وتكەن جىلى مول استىق العانىمەن, ءونىمىن لايىقتى باعاعا ساتا الماعان شارۋالار بيىل باعاسى تۇراقتى ءارى بيدايعا قاراعاندا, نارىقتا جوعارى سۇرانىسقا يە مايلى, بۇرشاقتى داقىلداردى كوبەيتۋدى كوزدەپ وتىر. وسىعان وراي, مايلى داقىلدىڭ كولەمى 755 مىڭ گەكتارعا دەيىن ۇلعايادى. بۇدان تىس الەۋمەتتىك ماڭىزى بار داقىلدارعا دا باسا مەن بەرىلەدى. بيىل وڭىردە 21 مىڭ گەكتار قاراقۇمىق, 6,1 مىڭ گەكتار كارتوپ تۇقىمىن ەگۋ جوسپارلانعان.
«قازىر اۋىل شارۋاشىلىعى قۇرىلىمدارىندا 514,2 مىڭ توننا تۇقىم قورى بار. بۇل كوكتەمگى ءدان ءسىڭىرۋ ناۋقانىنا تولىق جەتەدى. وتكەن كۇزدە 1 ملن 342 مىڭ گەكتار جەر قايتا وڭدەلىپ, تىڭايتىلدى. قىستاي 495 مىڭ گەكتار القاپتا قار توقتاتۋ جۇمىستارى جۇرگىزىلدى. بيىل كوكتەمگى ەگىس جۇمىستارىنا 42 مىڭنان استام تەحنيكا شىعادى. تەحنيكانىڭ ءبارى جوندەۋدەن وتكەن. شارۋاشىلىقتاردىڭ ءبىرازى مەملەكەتتىك باعدارلامالار ارقىلى تەحنيكا پاركىن جاڭارتىپ الدى», دەيدى وبلىستىق اۋىل شارۋاشىلىعى باسقارماسىنىڭ باسشىسى يبراگيم بەكمۇحامەتوۆ.
ەگىن شارۋاشىلىعىندا ءونىم كولەمىن ارتتىرۋدىڭ ءتيىمدى جولدارىنىڭ ءبىرى – سۋارمالى جەرلەردى ۇلعايتۋ. بىلتىر وڭىردە سۋارمالى القاپتىڭ كولەمى 8 430 مىڭ گەكتاردىڭ ۇستىندە بولسا, بيىل تاعى 3 463 گەكتار سۋارمالى القاپ قوسىلادى. اۋىل شارۋاشىلىعى قۇرىلىمدارىنىڭ الدىندا تۇرعان ماڭىزدى مىندەتتىڭ ءبىرى – ەگىس القاپتارىن ءارتاراپتاندىرۋ, مونوداقىلدان الشاقتاۋ. بيىل شارۋاشىلىقتار وسى ماسەلەگە باسا كوڭىل بولمەك.
قوستانايلىق شارۋالار مينەرالدى تىڭايتقىشتاردى پايدالانۋ جونىنەن دە الدىڭعى قاتاردا كەلەدى. ماسەلەن, بىلتىر القاپقا 258,6 مىڭ توننا تىڭايتقىش شاشىلعان. شارۋالاردىڭ دەنى ماڭىزدى ناۋقاندى ويداعىداي اتقارۋ ءۇشىن مەملەكەت قولداۋىنا ارقا سۇيەيدى. ماسەلەن, «دامۋ» قورى فيليالىنىڭ مالىمەتىنشە, بۇگىنگە دەيىن «كەڭ دالا» باعدارلاماسى اياسىندا 30,9 ملرد تەڭگەگە ءوتىنىم قابىلدانىپ, ونىڭ 14,5 ملرد تەڭگەسى قارجىلاندىرىلعان. بۇدان تىس «توبىل» الەۋمەتتىك-كاسىپكەرلىك كورپوراتسياسى ارقىلى 20,1 ملرد تەڭگە كولەمىندە جەڭىلدەتىلگەن نەسيە بەرىلىپ جاتىر.
القاپ جۇمىستارىنا كىرىسىپ كەتكەن ناۋىرىزىمدىق شارۋالاردىڭ ايتۋىنشا, بيىل توپىراق ىلعالىنىڭ قالىڭدىعى ورتاشا, شامامەن 50-70 سم بولادى. ءوڭىردىڭ سولتۇستىك اۋداندارىندا ىلعال مول.
«كۇن ىسىپ كەتپەي تۇرىپ توپىراق قۇرامىندا بار ىلعالدى ساقتاپ قالۋ كەرەك. تۇقىم جەتكىلىكتى, تەحنيكا دايىن. مەملەكەت تاراپىنان جىلداعىداي قولداۋ كورسەتىلىپ جاتىر. ارزان ديزەلدى وتىن ءبولىندى, جەڭىلدەتىلگەن شارتپەن نەسيە الىپ جاتىرمىز», دەيدى ديقاندار.
قوستاناي وبلىسى
