قوسشى قالاسىنىڭ سۋ قۇبىرى جۇيەسىنىڭ قۇرىلىسىن اياقتاۋعا 476 ميلليون تەڭگەدەن استام قاراجات قاراستىرىلعان. قازىر ەلۋ شاقىرىمعا جۋىق قۇبىر تارتىلدى. جەلىنىڭ جالپى ۇزىندىعى 64 شاقىرىم توڭىرەگىندە. نىساندى جىل سوڭىنا دەيىن تاپسىرۋ كوزدەلىپ وتىر. قولدانىستاعى ينجەنەرلىك جەلى 30 مىڭ تۇرعىنعا ەسەپتەلگەن. رەسمي دەرەكتەرگە قاراعاندا, بۇگىنگى كۇننىڭ وزىندە قوسشىدا ەلۋ مىڭنان استام تۇرعىن تىركەلگەن. الداعى ۋاقىتتا قالا تۇرعىندارىنىڭ سانى ءالى دە وسەدى دەپ كۇتىلۋدە.
–قوسشى قالاسىنداعى سۋ قۇبىرى قۇرىلىسىنىڭ ءتورتىنشى كەزەڭى جۇرگىزىلۋدە, – دەيدى وبلىستىق ەنەرگەتيكا, تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى مارات ءجۇنىسوۆ.
ماكينسك قالاسىنداعى سۋ قۇبىرى جەلىلەرىن قايتا جاڭعىرتۋ جۇمىستارى قولعا الىنعان. بۇل قالادا 73 شاقىرىمعا جۋىق جەلى تارتىلماق. بۇعان دەيىن بولىنگەن قاراجات ەسەبىنەن 45 شاقىرىمدىق جەلى جۇمىسى اياقتالدى. مەملەكەتتىك قوردان بولىنگەن 606 ميلليون تەڭگەگە جوبانى تولىق اياقتاپ, قالا تۇرعىندارىن اۋىز سۋمەن قامتاماسىز ەتپەك.
اقمولا وبلىسى
