سۋرەت: classicalmusicnews.ru
فورۋمعا قاتىسۋشىلاردى وبلىستىق مادەنيەت باسقارماسىنىڭ باسشىسى قۇرالبەك اتامۇراتوۆ قۇتتىقتاپ, توبىل وڭىرىندە وسىمەن سەگىزىنشى رەت ءوتىپ جاتقان ءداستۇرلى مۋزىكا مەرەكەسى حالىقتار اراسىنداعى دوستىق پەن مادەني بايلانىستى بەكەمدەي تۇسەتىنىن ايتتى.
«بيىل فورۋم حالقىمىزدىڭ ءبىرتۋار كومپوزيتورى, ۇلت ماقتانىشى نۇرعيسا تىلەنديەۆتىڭ 100 جىلدىعىنا, سونداي-اق قازاقستاننىڭ ەڭبەك سىڭىرگەن قايراتكەرى, ەل تاۋەلسىزدىگىنىڭ باستاپقى كەزەڭدەرىندە قوستانايدا تۇڭعىش رەت قازاق وركەسترىن قۇرعان, ءوڭىر مادەنيەتىنىڭ دامۋىنا ولشەۋسىز ەڭبەك سىڭىرگەن مارقۇم نازىمبەك مولداحمەتوۆتىڭ 55 جىلدىعىنا ارنالىپ وتىر. مۇنداي ءىس-شارالار جەرگىلىكتى وركەسترلەر مەن جاس ديريجەرلەردىڭ حالىقارالىق دەڭگەيدە ونەر كورسەتۋىنە دە مۇمكىن-دىك بەرەدى», دەدى ق.اتامۇراتوۆ.
وركەسترلەر شەرۋى اياسىندا وزبەكستاننىڭ حالىق ءارتىسى فارۋح سادىقوۆ, وپەرا ءانشىسى رۋستام اليماردانوۆ, قازاقستاننىڭ ەڭبەك سىڭىرگەن ءارتىسى جالعاسبەك بەگەندىك, ۆلاديمير كوچنەۆ سىندى ديريجەرلەر ساحناعا شىعىپ ونەر كورسەتتى. فارۋح سادىقوۆتىڭ ايتۋىنشا, مۇنداي فورۋمدار حالىقارالىق ۇلكەن ساحنالاردان كورىنىپ جۇرگەن بەلگىلى ديريجەرلەر مەن وبلىس دەڭگەيىندەگى وركەسترلەردى باسقاراتىن جەرگىلىكتى ديريجەرلەردىڭ باسىن قوسىپ, ءوزارا تاجىريبە الماسۋعا, شەبەرلىك شىڭداۋعا مۇمكىندىك بەرەدى.
«مەن وسى جوبا باستالعالى باۋىرلاس قازاق حالقىنىڭ ۇلتتىق مۋزىكاسىنا دەگەن شەكسىز قۇرمەت-ىقىلاسىمدى ارقالاپ قوستانايعا جىل سايىن كەلىپ تۇرامىن. وتە جوعارى دەڭگەيدە ءوتىپ جاتقان بۇگىنگى ءىس-شارا الەمگە ايگىلى تۋىندىلاردى, قازاقتىڭ كلاسسيكالىق مۋزىكاسىن ناسيحاتتاپ, دارىپتەۋمەن قاتار, وركەسترلەردىڭ رەپەرتۋارىن بايىتادى. تۇپتەپ كەلگەندە, ەل مەن ەلدى باۋىرلاستىرىپ, ىنتىماق-بىرلىگىمىزدى نىعايتادى», دەيدى وزبەكستاننىڭ حالىق ءارتىسى.
قوستاناي
