋ قاۋپى وتە جوعارى. زاماناۋي ءادىس-تاسىلدەردى قولداناتىن ەپتى دارىگەرلەردىڭ, تولىعىمەن جاراقتاندىرىلعان ورتالىقتىڭ ارقاسىندا وپەراتسيا ءساتتى ءوتتى.
«جاسقا تولماعان بالاعا قانداي وپەراتسيا جاساساڭ دا وڭايى جوق. اسىرەسە, ۇلكەن ىسىكتى الىپ تاستاۋ قيىن. اقىلداسا كەلە ىسىكتى ميكروحيرۋرگيالىق ادىسپەن الۋعا بەكىندىك. وپەراتسيا جاقسى ءوتتى. قازىر كىشكەنتاي قىزىمىز وپەراتسيادان كەيىنگى ەمشارالاردان ءوتىپ جاتىر. ءوزىن جاقسى سەزىنەدى. قۇسپايدى, جاعدايى جاقسارىپ كەلەدى. وپەراتسيادا انەستەزيولوگتار مەن ترانسفۋزيولوگتار دا اۋقىمدى جۇمىس اتقارعانىن ايتا كەتكەن ءجون. ويتكەنى كىشكەنتاي پاتسيەنتتىڭ جاعدايىن باقىلاۋ اسقان دالدىكتى قاجەت ەتەدى. توپتا انەستەزيولوگ-رەانيماتولوگ ايگۇل جاندەلدينوۆا, مەيىرگەر-انەستەزيست گۇلزيرا داۋكەنوۆا, ترانسفۋزيولوگ ەربول قۋانىشەۆ جانە وپەراتسيا مەيىرگەرى الۋا داۋكەنوۆالار دا بولدى», دەيدى عابيت ولەڭباي.
